PATHIAN FAK
Lalthanliana
Sam 117:1
Aw hnam tinrengte u, LALPA chu fak ula; Mi tinrengte u, Amah chu fak rawh u.
Sam 150:6
Engkim, thaw thei tawh phawt chuan LALPA chu fak rawh se. LALPA chu fak rawh u.
Sam ziaktu hian Pathian fak leh chawimawi a ngai pawimawh hle a. A ngaihtuahna tam ber luahtu a nih ngei a rinawm. Heti taka Pathian fak ngai pawimawhtu hian fakna hlut zia a hre chiang hle ang tih a hriat a. Pathian ropui zia hre chiangtu apiangin fak an chak a, a thlahlel thin a ni. Ringtute hian kan tih ngei tur leh buaipui ber tur pawh a ni. Pathian fakna chungchang kan sawi dawn a ni.
Pathian fak kan tih hian rilrua lo lang hmasa ber chu Pathian faka lam a ni ngei ang a. A dikna chen pawh a awm ang. Pathian fak hi ringtute’n kan tih ngei tur a ni. Chhandamna hlu tak kan neih avangin bang lova fak tur kan ni. Fakna tak nei tur chuan kan fak Pathian hriat chian a ngai a, hrechiang lo tan chuan fak a har hlein a rinawm.
Pathian fak tur hian huaisen a ngai a, dawihzep tan chuan thil harsa tak a ni. Fakna hi chhungril atanga chhuak a ni a, a hlu em em bawk a ni. Hman em avang leh zah theih loh avanga tih chiam theih pawh a ni lo. Pathian fak tak tak tur hian kan hausakna kan hmachhuan thei lo ang bawkin retheihna pawh chhuanlama hman a rem chuang lo. Thinlunga a thawh dan ang zela Pathian nen kan inzawmna a pawimawh ber.
Fakna tak tak nun nei turin tlawm a ngai a, chapo takin tumah a fak theih loh. Kan fak Pathian hi tlawm taka a mite tana inpe a nih ang bawkin chapo taka dawr a rem lo va, kan that vena hre tun chunga fak tum ve tlat chu a fuh ber lo vang. Pathian fakna hian kan tlawmna a entir a, ringtute tan hnehna ropui tak a ni.
Faktu thinlung chu lawmnain a tikhat a, malsawmnain a zui thin. Kan lo teh ve vak a ni thei a, kan teh thlawn mai maiin a rinawm. Pathian faktu nun hi pawn lam atanga teh vak chi a ni lo, kan hah thlawn mai mai. Faktu leh Pathian inkar a ni a, an inzawmna keini lo sawisak a tul lo ve. Khawvel ngaiha sual tak, khawtlang leh kohhran hial pawhin kan endawng an ni thei a, kan ngaihsan loh ve tak an ni thei. An dinhmun atanga kan tehsak ngawt a rem lo a ni.
Hla siamtu chuan “Lalpa chu fakin ka chawimawi ang, min tlantu a nih avangin” a lo ti a. A dik a ni. Kan that leh fel vang ni lovin min tlantu a nih avang zawkin theihtawpa kan fak a phu a. Kan that hun nghah kher pawh a tul awm lo ve. Sam ziaktu pawhin Pathian fak a ngaih pawimawh zia a sawi chamchi a, a chhungte nuihzat hial hlawh khawpin Pathian a lo fak tawh. Midang hmuh danah a innghat lo va, a fak Pathian chiah a thlir. Pathian malsawmna pawh tamtak a dawng a ni.
Kan Mizo hla phuahtute pawh hian chatuan khua a var huna bang lova kan fak tur thu an sawi nasa hle a. Kan hla phuahtute thlir dan hi Mizo nawlpuiin kan pawm dan pawh a nih ka ring a. He fakna kan sawi mek hi zai leh lam a ni ngei ang a. Kan mitthlaa chuang ber pawh a nih ka ring. Chuvangin Pathian faka lam hi a dah hniam ngawt a har a ni. Mahse, midang hmuh hniam nana hman erawh a fuh lo vang. Kan thinlung fakna sang ber a tih ang zela kan hlan hi a hlu hle a ni.
Thinlung taka Pathian fak tur hian hausak a ngai lo va, eng qualification mah a ngai lem lo. Thiamna sang tak neih a tul lo ang bawkin kan thiam lohna pawh hmantlak a ni a. Amah kan duhna a tawk em em a ni. Rethei tak chung pawhin a fak theih a. Dam lo leh chak lo, thihna kotlanga ding mek tan pawh Pathian fak hi a theih a. Kan vannei em em a, hun tha kan neih laia fak mai tur kan lo ni e.