SHARING TAWI
Tv. H.Lalrinawma
Phurrit a bo ta Kalvari ah, A va ropui em ti r’u?
Thiandun in hah takin thing an pu a, khamah an lawnpui ta a, an chau em em a. Tlang chhip lawn chhuah an nghakhlel tak zet a ni. A chhan chu an chawl thei tawh dawn a ni. An vanneih viau phei chuan an thian tu emaw a lo chhuk anga a lo put sak dawn a ni. Vanneihna chunga vanneih leh chhawnna ni turin an thian zingah pawh a chak ber ber mai lo kalin an koki atang chuan an thingput rit tak mai chu an chhawk ta a, an van lawm teh lul em. Lo ngawi lawk, an thingput kha khawnge a awm tak? Dawi hmanga ‘dawi bo’ a ni ta em? ‘Ni lo’. Khamah an paih ta daih em ni? ‘Ni lo’. Ni se chuan lawmthu hrilh chu khawi lamah, an in hau viau emaw a ni ngei ang. A nih chuan engtin? Midang, an thiante koki-ah a awm ve thung a ni. Hei hi lawmna chu a ni. An thiante khan an thilput kha dawi bo emaw khamah paih ta ringawt se, a lawmawm dan a famkim awm lo e. An koki atanga an lak a, anmahni koki a an dah chiah khan an chhawk-a te tan a lawmawm em em a, lawmthu sawi chiah an ba tiin kan hrethiam mai awm e.
Hei hi a ni ropui chu. Kalvari Kross-ah khan kan phur rit kha nuai bo a ni a, phurrit phurh tur kha awm lo hrim hrimin Isua ngei pawh khan phurh tur nei ta lo se chuan chutia lawmthu han hrilh rengna tur a awm kher awm lo e. Mahse, hei hi alo ni, Lal Isua khan i phur leh ka phur kha min lo chhawk ta a, mi zawng zawng phur kha a lo chhawk tak vek avangin rit ti em em in a thihpui reng a ni. Chumi a nih avang tak chuan Lal Isua a lawm tur hliah hliah kan lo ni ta a. Vawi khat a lawm tlak mai nilo in kan dam a kan thawk chhung chu Isua ah kan lawm tawh mai dawn a ni. “Phurrit a bo ta Kalvari ah” kan tih hian, a bo daih anga kan hriat thiam chuan Isua ngei pawn put/phurh tur a nei dawn lo niin a lang a, a nih chuan kan lawmna level kha a hniam thei tlat. “Phurritte Isua ah ka nghat a, kei chu ka zalen ta mahse, ka phurrit min phurh sak reng tu Lal Isua ah ka van lawm em” tiin lawmna tawp mai lo neih nana a tangkai a ka hriat avangin ka lo ziak chhuak ve mai a ni e.
Ka thlarau zawkin le (Zakaria 4:6)
He thu hi kan hre larin a ropui kan ti tlang ngei mai ti rawh u? Mahse, a awmze ril zawk ni a ka hriat ka han ziak ve leh a ni. Entirnan, ‘Saw lai thing saw chempuiin va sat rawh’ kan tih chuan a tirtu khan tu emaw kha chempui hmanga thing sat turin kan ti a; Chem, amah maia engmah ti theilo kha mihring kan hmantir a kan duh kan tih tir ta a ni. ‘Ka thlarau zawkin le’ tih a ‘zawkin’ hi a chunga kan entirna hman ‘chemin’ tih thluka kan thluk chuan Lalpa thlarau kha ‘hmanrua’ amaha engmah ti thei lo, mihringtu emaw in pe deuhin a, a control (hman) tur ni a, a lan avangin mihring zawn a inpek vak lam (a chhe ta der e tihna lam nilo in) a kawk thei tlat a hriatna ka nei a ni. A sawi tum hi inang viau mahse a danglam em avangin sawi a tulin ka hria. ‘Aman engkim ah min hria e’ tih a ‘Aman’ thluk hniam hian ‘Chempuiin’ tiin a chung ami khi han chhiar la a danglamna i hmu ang. Kan thluk hniam chuan ‘chempui’ khi thil nung a ni a, amahin a va sat dawn a ni. ‘Ka thlarau zawkin le’ tih a ‘zawkin’ khi thluk phei/sang lovin han thluk hniam teh, ‘Lalpa Thlarau’ hi thil nung, hmanrua mai mai ni lo, amah a engkim ‘Ti tu’ tur anih zia i man mai ang. Mizo Kristian te hian inpekna kan ngaisang em em a, a dik e, mahse kan inpek vanga Thlarau Thianghlim hnathawh kan hmuh viau hi chuan ‘Mihring’ hian lansarh leh ropui hi a lo tum ve thin a, hei hi mi zawng zawng tlukna hmawr pawh niin a lang, Setana ngei pawh kha! Mahse, Lalpa thlarau hi full power neitu a ni tih hriatthiamna zawk atanga kan in hawn chuan a dan a dang. Tu emaw inpe deuhin Thlarau Thianghlim control vel nilo in, tu emaw inpe deuh kha thlarau in a hman a, amah kaltlanga midang hnena malsawmna a thlen chuan ‘chapo pui’ tur emaw a awm lo mai nilo in ‘Thlarau Hmanrua’ anih ve avanga ‘lawmna nasa tak’ a thinlung ah a awm zawk a ni. A saptawng chuan ‘… by my Spirit’ tih a hmang a, ‘.. in my Spirit’ a ti tlat lo a ni.