TAIHMAKNA
Thufingte 12:27-ah chuan, “Mi thatchhia chuan ramvaka a kah rawh tur a nei lo. Mihring sum hlu chu taihmak a ni,” tiin a inziak a. Mihringin kan hmelma lian ber chu thatchhiatna anih ang bawkin taihmakna hi kan hmanraw tha ber leh kan ro hlu ber a ni. Thlarau lam nun a ni emaw tisa lama kan mamawh zawnna kawngah a ni emaw taihmakna kan neih hi a pawimawh takzet a ni.
Bible-ah hian ringtu kan nih anga kan nun dan tur tam tak a inziak a. Chutah chuan a pawimawh berte zing ami leh a sawi ngun berte zing ami chu taihmakna hi a ni. Rom 12:11-ah chuan, “Taihmak kawngah chuan thatchhe suh ula; thlarau kawngah chuan thahnemngai ula,” tiin a inziak a. Pathian hian ringtu thatchhia hi a duh lo tak zet a. Thlarau mi inti Pathian thu pawh sawi zul thei, lâm huna lâm ve thei mai, mahse nitin ei leh bar dap kawngah leh hnathawh kawnga thatchhe leh si thin ringtu nunah eitur tuihnang tha a lak theih a rinawm loh. “I beram rualte awm dan chu hriat tumin taihmak chhuah la, i ran rualte chu veng tha rawh,” tiin Thufingte 27:23-ah a inziak a. Hei hian Pathian rawngbawltu kan tih ho, a bikin, Pastor, Kohhran Upa leh Rawngbawltute pawh taima taka rawngbawlna hlen tura Pathian kohna a tichiang hle a ni.
Thlarau lam a ni emaw, tisa lam a ni emaw, Pathian malsawmna kan dawnna tura hmanraw tha ber chu taihmakna hi a ni a. Mi taima, thahnemngai taka thawk thin chungah Pathian a awm hle hle thei lo a, malsawmna tam takin a vur leh nge nge thin. Thalaite pawh hian kan nitin hun hman danah thlarau leh tisaah kan taima tawk em tih hi i inchhut nawn fo vang u.