HARSATNA LEH FIAHNA
Upa R.Lalrosanga
Kan lo pianthar hian Kohhrana in hmang a, rawngbawlna engemaw tala tel ve turin kan infuihna a ni fo thin a. Hei hi thil pawimawh tak a ni a; amaherawhchu ‘rawngbawl’ kan intih dan te, Pathianin eng atan nge min hman a tum, tih te hi chiang leh zuala kan ngaihtuah hi a pawimawh khawp mai. Khawvelah hian Pathianin mi tam tak a siam a, thiam zawng leh theih zawng in ang lo, tlakchham pawh in ang lo te kan nih avang hian eng ber hi nge Pathian tana kan tangkai ve theihna tur hi ngun taka ngaihtuah a, kan ‘training’ hmasak phawt hi a pawimawh em em a ni.
Bible kan en chuan Pathian mi hman ho hian harsatna namen lo an lo paltlang nasa hle mai tih kan hre awm e. Nova khan lawng tuk tura thu a hmuh atanga kum 120 hnu-ah chauh tui kha a let a. Kha kum 120 kha Nova tan chuan a rei ngawt ang. Abrahama pawh fapa tiam anih atanga kum 25 hnu-ah fapa chu pek a nih chauh kha. Josefa pawh kha a u te’n an hralh atanga Aigupta ram roreltu pawimawh anih inkar kha kum 14 zet a ni tih kan hmu bawk a. Joba pawh kha kum 70 zet a tuar hnu-ah malsawmna a dawng anih kha. Mosia pawh thlalerah Pathianin kum 40 a training tir hnu-ah Pathianin a hna tak a thawh tir chauh anih kha. Davida pawh hriak thih anih atanga kum 15 dawn lai a ral hnu-ah chauh lalah a thu tih kan hmu bawk. Sam 66:10-12 ah chuan heti hian kan hmu “Aw Pathian, nangin min fiah a; Tangkaraw fiahin angin min fiah a. Nangnin lenah min hruai lut a; Kan kawngah hian phur rit tak i nghat a. Mihringte chu tawlailir chunga chuangin, kan lu chungah i kaltir a; Mei leh tui kan kal tlang a; Nimahsela, hmun chenghnawng taka lut turin min hruai chhuak a ni.” Tirhkoh Paula pawh Arabia ramah kum thum a training a, Lal Isua meuh pawh kha rawng a bawl tan hma in thlalerah ni 40 a training tih kan hmuh bawk kha.
A lehlam lo en leh ta ila. Lal Saula kha chhungkaw hausa sa atangin lal a rawn ni a, harsatna leh fiahna tak tak a pal tlang lova, chiang kuang leh bul fuk taka Pathian hriatna a neih miau loh avangin ‘lal hlawhchham’ a ni tlat. Chutiang bawkin Solomona pawh kha lal fapa, harsatna leh fiahna pal tlang lo a ni a, a hun tawp lam kan en chuan ‘lal hlawhchham’ a ni leh tho.
Heng entirna atanga lo lang chiang em em chu harsatna leh fiahna, nun sawpna tak tak atangin Pathian hi kan lo hrechiang nge nge a, chumi atang chuan Pathian tan tangkai leh sâwt zawkin rawng a lo bawl theih chauh zawk a lo ni. Pathianin a rawngbawl turin a ko che a ni mai thei e. Chumi avang ringawt chuan rawngbawl hna chu i tan nghal ngawt tura i inngaih chuan, i tifuh kher lovang. Hun engemaw chen Pathiana insawh nghet a, harsatna leh fiahna engemaw zat paltlang lova rawngbawl i tum anih chuan Saula leh Solomona ang mai hian i hlawhchham hlauh palh ang e. Sipai, ral kap thei tur chuan inchhir rum rum khawpa harsa leh fiahna training an paltlang thin tih hi i hre reng ang u. Thlarauva rawngbawl tak tak tur chuan hun rei fe chu mi hriatpui loh va, hui pap pap khawpa Pathian i auh va, Pathian hian min hawisan ta a ni ang a, ti a zan mut that loh fo te i pal tlang a ngai mai thei. Miin i awmdan an hriat thiam loh chang a awm fo ang a; a thenin an thik mai thei bawk che a; thenkhatin an beng hniam ang che a, ngaih thah nih pawh i hlawh bawk ang. Chung ang harsatna leh fiahna chu Pathian hmaa inngaitlawm leh Amah ring tlat chunga i pal tlang hunah chuan Davida angin thlarau chenchilhin malsawmna nen a rawng i bawl tak tak thei tawh ang.