NITIN KRAWS PUT DAN
Lauren Weatherall
Luka 9:23 Tin, amah vekin, mi zawng zawng hnenah, “Tupawhin mi zui a duh chuan mahni hrehawm pawisa lovin, nitin a kraws puin mi zui rawh se”
Isua chuan a zirtirte hnenah Kraws puin mi zui rawh se a ti si a. Isua zirtir ni tura thil tih ngei ngei tur chu, nitin kraws put hi a ni tlat si a ni. Engtin tak nge Kraws pu chung chuan kan zui ang tih kan lo chhui ho dawn a ni.
Kraws put han tih hian, kraws hi mistiri thiam deuhte hnenah kan siam tirin kan pu vu vu ang tihna a ni kher lo. I ngaihtuahna leh i thinlungah khan kraws chu i lo pu ve tur a ni tihna a ni mai. Ngaihtuahna thianghlim lo tak in a luahkhah che khan Kraws hmang khan i tihlum ang emaw, Kraws-a i tana tuarsak tu kha i ngaihtuah let ang a. Isua chu thlang zawkin i ngaihtuahna sualte chu i dah bo thin ang tihna a ni.
Entirnan, i rawngbawlpui han huat deuh chang te kha a lo awm thin ang. Rawngbawlna chungchanga thu inhmuh loh changte emaw Pathianin i chan tawka a pek che i han ngaihtuaha lungawi loh riau te i lo nei ve thin ang. I ngaihtuahna hi i thinlung kawngkhar vengtu a ni tih hi hre reng ang che. Khang ngaihtuahna thianghlim lo a lo luh khan thlemna chu a lo in tan chiah thin, engtin nge kan sawi ang. Setana’n a rawn bekbawrh sur sur che a ni. Evi a thlem ang chiah khan a thlem mek che tihna a ni. I thinlunga sual lut tur kha i lo dang bet ve tlat thei a ni. Khang ngaihtuahna sual leh bawlhhlawh ilo ngaihtuah chiah khan nangmah ngei khan i pawmpui loh a ngai a ni. Pathian thu nen a inmil lo e. Pathian thu angin ka nung ang tih kha kan chhanna tur a ni ta a ni. Chu chu nitin Kraws pua nun dan kawng chu a ni.
Mahni hrehawm pawisa lovin a zui: Mihring tisaa nung kan ni a, tisa chuan mamawh leh ngaihtuah duhte a lo nei ve thin a ni. A chunga kan sawi takte ang chi khi. Mahni ngaihtuah châk tak zawngte, Isua zuitu ka ni a ka ngaihtuah tur a ni lo tih tlat khi a hrehawm ve em em a ni. Kraws-a Isuan a taksa a, a tuar ang chiah khan he langthei lo kraws kan put ve tlat avang hian kan tuar ve a ngai a ni. I taksa sual tih châk et et reng mai thunun reng te kha a hrehawm ve thin a ni. Nangmah ah khan i taksa kha a la awm ve tlat bawk si a. Mahse, khang ang thil tih loh kha a chhan tha tak a awm a, chu chu hei hi a ni. I Petera 4:1 “Chutichuan, Kristan tisaa a tuar avangin nangni pawh chutiang rilruknain inthuam ve rawh u; tisaa tuar tawh chuan sual a bansan tawh si a;”
Khimi chang thu khian kan infuih thar fo thin a ngai a ni. Khi Bible khian tisaa kan tuar chuan Kraws chu kan lo pu ve reng tawh tihna a ni. Kraws put tihna awmzia tak chu sual laka inthiarfihlim tihna mai a ni. He thil kan sawi tak hi Vanrama intan chauh tur a ni lo; nitin i sualte i kalsan zel chuan nangmahah Pathian duhzawngte chu i hre chiangin i lo hmufiah tulh tulh tawh dawn a ni. Thlemna chu ‘Aih’ tih a i chhan zel chuan chung ngaihtuahna sualten an tihbuai ngam loh hun che ila tawng chho dawn a ni. Chutah tak chuan Krista hmel leh nun dan ze mawi tak chu mite hmuhah i pho chhuak tawh ang. Midangte tan malsawmna leh hahchawlhna ilo ni tawh dawn a ni.
Isua Krista zui tur chuan Isuan engnge a tih thin? tih ngaihtuah fo a ngai a ni. Isua zirtir ni tur chuan he thil hi a pawimawh em em a ni. Nitina Isua kan zui dan tur dik tak chu Isuan a tih dan ang zela tih ve hi a ni. Isua kha a thiltih ah a chiang em em mai a. Sual kha a va ti chhin lo/tem chhin lo. Sual kha atan sual a ni. Sual tura thlemna a tawn khan sualah pakhat mah a tlu lo a ni. A chhan chu a chhanna pek kha “Aih” tih a ni mai. Keini chu sual a tlu lo tawk tur hian thlemna bulah awm kan tum a, a tawpah kan tawlh thlu leh thin a ni.
Hebrai 5:7-ah chuan “Ani chuan a tisa put lai niahte khan, thihna laka amah chhandam theitu hnenah chuan nasa taka au leh mittui tla chungin tawngtainate leh dilnate a hlan a, a tih dek thin avangin ngaihthlakin a awm bawk a;” Nitina Isua kraws rinawm taka put dan kawng khat a ni. Pathian hnenah sual hneh tura chakna leh theihna, rilru leh tihtakzeta dilin a tawngtai thin a ni. Châkna thlemna a tawh a “Aih” a tih theihna tur leh Pathian thuawihna “Keima thu ni lo in i thu ni zawk rawh se” a tih zel theihna tur thinlung sakhat chu a neih theihnan nasa takin a tawngtai thin a ni.
Nitina kraws pu zel thinte nunah hian danglamna a lo awm thin a ni. Kraws pu zel thin ringtu chu sual lakah tlenfaiin a lo awm a. Thlarau chuan rah a lo chhuah thin ta a lo ni. Thlarau rah chhuahna tur chu keimahniah a ni si a. Rang taka, “A ni pawh engnge a nih bik?” tia lo in veng tung thin leh midangte thiamlohna lai ringawt hmu thin khan, rah duhawm hmangaihna, ngilhneihna leh dawhtheihna te chu a lo pe chhuak ta thin a ni.