THIL SIAMTE HNENA CHANCHIN THA HRIL
“Khawvel zawng zawngah kal ula, thil siam zawng zawng hnenah chuan Chanchin Tha hi hril rawh u,” Marka 16:15
Isua vana hruai a nih dawn khan he thu pawimawh tak mai hi a zirtir sawm leh pakhatte hnenah a sawi a. ‘Thil siam’ han tih hian tam takin kan ngaih thelh fo chu mihringte chauh sawina amaw kan ti thin. Han ti ve ngial ila sap tawng Bible version hrang hrangah hian ‘creation’ tih deuh vekin a ziak a. Chuti anih chuan thil siam tih chuan, mihringte chauh min huam ta lo phawt tih a lang chiang reng a ni.
Genesis bung khatna leh bung hnihna kan chhiar chuan Pathianin thil chi hrang hrang a siam thu kan hmu a. Tin, ngun taka kan bih chuan “Tha a ti em em a,” tih a dah tel kher bawk a. Pathianin mihring a siam khan mawhphurhna pawimawh tak a kovah a nghat nghal bawk tih kan hmu a. Chu mawhphurhna chu, Eden huana duh taka a thil siamte enkawl leh veng turin a ni. (Gen. 2:15) Heta chiang taka lo lang ta chu, Lal Isuan mihringte kovah hian mawhphurhna pawimawh tak mai a nghat a. Kan mihringpuite hmangaih mai bakah, duat leh duh taka a siam, thil siam dangte hi hmangaiha, duat taka engkawl turin min duh tihna a ni.
Nitin maiin chanchinbu-ah te, TV-news lamah te leh Social media lamah te pawh aniang, khawvel lum chak zia tawh thu te, ramngaw chereu chak tawh zia thu te, ramsa/rannung mang mai thei an tam tawhzia thu te, kan lei tuam tu boruak that tawh loh avanga natna awm theihna (chance) sanzia thu te, mihringin kan siam chawp boruak chhia avanga boruak bawlhhlawhzia thu te leh environment lam kaihnawih chanchin lungchhiatthlak tak tak ngaihthlak leh chhiar tur a tam tawh ziate hi. Mihringte hian he khawvel lo hi chenna tur khawvel dang kan nei lova. Chu kan chenna hmuna min hual veltu thil chi hrang hrangte, duat tak leh dimdawi taka enkawl hi, Pathianin Eden huana Adama mawhphurhna a pek atanga, vawiin ni thleng hian a la danglam lo tih hi kan hriat a tha hle. Chumi kawnga ke pen pawh chu a Pathian thu em em a ni tih kan hriat a tha bawk.
Thil siam dang zawng zawng aia mihringte kan chungnun bikzia kan hria a. Pathianin kan nihna ropui tak min din hi “Ka thei tak e,” tia thilsiam dangte chunga hlei len nana hman hi min siam chhan a ni lo tih hi kan hriat a tha hle mai. Isua Krista zuitute hian Amah (Isua) kan hmangaih letna kan lan tirna pawimawh tak hi point thumin then ta ila. Hetiangin, (i) A thupekte kan zawmin (ii) Kan mihring puite lakah kan hmangaihna kan lan tirin (iii) Thilsiam dangte chungah ngilneihna kan lan tirin. Point khatna leh point hnihna hi zawm tha viau mah ila, point thumna hi kan hlamchhiah chuan a famkim bik dawn lo a ni tih hi kan hriat a tha hle mai. Ringtute hian Bible-ah chauh ni lovin a thil siamah te hian Pathian ropuizia hi hmuthiam ila kan va hmangaih zual nasa dawn em!
(He article hi MTKP inkhawmpui lo awm tura kan bial agenda “MTKP hian environment humhalh kawngah hma la rawh se” tih puala ziak a ni e.)