‘Thisen’ tih hi Bible-ah hian vawi 378 ngawt a lang a. Bible hian kawng hrang hrangin thisen chungchang a sawi a; tisa nunna a nih thu (Lev. 17:11, 14) te, thisen chu chhuah mai mai tur a nih lohzia (Ex. 20:13, Gen. 9:6) te, “thisen chhuah chungchanga a mawh latua tang lo tur te (Thufing 6:17, Lev. 20:27, II Sam. 4:11), Thuthlung Hlui hunah thisen chhuahtu chu thisen chhuah ve tur a nih chungchang (Num. 35:19, 21, Josua 20:5) te leh mihringte sual thawi nana thisen hman a nih thu hmun tam takah kan hmu a ni.
Eden huana Evi leh Adama te’n an bawhchhiat atang khan, Lal Isua lo lan hma hauh pawh khan bawhchhetute thlah kal zel mihring te chuan bawhchhiatna vanga an sual tireh turin leh Pathian hmaa thianghlim anga an lan leh theih nan sualna nei ve lo leh bawhchhe ve lo ran thisen chhuaha an inthawi a lo ngai ta a. Gen. 3:21 kan en chuan, “Tin, LALPA Pathian chuan Adama tân leh a nupui tân chuan savun kawrfualte a siamsak a, a haktîr ta a” tih kan hmu a. Bawhchhiatna ni la la khan bawhchhiatna vanga mualphona khuh bo turin ran pawisawi lo thisen a luang a ni.
Hun lokal zelah pawh ran pawisawi lo thisen chhuaha inthawina chu mihringte sualna hliahkhuh nan hman a ni chho ta zel a. Pathian hian sual bawlhhlawh tlenfai nan pawisawi lo thisen hi a lo ruahman tlat mai a ni.
Amaherawhchu, maicham chunga ran thisen chuan kumkhua atan sual a tlengfai zo lova, a kum lehah sual fai nan ran dang thisen chhuaha inthawi thar leh a ngai thin. Pathian Fakna hla lar takah pawh;
“Juda maicham chunga, ran thisen luang tawh chuan;
Riru a thlamuan zo lova, Sual kai a tibo nang”
tih a nih ang khan ran hmanga inthawina chuan kumkhuaa sual faina a thlen lova ni.
“Bawngpate leh kelte thisen chuan sualte tibo thei rual a ni si lo. Chutichuan, khawvela a luh laiin inthawina leh thil hlan i duh lo va, Ka tan taksa mi buatsaihsak zawk a” (Hebrai 10:4) tih ang khan Pathian hian mihringte inthawina ran thisen hian an sualna a labo hlen thei lova, a tifai thei tak tak lo tih a hria. Chuvangin ran thisen aia chak zawk leh thiltithei zawk, mi zawng zawng sualna tlengfai thei tur inthawina a lo ruahmanin a lo hlan ta zawk a (Kolosa 1:14).
Kraws lera Pathian Fapa Isua Krista thisen far zet chuan, sual eng anga dum pawh a tlengfai thei a, kumtina tih thar ngai a ni tawh lo, Chatuan atan a ni. Krista thisen zet chu kan sual te tlengfai tur leh a kai dum zawng nena tifai turin a chak tawk em em a ni.
Krista tlanna chang tawhtu leh pawmtu, Krista thisena chhandam tawh te kan ni. Krista thisen hi a thlawnin a far lova, thisenah hian thuthlung thar a awm tih erawh chu kan hriat reng a ngai a ni. Marka 4:24 “Tin, Ani chuan an hnenah, “Hei hi ka thisen, mi tam tak tana chhuak tur, thuthlunna chu a ni” a tih ang khan Krista thisenin kan sual a tlengfai a, thu kan thlung thar a.
Kan sual ata min tlantu Isua Krista tana rinawma nung a, kan phak ang tawk tawka rawngbawl ve tawh tur kan ni tih erawh hi chu theihnghilh loh a tha khawp ang. Khawi hmunah pawh awm ila, Krista tan tlattu thil dang zawng aia Amah thlang tlattu kan nih a ngai a, Krista thisena Thuthlung Tharah kan rinawm a, kan awm reng a ni tih tarlan nan, eiruk theihna dawhkan hmaa kan thut laiin Krista hrereng ila, thlang tlat thin ang u. Zu leh ruihhlo tih mai theihna dinhmuna kan din laiin Krista nena kan Thuthlung Thar hi i hrereng thin ang u. A lokal leh huna hlim taka Amah hmuaktu kan nih theih nan, Krista tan tlatin A duh danin kan nitin nun i hmang thin ang u.
“I kain Isua chu Lalpa a ni tih i tan a, Mitthi zing ata Pathianin a kai tho tih i thinlunga i rin chuan chhandamin i awm ang,” (Rom 10:9)
Krista’n kraws ah a thisen hlu luantirin kan sual man min peksak a, a tlanna chu pawmin Krista nen Krista Thisenah Thuthlung Thar kan thlung tawh a ni. Krista Thisen hlutzia leh thiltihtheihzia hriain kan thutlungah hian awm reng ang u.
