I DINTHAR LEH ANG U
Rbt. K.Zodinsanga
President, TKP Serkawn Unit
Kum hlui, 2019 a thil te chu engmah a thleng nawn tawh ngailo turin hunin a liampui ta. Kan mimal nunah te, kan chhungkuaah te, khawtlang leh kan ram thleng pawhin duh khawp lohna leh siamthat theih nise chuan tihdanglam atana duh tam tak kan neiin a rinawm. Mahse, hun leh engkim siamtu Pathianin hun hmangin a zial fel tawh a, mihringten tih theih kan nei tawhlo a ni. Pi Lalsangzuali Sailo(fam) hla in a sawi angin kan thil tih zawng zawngte chuan Lalpa hmaa kan dinpui turin Chatuan hmun min lo thlen khalh tawh a ni.
Vawiin ah hian keini ringtute, Kohhran mite hian beiseina thar nen hlim taka kum thar kan rah mek lai leh Pathian hnena lawmthu kan sawi lai hian kan ram leh kan khawtlang kan thlir chuan rilru kap tlattu lian tak mai a awm reng mai. Kan ram leh khawtlang nun hi Pathian duhloh zawng tak maiin a tlu chhe mek a, a rah kan seng mek a ni tih mit ngeiin kan hmu a, Pulpit atangin kan hruaituten an sawi mawlh mawlh mai bawk a. Kan ram hi a damlo a, tihdam a ngaiin veitu leh thawktu a mamawh em em tih kan inhrilh mawlh mawlh a ni. He kan ram dam lehna tur hian tute nge mawhphur ta le. Nehemia 1:4-a kan hmuh angin Nehemia chuan Jerusalem chanchin a zawt a, chumi rama awmte chu chan chhe tak leh sawichhiatin an awm a, Jerusalem kulh te chu a chim rem rum tawh a, a kawngkharte pawh a kang tih an hrilh khan Nehemia chu a thu chawt a, a tap a, ni engemawzat chaw a nghei a Van Pathian hmaah a tawngtai a ni.
Keini pawh hi han inbih chiang ta ila, kan ram hi sawichhiat in a awm mek a ni lawm ni. Kan rama hripui lo lut leh darh mek hi Ringlo mi ni a kan hmuh te meuh pawhin min vei tawh a, tihrem dan tur zawn tumin min luh chilh rup rup tawh a nih hi. Hetih lai hian Keini ringtu Kohhrante hi ngawi mai mai thei kan ni bik dawn em ni. Sakhaw dang bia phei chuan min va han nuihzat dawn em. Keimahni hian kan vei a, kan thawh chhuah a ngai a ni.
Kan ram innghahna ber kan kulhpui, thalaite ber mai ruihhlo leh hri thalo takin min man a, min ti chhe mek a, nitin mai kan ral zawih zawih mai a ni. Kan ram leh hnam innghahna ber hi kan chim rem rum mai a ni lawm ni. A chhunga cheng nunau leh tar te hian an inphenna tur ber hetianga kan ral zel chuan kan khawtlang leh Kohhran thleng mai hian a la tuar ngei dawn a ni. He hripui kan ram tuam mektu hi a tuar nasa ber tu chu thalai, hnathawk thei leh ramin a mamawh lai mek kan ni leh zel si a. Heting zela kan kal chuan ngaihtuah thui ngam pawh a ni ta lo.
Engtin nge kan tih zel ang le? Kan khawtlang leh kan ram kan vei a, nasa takin kan thiam ang angin kan bei a. Sorkar leh NGO te Kohhran te kan hmachhuan a theih tawpin an bei thin a. Amaherawhchu, a sawt mawh tawh em em a ni. Pawn lamah YMA committee hall-a in zilh te, khawdai ah Center leh Jail hmunah te hian a sawtna te chu awm ve bawk mahse a nih tur ang ang a ni zo tawh a, a harsa in a sak tawh thin. Heng ang ho zawng zawng hi chu engkim a thlen zawh tawh hnu a kan pan thin a ni. Hlawhtlinna hmu tur chuan a sak fat tawh thin.
Kan ram siamtha tur leh tihdamna tur pawimawh ber leh a hmasa ber tur chu, kan CHHUNGKUA atangin a ni. A nih nih ni zo tawh leh siamthat theih tawh loh tam tak awm mahse, kan chhiat zual zel lohna turin chhungkaw tin ten chhungkaw maicham atanga tawngtaina nen bul tan hi a sawtin a tlo ber bawk a ni. Chhungkaw maicham kan lo nei ngailo a nih chuan din thar ila, hei aia ngaihpawimawh hmasak tur thil hi a awm lo. Pathianin kum thar min rah tir a, mahse, tih tur hmachhawp lian tak erawh kan nei, he kan ram Kristian ram hi ringlo mite hriatah kan mualpho mek a, sawichhiat kan ni mek tih hi theihnghilh lovang u. Lalpa nen midangte kutah dah lovin, keimah theuhin mahni atangin tan ila, chhungkua ah Tawngtaina nen Lalpa min pek kan ram leh hnam tlu chhe mek hi i Dinthar leh ang u.
“Ka hmingpu ka mite chuan inngaitlawma an tawngtaia, mi zawna, an awm dan sualte an hawisan chuan, van atangin ka lo ngaithla ang a, an sualte ka ngaidam ang a, an ram chu ka tidam leh ang”
II Chronicles 7:14