I THU ANG ZELA A AWM DAN VENG THA IN
Sam 119:9 “Tleirawlin engtin nge a awm dan a tih thianghlim ang? I thu ang zela a awm dan veng thain” He lai thu hi thu lar tak a ni awm e. He khawvel hmawr tawh takah kan cheng a. Ringtute hian kan nat loh nan leh kan in tihlungngaih lohnan Pathian hian a thu hmang hian min hual vel a ni. Amah ang tur leh a venhim theih tura kan awm theihnan. Tin, he khawvel dan anga kan awm hi Pathian duh zawng a ni lo, danglam tura tih kan ni. Engtinnge kan danglam ang Pathian thu ang zelin. Chumi tana thil tih tur tha ni a kan hriatte i lo tarlang dawn ta ila.
1. Pathian lehkhabu chhiar: Bible chhiar thin hi thil tha tak, ringtute phei chuan kan tih ngei ngei tur a ni awm e. Mizote hi kan vannei a, Sermon leh Pathian thu KNP atangin kan zir a kan hria a, a tlangpui deuh chuan mi ak rual a ak ve thei tawk chuan kan hre em em vek awm e. Amaherawhchu, kan chhiar ngei anih loh avang hian kan hriat dan hi a chiang tawk lo deuh thin. Thawnthu hriat deuh hian kan hre deuh rauh a. A ziak ngei mahni a hriat ngei tum hi a lo tha tlangpui a ni. Kristian kan nih anga kan nun dan tur leh kan Pathian duh zawng leh lawm zawng inziahna bu hi chu mahni ngei hian kan chhiar ve a kan belhchian ve hi chu a hun ta khawp mai. Thusawitu in a sawi tih ringawt loh deuh a Pathian thu hriatna lama kan thanharh hi chu a hun tawh a ni. Tun kum pehi chu MTKP lam atangin Bible chhiarchhuah lawmman a awm dawn leh nghal kha i tang sauh sauh ang u.
2. Tawngtai: Tawngtai hi chi tam tak a awm thei awm e. Lawmthu sawi tawngtai, thildil tawngtai leh adangte. Tin, Kohhran ang pawhin zing tawngtai leh Inrinni tawngtaite pawh a awm bawk, TKP te pawn chawlhni zanah kan tawngtai ho thin bawk. Chumai bakah ringtu, Krista zuitu inti chuan mahni bila tawngtaina nei thin vek tura ngaih kan ni. Tawngtai mite phei chuan kal chungin an rilru in, an Pathian hi an lo be mawlh mawlh thin bawk a ni. Engvangin nge tawngtai hi a that em em kan tih chuan Pathian hnena kan chhia a tha kan hrilhna thin a nih vangin. In ti thlarau deuh tlata kan hriatna te pawh hi thalaite hian kan bansan a kan tih tur a ni tih kan pawm tlan ve pawh hi a tul ve khawp mai. Mahni Pathian hnena tawngtai ngailo nih hi chu, a zahthlakna chin pawh a awm ve a ni. A lang pawn kan ti ang, a ruk pawn kan tawngtai ve bawk ang chu. Pathian biak hlau viau ang hrima tawngtai tlem hi a tha lo e.
3. Pathian fak leh chawimawi: Ringtu chuan a Pathian hi khawvel mithmuh a ni emaw ni lo emaw a chawimawi tur a ni. Tin, a ka atangin Pathian fakna leh that zia chu a ri chhuak fo tur a ni. Fak tlak leh chawimawi tlak a ni tih a hrechiang tawh tu chaun, a peih emaw peih lo emaw, a fak mai thin. Thinlunga khat liam chu ka in a sawi chhuak thin.(Matthaia 12:34) Pathian thatzia leh chawimawi tlak a nih zia hi i ka atangin a chhuak tha thei lo a nih chuan mahni in enfiah i ngai ve hle a lo ni ang.
4. Thu tak nunpui: A harsa ber awm e. Pathian thu hi sawi liam puat hi chu a awl viau a. A nunpui hi a harsa leh si thin. Chuvangin, Pathian thu hi a tha lo a mi. Tha e. Amaherawhchu, sual lam awn reng kan nih vang hian harsa kan ti thin a ni. Mi in Lal Isua a hmangaih tlat tawh chuan, harsa ti tak chungin zawm a tum a. Vawihnih, vawi nga emaw pawh zawm thei lo in lungngai takin awm mahse puitu(thlarau thianghlim) a neih tlat avangin a tawpah chuan ropui takina hneh leh nge nge thin. Kristian nih chuan mi tumruh tak nih ve te pawh a ngai tel thin. Kristian in Lal Isua a hmangaihna a lantir ve theihna ber a nih avangin lawmna in a lo khat thin.
I tum ve phawt ang u, chuan min puitu chu a lokal mai ang. Tanpuitu (Thlarau Thianghlim) chuan tanpuitur a zawng ruai thin a ni. “A lama rilru dik tak pu tute chunga a chakzia tilang turin khawvel zawng zawngah Lalpa mit chu a leng ruai ruai thin a ni.” II Chronicle 16:9.