ZION A NGHING THEI EM?
Zion tih ringawt hi Bible-ah hmun tam takah kan hmu a. A chang chuan Zion hi Jerusalem hlui (Temple awm lohna lam) Davida’n Lal in a sakna hmun tlang sang tak sawi nan te an hmang (II Samuel 5:6-10), a chang chuan Zion hi Israel ram pum/Israel mipuite sawi nan an hmang a (Sam 87:2), a thenah chuan Pathian rorelna hmun sawina atan an hmang, Mizo ten vanram kan tihna kha a ni. (Thupuan 14:1). Zion chu Pathian ramtiam sawi nan an hmang bawk. (Zionist movement)
Thuthlunghlui ah hian Zion kan hmuh hmasak berna chu II Samuel 5:7 Davida’n Zion kulh a lak thu kan hmu a ni. Jebus ho kulh Jerusalem-a awm a ni. Davida’n Zion kulh a lak hnu hian Jerusalem chu Judate khaw pawimawh tak a lo ni ta a ni. An Lal In (Royal Palace) an sa ta a, Lal fanu, fapa (nakina Lal turte) lo chhuahna/seilenna hmun a lo ni ta a ni. Solomona’n Temple a sak khan Zion hi awmze dang a lo nei leh ta a. Solomona’n Pathian tana a Temple sak kha Zion chhungah an rin lut ve leh ta a ni. (Sam 132:13) “Lalpa chuan Zion chu a thlang si a; A awmna atan a duh a.”
Thuthlungtharah ve thung hi chuan Pathian Lal ram (A hring hran ni lo in, thlarau) sawi nan an hmang deuh ber. I Petera 2:6 “Ngai teh u, Zionah chuan a kila lung pawimawh ber, thlan hlu tak ka rem a ni; Amah ringtu chu a mualpho lo vang, “Tah hian Zion kulh a lung pawimawh ber chu Isua Krista a nih thu chiang takin a sawi. Zion chu Pathian khawpui, Pathian rorelna, Pathian Lal ram nghet tak innghahna a ni. A lungphum pawimawh ber chu Isua Krista a nih thu min kawhhmuh ta a ni. Pathian hian a Lal ram rawn din nan a fapa Isua Krista a rawn hmang ta reng a ni. He Lalram nakina a ropuina nen, a tak tak a lo lang tur ah hi chuan lungngaihna, piansualna, intihnatna a awm tawh dawn lo a ni. Mihringte tina thintu sual hi awm lo a ni. (He Zion thlarau-a a awm tih kan hriat hi nakinah a takin (a full in) kan chang ang, tunah chuan a nawm zia kan hre ruai ruai chauh a ni).
Zion khawvel buaina: Tuna tisa-a kan hmuh Zion (Jerusalem emaw, Juda-te emaw, Israel Pathian hnam thlan emaw) hi chu a buai a ni. December 6, 2017 ah US President Trump an Israel khawpui atan Jerusalem an puan pawh khan UN Security Council chuan US an dem rawn luai luai a nih kha. Jerusalem chhak lam pang hi Palestinian state ten khawpuiah an puang ve bawk si nen an la buai nuai nuai reng mai a ni. He Jerusalem Zion tlang awmna, Pathian temple awmna hi thisen, indona rapthlak tak tak lo thlenna, Pathian mite ngei pawh zak tak leh lungngai taka an tlawmna alo ni tawh thin a ni (Pathian an duh loh vang chauh in a tlu thin Zion hi). Khawvel buaina, khawvel mit fukna a la ni ta reng mai a ni. Chutiang bawk chuan Krista lokal hma hi chuan keini Isua Krista ringtu (Pathian hrinte) pawh hi, kan thinlunga Pathian ram, Zion awm hi min tih chhiat sak tumin sual chuan a theih ang tawk tawk hian min bei ve reng mai a ni. Nimahsela, Isua hi i thinlungah Lal ber, Roreltu a i dah chhung chuan Pathian ram (Zion chu) i thinlungah tihnghehin a awm reng ang.
Thuthlunghluia Zion tih chhiata a awm thin na chhan chu, Pathian leh a thu pekte an tluksan thin vang a ni. Thuthlunghlui hi Thuthlung thar ringtute tan kan hlim thla a nih thin avangin (Rom 15:4) keini pawh kan thinglunga Pathian rorelna ram Zion hi, Sual hian a lo ti tluin, a lo tichhe ve der thei a ni. Israel faten an khawpui tluk chhiat leh ngheh chung changah an nun danin awmze thuk tak a nei ang khan, keini Thuthlung thar ringtute pawh hian keimahni a Pathian ram a ngheh leh ngheh lohah mawh kan phur a ni. Mite pawhin an ti, tih vang ringawt a i tih ve ringawt thinte hian i Zion a ti nghing thin em? tihte pawh ngaihtuah chian a tul em em a ni. Jerusalem-a Israel ten an Pathian biak kha hnam dang Pathian nen a in ang lo a ni. TKP member-te tunge kan chunga Lal (thutawpneitu) tih hi i ngaihtuah chiang fo vang u.