KRISTA HMANGAIHNA CHUAN MIN TIR LUI A NI.
“Nang hmututen an lawm zia hi,
Thuin an sawi thei lo;
Kan chhuan ber chu lo ni fo la,
Chatuan hmun thleng pawhin.”
“Krista hmangaihna chuan min tir lui a ni;heti hian kan ngaihtuah: Mi zawng zawng thih aiin mi pakhat a thi a, chuvangin mi zawng zawng chu an thi a ni; tin a nungte chu anmahni tan an nun tawh loh va,an thih aia thia tholeha tan chuan an nun tawh zawkna turin a ni, mi zawng zawng aiin a thih ni.” II Korinth 5:14-15.
Paula hi mi mak tak ni ve in ka hria. A pianthar hma ti ve mai ang. Juda sakhua (Dan hmanga) rawng a bawl sak lai atang tawh khan mi thahnemngai thei em em mi a ni. Stephan-a tih hlum lai pawh khan thuhretu a ni, a nih kha. Stephan-a man mai kha duh tawk loin Kristiante ti duh dah tur khan Damasca khaw lamah khan a la kal chhak chhak mai a ni. Tirhkohte 22:5. Paula hian Pathian tih lawm tum khan nasa takin a bei ve a ni. A tih lawm tuma kha a tiduhdah hrep mai a ni. Tirkohte 22:8. He Damasca khaw daiah hian nasa taka tih lawm a tuma nen khan an in hmelhriat ta a ni. Mak ve deuh chu Paula hi Isua a hmuh hma pawh hian Pathian lawm zawng anga awm tum mi a ni. (Kristian tihduhdah kha Pathian lawm zawng tak ni tura a hriat avangin) Chu chu Pathian hian a hmu chiang hle a. A hun taka Pathian hi a hnenah a in lar ta ni mai hian ka hria. Pathian hmangaihna zawnga, a lawm zawng tih tum char char te hnenah Lalpa chu a inthup rei ngai lo.
Paula hian Chanchintha a hrilh chhan hi a hre chiang em em mai a. Pathianin amah Paul-a a hmangaihna a hriat chian em avang in, chu Pathian hmangaihna chuan a awm hle hle tir thei thlawt lo a ni. Tin, Paula hian Pathian hmangaih hi a phu a inti thei thlawt lo a ni. “Hmanah sawichhetu leh tiduhdahtu leh sawisatu ni mah ila” I Timothea 1:12-13 ah chuan alo ti hial a ni. Engvangin mi sual apiang hian Pathianin a hmangaih tih an han hriat hian a lawm em em bik thin. A chhan chu, ngaihdam nasat apiang hi an lawm thin a ni. Pawisa ba rul thei lo tur theuh theuhah pawh cheng 100-ba ai chuan cheng nuai 1-ba ngaihdama awm a chu a lawm dawn lawm ni. Luka 7:42. Pathian hmangaih leh zual i duh chuan Pathian Thlarau thianghlim nena i nun i hman a ngai a ni. A ni chuan i sualte a hriattir ang che. Johana 16:8. Paula pawh hi a in hmu chiang em em a. Krista hmangaihna hi phu a inti hlawl lo a. Chuvang chuan Krista hmangaihna puan leh sawi hi a tih tur ve reng a ni hian a hre ta hliah hliah a ni. Nang leh kei hian Krista hmangaihna hi phu tawk kan in ti em le?
Nang leh kei hian engnge kan tih tur ni ve ang. Chanchintha chu kan hril mai dawn lawm ni! Hre miah lo te hnenah pawh kan hril ang. Hre tawh sa reng te hnenah pawh kan hril ang chu. Ka ti ve mai mai thin thu ka sawi thiam lo kan tih thin pawh hi, kan rilru a thu kan sawi tum dan hi a dik chiah loh maw ni aw! Zawlnei tu emaw, ram chung chang thu a chhiatna lo thleng tur emaw sawi tura tirh kan nih loh hi. Chanchin ropui ber Pathian thiltih ropui (Krista thisena min tlanna), a aia ropui leh chuang awm tawh lo kan tana min tihsak chanchin hril tur hian ringtute hi tirh kan ni si a. Chu Chanchintha chu a mawl thei ang berin Pathian hian kan rin/pawm mai turin min rawn chhawp chhuah sakin ka hria. Amaherawhchu, kei ngei pawh hian a chang chuan ka sawi buai vekte hian ka hre thin. Chu Kraws thu chu i phak ang tawka hril ve hi Pathian hian a phut ve tlat a ni. I thiam leh thiam loh Pathian hian a sawi lo a. I phak ang tawkin tawkin nangmah hmangaihtu chanchin hi i sawi ve thei em em a ni? Krista hmutute hian Pathian min hmangaihna titi a neihte, a chanchin sawite hi kan tih tur leh tih makmawh a ni.