MI ROPUI ISUA NGE, I THIANPA ISUA!
Vanlalnghaka Hnamte
Luka 19:1-10. Tin, Isuan Zakaia chung thu a sawi a, “Vawiinah he inah hian chhandamna a lo thleng ta, ani pawh Abrahama fapa a ni si a.”
Zakaia chanchin hi sermon-ah pawh kan ngaihthlak zin pawl tak a ni awm e. Bible-a kan hmuh dan chuan Zakaia hi chhiahkhawn hotu a ni a, mi hausa tak a ni. Zakaia hian Isua chanchin leh a thil mak tih hi a hriain a ngaisang em em a ni. Tin, Isua zirtirna pawh hi a hre ve nual in a rinawm tlat a ni. Mi fing tak leh sum siam thiam tak a nih hmel a. Khang hunlaia miten an huat rawn khawp a sum ngaina leh sum hlutna hria kha a ni ve a ni. Rome sawrkar hnuaia thawk, a chipuiten hnam phatsantu tia an koh pawh pawisa zo lo a, sum um ve ngat kha a ni tih lo hre ta ila.
Mahse, Zakaia ngaihsan kha a hunlaia sum ngah lemlo rawngbawltu Isua a ni ve tlat mai a ni. A tawi avanga a hmuh theih loh hnu pawh khan a beidawng mai lo a, a va tlan leh khalh a theipui kungah a va lawn ta a nih kha. Zakaia khan miten an sawi huai huai leh Jerusalem khua a mite titi vawrhna ber (Tunlai Zoram khawvel chu ni se Icon emaw Idol emaw kan ti ngei ang) Isua kha miten an sawi ringawt kha a duh tawk tlat lo a. Hmuh ve ngei ngei kha a tum tlat mai a ni. Mi ropui Messia a ni thei mai angem? Miten an tih kha. Ama mimal rin thuin, A ni ang! emaw A ni lo ang emaw ti kual a, sawi ringawt loin hmuh ngei ngei a tum a, a hmu ta bawk a ni.
Tunlai kan Zoram Kristian nunin kan mamawh em em mai chu Zakaia ang hi a ni. Zakaia khan sawi mai ni lo in a thil duh kha a chetzia in a tilang a ni. Amah hi a tawi vang hian kan nuih te hi a ti za fo a. Mahse, a tum hi a chiang em em a ni. Chu chu Isua hmuh a, tunge a ni tih hriat hi a ni. Mi ka a sawi ringawt kha duh tawk ve lo, a mit ngei a hmuh a duh tlat mai a ni. Zakaia hian a mi ngaihsan, a hmuh chak em em kha a hre chianga huaisen takin a pan ngam a ni. Zakaia hian Isua chanchin a hriat ringawt kha duh tawkin emaw, ka tawi sia ka hmu thei lo ani tiin chhuanlam siam se, chhandamna a chang lo ang. Mahse, hmuh a duh a, A thil tumah a chiang a a bawhzui nghal bawk a ni. Isua a hmuh chinah chuan nun danglam a lo nei ta. Isua nen an lo inhmel hriat ta a ni. Zakaia hlep ruk ching khan a lo sim ta a. Mi boral tur khan chhandamna a lo hmu ta a ni.
Keini chu piangthar lo, vanram kai lo tura min han rinluhin kan thin a rim tlat bawk si. Piangthar han inti dawn ila, keimahni ngei pawhin kan in ngai ngam chiah bawk si lo. Mahni thiam in chantir nan midang sual te kawh tur kan zawng ruai thin niin ka lo hmu ve thin. Chhandamna kan duh a, kan zawng anih chuan rilru sakhat nei ren rawn chunga, Zakaia anga zawn hi a ngai niin a lang. Isua hi ralkhat atanga mite sawi hre ringawt lo in mahniin hmelhriat tum tur a ni. Isua hi i thianpa a ni nge? I hmelhriat loh mi ropui! tih i in zawt thar ang u.