AMAH THU NGAI RAWH U
“Tin, ngai teh, van atangin awin, “Hei hi ka Fapa duh tak, ka lawm em ema chu a ni,” a ti a (Matthaia 3:17) “A la sawi lai mekin, ngai teh, chhum var takin anmahni a rawn hliah ta a; tin, ngai teh, chhum atang chuan awin, “Hei hi ka Fapa duh tak, ka lawm em ema chu a ni; ama thu ngai rawh u,” a ti a (Matthaia 17:5)”
Matthaia 3: 13-17 ah hian Isua baptisma chan thu kan hmu a, Isuan baptisma a chan zawhah chhum atangin awin “Hei hi ka Fapa duh tak, ka lawm em ema chu a ni”, a rawn ti a. Isua baptisma chan laia thil thleng ang deuh hi Matthaia Bung 17:1-13 ah kan hmu leh a. Hmel danglamna tlangah khan Isua chu Johana, Jakoba leh Petera te hmuh laiin Isua silhfen te chu lo engin A hmel pawh Ni angin a lo eng a. Isua chu van ropuinaa thuamin a awm a ni. Mosia leh Elija te pawh lo langin Isua nen chuan an han inbe vel ta a. An bul hnai zawng zawng thlengin van ropuina chuan a chhun eng a. A ropui turzia chu kan hrethiam ve mai awm e. Heng Bible chang pahnih te inan lohna hi zirchiang ta ila. Hmel danglamna tlangah khan van ropuina a lo lang a, Isua Hmel Ni angin a lo eng a, Mosia leh Elija te an lo lang a, a ropuiin a thlamuan thlak hle ang tih chu chiang sa a ni a. Khami boruakah khan Isua Zirtirte zinga mi chak leh mi hmanhmawh, ngaihtuahna hmang mi Petera kha a phur lutuk a, a chak ta lutuk a. Isua Thu leh Pathian Thu pawh ngaichang chuang hlei lo khan ama (Petera) mimal ngaihdan kha rang takin a puangchhuak a. “Tin, Peteran Isua a bia a, “Lalpa, kan tan heta awm hi a tha; i duh chuan hetah hian bawkte pathum ka khawh ang; i tan pakhat, Mosia tan pakhat, Elija tan pakhat,” (Matthaia 17:4) a rawn ti chhuak nghal pawp mai a nih kha. A la sawi mek lai chuan van atanga (Pathian) aw lo chhuak chuan Petera thusawi chu pawt chatin “Hei hi ka fapa duh tak, ka lawm em ema chu a ni, AMA THU NGAI RAWH U” a ti ta a nih kha. Petera ngaihdan kha a tha lo pawh a ni lo, mahse, Pathianin a duh loh lai tak chu Isua Thu ngaichang miah lova mimal ngaihdan a sawi nghal pap pap kha a ni. Khawngaih rawngbawl hna kan thawhna kawngah leh Lal Isua kan zui vena kawngah hian ngaihdan kan neih ve chu a thiang a, Kohhranah te kan phak tawka kan tel venaah rilru kan sengin ngaihdan pawh kan nei ve tur a ni a, a sawi pawh kan sawichhuak thiang a ni. Mahse, Amah kan Lalpa Isua Krista Thu hi kan ngaih pawimawh ber loh chuan Pathian kan ti lawm zo tak tak ngai lovang. Ama Thu Bible-ah kan hmu a, kan zawm tur a ni a. Tin, Kohhran hi Krista taksa a nih angin Lalpa’n a ngai pawimawh thin a, Kohhran leh a hnuaia kan tel vena Fellowship Organisation thu te hi Krista Thu an ni a, kan ngai pawimawh tur a ni tih kan hriat nawn fo a pawimawh em em a ni. Kan nitin nunah Krista leh a Kohhrante duh dan dah lalin zawm thiam ila, Pathian Chungnung Ber kan tilawm thin dawn a ni