MI HAUSA LEH LAZARA
Upa R.Lalrosanga
Mi hausa leh Lazara thu hi Luka 16:19-31 ah kan hmu a. Lal Isua hian khawvel thil ringawt ngaihtuah lova Pathian duhzawng tih pawimawh zia a sawi thin chu Pharisaite hian an hua a ni. Van ram chanchin leh thlarau lam vaukhanna thu Lal Isua hian sawi a tum a ni.
Mi hausa pa hi a hming tarlan a ni lova. Kutdawh leh rethei, hming pawh nei lo zawk tura ngaih chu Lazara – Pathian tanpuia – tia hming a nei tlat zawk hi he thawnthu ngaithlatute tan chuan a mak khawp ang. Bible-ah hian mi retheite hian Pathian thinlung an luah tlat thu hi hmuh tur a tam a ni. Mi hausa pa hi in ropui tak nei niin he tehkhin thu-ah hian kan hmu a. Lazara chu a kawngkhar bulah nitin muttir ngai, mahni pawh insaseng thei lo a niin a lang. A tih theih tawk chu mi hausa pa ei bang nawi chang a thut chauh a ni.
Mi hausa pa incheina hi puan sen duk leh puan zai sin tak a ni. Chu chu mi hausa naran lo chin chauh neih theih khawpa thawmhnaw man to a ni a, Lazara erawh chu, a pan tuamna pawh nei zo lo a ni thung. Mi hausa pa chuan ni tin ruai ropui tak a theh reng a, eitur tui tinreng a tlachham lo. Khatih hun laia mi hausa ho ruai theh chuan kut lawngin sa an ei a, an kut mawm hruk hulna atan chhang an in chhawp thin. Sa mawm hruk faina chhang, an paih thin chu Lazara chan tawk a ni. Lazara a thih khan van ramah, Abrahama angchhungah thutna nuam takah a thu a, mi hausa pa erawh chu van ram pawh ni lo, Juda-ho rin danin mitthi khua (Hades)-ah a awm ta thung. Riltam tuihalin nitin ruai theh thin kha a awm ta a, Lazara erawh a hahchawl ta zawk a ni.
Lal Isua hian mi hausa leh hausakna hi a dem a ni lova, a sawi tum ber nia lang chu mi hausate hian Pathian tel lova khawsa thei anga an inngaihna, Pathian mamawh lo nun kha a dem zawk a ni. Mi hausa pa hremhmuna a awmna chhan ber kha chu mi retheite dinhmun leh harsatna a hrethiam lo leh a ngaihsak lo kha a ni. Abrahama fapa, khawvela malsawmna tinreng dawngtu nih ringawt kha a tawk lova, mi harsa zawk te dinhmun hrethiam a, ngaihsak kha ringtute awmdan tur a ni, tih zirtir a tum a ni.
Mi hausa pa kha hremhmunah chuan meialh tuarin, riltam leh tuihalin a awm a, tuisik far khat lek pawh a thlahlel em em a nih kha. Pathian duhdana kan nun loh chuan damchhung hausakna leh nawmna hi awmze nei lo a ni a, thlarau khawvela kutdawh dinhmuna min din tirtu a ni ang tih hi a hlauhawm hle a ni. He tehkhin thu atanga kan zir tur te chu –
a) Hremhmun hi tute phuahchawp emaw ni mai lovin Lal Isua ngeiin a sawi, thil awm tak tak a ni.
b) Hremhmun chu natna hmun a ni. Isua hian tum thum lai natna hmun a nih thu leh chu natna chu natna nasa tak anih thu a sawi (Luka 16:23-25). Bible hmun dang kan en chuan tah leh ha thialna hmun, lungngaihna leh tahna hmun a nih thu kan hmu.
c) Hremhmunah hian chhia leh tha hriatna a la awm reng dawn. Mahni inthiam lohna leh hrehawm tihna, na hriatna, hmuh theihna engkim a la awm dawn a ni.
d) Hremhmunah chuan simin awmzia a nei tawh lo. Inchhir a sawt tawh lo.
Tuna kan nundan hian kan thlarau chu khawiah nge a kal dawn tih a hril a. Chhinchhiahna mak, inlarna danglam pek kan ni dawn lova, Pathian Thu atang hian Pathian duhzawng kan hriat a, kan zawm mai hi hremhmun pumpelhna kawng awmchhun a ni. Mi hausa hian vawi thum lai Abrahama chu “Ka pa” tiin ko mah se, a dam lai khan amah nen inzawmna nung an nei miau si lova, awmzia a awm tawh lo. Kristian chhungkuaa piang, Kohhrana tel ve nih ringawt hian awmzia a nei thui lo vang, mahni mimal ngeia hriatna nunga Pathian hi he damchhung ngeia kan zawm loh chuan “he meialhah hian ka na em em a ni” kan ti ve hlauh ang e.