Nun Krista
Upa Dr.L.H.Lalrammawia
“Kei atân zawng nun hi Krista a ni si a” Philipi 1:21
Kum 2020 kan lo chuangkai ta, Pathian min hruaitu chu fakin awm se la, Kohhran member zawng zawngte kum thar chibai ka buk a che u. 2020-ah hian kan thupui chu “Nun Krista” tih hi lo ni rawh se.
Tirhkoh Paul-a chuan, “Mi zawng zawng thih aiin mi pakhat a thi a; chuvangin, mi zawng zawng chu an thi a ni; tin, a nungte chu anmahni tan an nun tawh lohva, an thih aia thia tholeha tan chuan an nun tawh zawkna turin a ni mi zawng zawng thih aiin a thih ni” a ti a (II Kor 5:14-15). Tin, Lal Isuan, “Nangnin mi thlang lo, keiman ka thlang zawk che u a, va rah tur leh in rah awm reng turin ka ruat bawk a che u;” a ti a (Johana 15:16). Thlangtu leh ruattu chu Lal Isua a ni.
Tichuan, Lal Isuan amah ringtute leh zuitute nihna a thehkhin kawng hnih hi i hre thar leh ang u.
1. Lei chi in ni e (Matthaia 5:13): Chi nen a tehkhin. Chi chu thil hanna nei lo leh tui lo ti tuitu, tihangtu a ni a. Thil bawlhhlawh tithianghlimtu, natna hrikte tihlumtu a ni a. Heng bak pawh tangkaina a la nei. Chi a nihna ang taka thawk tur erawh chuan a tuiral a ngai a, “Nun Krista” a neitute hi midangte tan an alna pe chhuak turin an tuiral thin a. An alna an sawr chhuak thin. Lal Isua zui chu mahni ralna hmun a ni.
2. Khawvel êng in ni e (Matthaia 5:14-16): Lal Isuan amah zuitute chu khawnvar (candle-mawmbati) a vel tiêng tura chhit ên nen a tehkhin bawk. Lal Isuan amah ringtute chu he khawvelah hian midang tan khawnvar anga inchhi êng turin min duh. Khawnvar (candle-mawmbati) chu ênna pe chhuak tura a inchhit hian a ngaiin a awm reng thei lo, a ral tial tial thin. A ral nasat leh a tawi poh leh a lo eng zual thin. ‘Nun Krista’ titu chu a nuna Lal Isua êng a ên chhuah nasat poh leh amah a ral nasa thin. Engah chuan miin thil tha leh tha lote, thil awmna te, kawng te, hlauhawm leh hlauhawm lohte a hmufiah thin ang hian Lal Isua êngah chuan thil a lo langfiah thin.
Tichuan, chiin kan chhungril nun a fana a hnen thin ang leh êngin thil a tifiah thin a, a tinuam thin ang hian kumin 2020 kum tharah Lal Isua mahni nun theuhah i lan chhuah tir ang u. Lei chi leh khawvel êng kan ni si a. Amen