KAN JUNIPER VE LAI
(A lo rei ve ta êm a ni!)
Upa Lalrinmawia
Juniper-in kum 34 a lo pumhlum ve dâwn ta reng mai. Chumi azârah Juniper kan chaih ve hun lai experience-te leh a behbâwm sawina hun remchâng ka nei hi ka lâwm hle. Keini hun ve chu a bul tan lai, 1987- ‘97 kha a ni. Thil a danglam tawhzia hriat ve nân pawh eng engemaw ka’n sawi ang e.
1. Ramzotlâng nên kan la infin vek chungin copy 220-in min daih vek. Agent 16-ten an sem belhkhâwm chu 212/c a ni. Mihring leh chhûngkua kan lo la tlêm tûrzia i hre thei mai ang.
2. 1987 khân Editorial Board zingah Dr.Lâwmtea leh kei chiah a hminga Rbt. kan ni a. 1987-’97 chhûngin mi 31 emaw Board member-ah kan awm hman a. Chûng zinga 14 chu Upa, Rawngbawltu 5 ; Agent hmasa berte zinga mi pawh Kohhran Upa kan nei ta. Juniper hi Kohhran hruaitu chherna ‘pûm’ a lo nih ngawt hi le! tihte ka ngaihtuah rum rum.
3. Chhûngkaw thilah chhangchhiat lai, Sângi pian hma deuh, Boys’ Hostel warden ni chunga article/sermon fahrah tê tê kâr tin buaipui ngai bawk si, tûn lai tawng takin buai ve ‘det’ châng a awm thin. He article erawh hi chu, an lo hmet chingpen palh ang tih hlauva mahni tute (grand sons) mitmei reng paha ziak a ni ta thung a, a hahthlâk dân a nuam phian.
4. Zo phêk chhiara phêk 1 lek ni mah se Sunday apianga chhuah tûr chuan tan mar ngai ve tak a ni. Typewriter-a stencil cut, duplicating machine-a her chhuah, delete leh mai mai theih loh, chhut sual awih loh a ni. A chhiartu tûr kan Upa te – R.T. Bawia, C.S. Zâwna, K.L.Vân Ngaia, V.L. Ngêna leh mi dang tam tak, eng mah ti mai mai ve ngai lote mitthlâa hmu ru reng chungin ziak zawm tûr leh zawm loh tûr kan han risk a, phêk 1 lek si hi India leh Bangla TV Programme tâwp rak rak thlenga chaih awl tak a ni. Computer kan la hre lo va, ‘khâwl thluak nei’, engkim hre thei tûrah kan ngai mai. Chutiangte chu awm ve tawh ni se ziaawm deuh tûr!
5. Board member-te tlar dul thin mah ila uire dêng hlum tûr ang maia relhrûk duak hun a awm thin; chutiangah pawh Pu PC Rova leh Tv.R.Mawia te hi Juniper awi nungtu ka ti lo thei lo. Hmanhmawh lo êm êm te, hmanhmawha inhmâkhua duh reng chi te, thil thar lawm tûr hre thei êm êm te, zanlai chaw ei nuam ti êm êm te, Carrom pen ber hi emaw ti chi te, chutiang infin khâwm chu kan hun lai Juniper leh TKP kha chu a tawi zâwngin a ni mai âwm e a!
6. Kohhran leh khawtlâng tâna tangkai kan tum vena lamah ran khuahkhirh tûlziate kan sawi ve thin a, khawlaia bâwng leh vawk tla lai hmu tawh miah lote tân chuan a thing âwm! ‘Ui thlun thu’ erawh hi chu “thil sawi sâwt lo leh awmze nei thei lo sawina” a la nih ber âwm hi maw! Faina leh thianghlimna thu kan lo sawi ve thinte pawh kha bânsan mai lovin, hrisêlna leh kan environment siam tha zâwnga Juniper hmanga inzirtir uar sauh sauh a la ngai a nih hi maw, ka ti.
7. Juniper-a ka thawhpuite zinga mi 6 chuan ropuina ram min pansan ta. Chûngte chu Tv. K.Laldinliana (Maa), Pu P.Lianbuanga, Upa C.Zorema, Upa Dr.K.L. Biakchungnunga, Pu C.Lalnunmawia leh Upa H.Hrângchhuana te an ni. Anni ho nêna kan Juniper thin dânte mitthlâah a thar uai uai mai. Pu Zorema leh Pu Chhuana te hi Editorial Board member hmasa ber, Juniper sûlsutu tak tak zinga mi an ni. Kumin maia min hawsan ta Pu Nunmawia leh Upa H.Hrângchhuana te hian rilru an luah zual hle mai. An ruang chungah takngial pawh eng mah tih theih ka nei lo erawh chu hrehawm ka ti hle.
Hmun pêk ka nih chin a zo dâwn a, ka tâwp thut mai ang e. Hripui zawng lêng lo se chaw ei khâwm paha sawi tûr a la chhuak dâwn chauh asin le! Kohhran leh khawtlâng tân JUNIPER vul zêl rawh se. Anniversary chibai vek u le.
(“Whatsapp lamah lo thawn mai ta che. Eng file pawn a pawi lo. Kan lo copy paste mai anga a har lo,” ti chunga Juniper chhut buaithlak zia lo sawia lo phunpui ve thin tan chuan type writer, stencil cut, duplicating machine tih vel han hriat chuan kan inthlahrung ta rum rum mai alawm le. Tunah phei chuan printing press lama barh lovin pdf file-in phone hmaiah kan chhiar ta zet zet mai chu a ni si a. Juniper rawngbawlna bul tantute an zahawmin an hmai kan khâp phâk lo hle mai. Juniper Anniversary pual article kan ngen anga min ziah sak avangin kan lawm takzet a ni. Part-2 pawh awm se kan chhiar nin dawn loh nen duhaiin a tawp hma a ni, tiin ka’n tuihnih tuithum duah ang e. – Editor)