HARSATNA, MANGANNA KARAH PATHIAN AU RAWH (SAM 118 : 5-9)
Tv.R.K.Rohmingliana
A hmasain, kan Lalpa Isua Krista hmingin chibai ka buk a che u. Kan sawi turah han lut nghal mai ila. Mitin mai hi kan hringnunah hian manganna, lungngaihna leh harsatnate kan tawk vek thin a. Kan fel em vangte, kan sual em vangte hian harsatna kan tawk bik a ni lo a. Lal Isua chuanna lawngah thlipui leh tuifawn a thleng a, a chuan ve lohna lawngah pawh thlipui leh tuifawn a thleng ve tho a ni. Kan nunah Lal Isua kan nei emaw, nei lo pawh ni ila harsatna hi mihring chuan kan tawk vek thin a ni. Kan thalai pui tam tak chung harsatna, lungngaihna avanga beidawng leh intihlum an va tam tawh tak em he khawlvelah hian! Mahse, ka thalaipui duh tak tunah hian nang chu ila damin ila nung a, beisei tur leh rinchhan tur Pathian ila nei asin.
He khawvelah hian nangmah chiahin harsatna i tawk lo a. Nangmah anga harsatna tawk leh beidawng tam tak he khawvelah hian an awm asin. Chung zingah chuan Pathian rinchhan chunga sual chhuaktu lo ni ve la ka duh asin. Exodus bung 3-ah khan Mosia chanchin kan hmu a. Hnimbuk alh atangin Pathianin Mosia chu a ko a. Chu hnimbuk alh chu harsatna manganna a ni. Harsatna leh lungngaihna kan tawh hian Pathian aw kan hre thin a ni. Tunah hian ka thalaipui duhtak, i lungngai a, i mangang a, i beidawng anih chuan Pathian aw ngaichang chungin Pathian rawn tam ang che.
Chutichuan, Pathianin a koh ang khan a rawn chhuahna Aigupta-ah let lehin saltangte chhanchhuak turin Pathianin a ko a. Mosia tan chuan a harsain a beidawnthlak hle ang, chhuan tur engmah a nei si lo a. Mahse, Mosia kha Pathian thu zawma Aigupta rama a kir leh khan, Pathianin thilmak tam takin a kaihruai a. A dinhmun hniam tak kha sang takah a hlang kai a, hruaitu ropui Mosia tia hriat hlawh a lo ni ta ni. I nunah harsatna, manganna leh lungngaihna eng pawh i chungah a lo thleng thei; chung harsatna hnuaia Pathian rinchhan chunga ke i pen tlat chuan Pathianin dinhmun sang takah a chawi sang ang che.
Josefa pawh Aigupta ram hruaitu ni tur khan a hmalam hunah chuan a unauten an hralh a, sal a ni a, taninah khung a ni bawk a. Mahse, chung harsatna chi hrang hrang a paltlang hnuah, Pathian a tih tlata Pathian a rin tlat avangin; Pathianin Aigupta ram hruaitu dinhmunah a hlangkai ta a ni. Harsatna, manganna leh lungngaihna i tawk anih pawhin beidawng mai lo la, Pathian chakna rinchhan chungin ke pen zel ang che.
Mi thenkhat chuan mahni insiam chawp harsatna kan tawk a. Ruihtheih thil, mipat hmeichhiatna leh sual dang dangah kan tlan a. A tirah chuan a nuam viau emaw, a hlimawm viau emaw kan ti a, hlim pawh kan hlim reng bawk a ni. Mahse, hun a lo kal zel a lungngaihna, beidawnna leh tahna min thlentu a lo ni leh si a. Chung harsatna atang chuan zalen kan duh a, mahse tihngaihna kan hre si lo. Mi tam tak chuan sual chhuah an huphurh thin a, mahse, Pathian nen chuan a theih a ni. I harsatna a len poh leh a hneh sak theitu Pathian ropuina a lang chiang a ni mai.
Davida pawh naupangte a ni a, a hmaa Goliatha hneh thei tur khan mihring lamah chuan chhuan tur a nei lo. Mahse, Lalpa a rin tlatna avangin a hneh thei ta a ni. Chutiang bawkin i nuna harsatna leh manganna i hneh theih loh kha a hneh theitu Isua i rin mai kha a tawk a ni. I chakna i rinchhan erawh chuan Goliatha anga tihtlawmin i awm ve dawn a ni. Lal Isua tan tih theih loh a awm lo a, Lazara thlana ni li lai phum tawh, miten tawih uih vek tawh tura an ngaih pawh a kaitho mai a ni.
A tawp berah chuan, Lal Isua i neih chuan i nunah harsatna leh manganna tawk mah la, Isuan nena tuar dun chu a thlanawm em em zawk a ni. Lungngaihna, manganna leh beidawnna karah pawh hlimna, lawmna leh beiseina i nei dawn a ni. Pathian chakna rinchhanin engkimah tawngtai la, i hneh zel dawn a ni. Indona chu Lalpa indona a ni a, hnehna chu Lalpa ta a ni.