KAN THIL TIH MAN KAN HMU LEH ANG
Chhana Ralte
Dt. 18.4.2021 khan chhandamna kan chang tawh a vanram pawh kan kai ngei dawn a ni tih thu kan sawi tawh a. Tun tumah chuan chhandam fate’n vanram kalkawng kan kal mek lai hian engtia awm tur nge, tih chungchang han zir ho leh kan tum dawn a ni. Kan hriat theuh angin Vanram ticket chu a thlawna sem a ni a, kan duh leh duh loh a thu a ni. Pathian mite kan lo nih hnu hian thil tisual theilo kan nita e tihna ni lovin thil la tisual leh thei kan ni a. Nimahsela, kan nun kan fimkhur lova inthlahdah taka kan nun chuan kan thil tih sual man hremna chu he khawvel dam chhung ngei hian kan seng leh dawn a ni. Thil tha kan ti a nih pawhin chung kan thil tha tih man chu a thlawn dawn chuang lova. Chunglamin kan thil tha tih ve ai a tha fein min rul let leh thin a ni. Chu mi tifiah tur chuan Bible-a mi pali lek chanchin kan zirho dawn a ni.
A hmasa berah chuan Puithiam Elia chanchin Samuela I bu atangin lo en ta ila. Puithiam Elia chu Pathian mite ho aiawha Pathian hmaa ding thin, nitin inthawina hlana thahnemngai taka rawngbawl thin kha ani a. Chutianga rawngbawlna ngai pawimawh em em mi nisi chuan a fate a enkawl tha lo hle mai a. Inthawina sa ei thiang lote chu lo eiin Biakbuka lo kal nula hote chu an lo mutpui vel thin kha a ni a. An mahni mihringpuite chung maiah ni lo Pathian chung ngeiah thil sual tenawm tak an tih avang chuan, Pathianin a lo thlan tawh Puithiam Elia chu a fate suahsualna avang leh amah Elia ngei pawhin a fate a enkawl that theih loh avang chuan nasa takin Pathianin a hrem a. Nikhat thil thuah amah leh a fapate pahnih leh a monu te chu rapthlak takin an thi anih kha.
A pahnihnaah chuan Jakoba chanchin Genesis atangin lo en leh ta ila. Jakoba pawh kan hre theuh awm e. Bumna hmangin a u Esauva malsawmna chanai a chang kha a ni a. Pawn lam lang theiah a pu Labana hnen atangin ro tam tak nen lo kir leh mahse a tawrhna nasat zia kha. A u Esauva hlauin hun rei tak chhung a tlanchhia a, a pu nen kum sarih inhlawh tura an inrem vek tawh kha bumin a awm a, kum sarih dang leh a thawh leh a ngaih phah a. A upat lamah a fate’n bum lehin a hmangaih leh duat em em Josefa chu a fate ngei chuan an rukbo sak leh a, thi lo chauhin a fapa, a innghahna a sun leh a. Malsawmna a dawn phenah khan harsatna paltlang harsa zet zet tur tam tak a tuar ve leh a ni.
A pathum naah chuan Israel-te lal ropui em em lal Davida chanchin Samuela pahnihna bu atangin tlem kan en leh ang. Mi nupui it avanga insum zo loin a lo mutpui kha a ni a. Mahni pawmlai nupui ni lo, mi nupui a lo mutpui mai kha Pathian khan a pawmzam lo khawp mai. Kha thil sual rapthlak tak a tih man kha a hmu nasa hle a ni. A ruk a rala a thiltih chu Pathian chuan chhun engah mi zawng zawng mit hmuhah a thungrulh dawn thu zawlnei Nathana’n a hrilh a nih kha. Lal chhungkuaa thil lo thlengte kha han en ta ila. Lal Davida fanu hmeltha tak Tamari chu a unaupain a ngaizawng hle mai a, a ruka sex hman puiah a sawm a, Tamari khan duh loh hle mahse a sual lui ta tho a. Khatia a sual luih takah chuan Tarmari chuan khawlaiah mi zawng zawng hmuhah a thianghlim tawh loh thu puangin lungchhe em em in a tei kual ta a. Chumai a ni lo Absaloma’n a farnu tamari pawngsual tu a unaupa ngei chu a la that zui bawk a ni. Absaloma chuan amah hmangaih em em tu a pa lal Davida ngei chu thah a tum ve leh a, lal Davida chuan a fapa hlauvin a lal in ngei chhuah san a, a tlanbo a ngai ta. Absaloma chuan thuihhruaite ngah zelin Jerusalem-ah an lut ta a. A pa Davida hmeite chu Israel mipui ho zawng zawng mit hmuh a mutpui hlawm anih kha. Heti em em a tawrhna nasa hi kan chhungkaw chunga thil lo thleng nita se, khaw eng hmu ngamlo tur hi kan tam viau mai thei a ni.
A tawp berah chuan Timothea chanchin tlem lo en leh ta ila. Tirhkoh Paula chuan Timothea chanchin tihian a sawi a, 2 Tim 1 : 5, “Rinna dik tak nangmaha awm kha hre reng la, chu rinna chu a tirin i pi Loisii hnenah a awm a, i nu Euniki-ah pawh a awm bawk a, nangmahah pawh a awm ngei tih ka hria a sin”. Thahnemngai taka rawng bawl thin Puithiam Elia-te ang lo takin Pi Loisii te chuan Pathianah rinna dik tak neiin rawng a bawl thina, chu a rawngbawlna rah chu a fanu Euniki-ah a lo lang chhuak a, Euniki pawh chuan Pathian rinna dika rawng a bawl thinna rah chu a fapa Timothea-ah lo lang chhuakin, Timothea chu Thuthlung Thar rawngbawltu pawimawh leh ropui tak a lo ni leh ta ni.
Awle chhiartu duh tak, mi chi hrang hrang pali te chanchin kan han tarlan tak atang khian, Pathianin a mite chunga ro a rel thin dan chu kan hrethiam thei awm e. Mitin mai hian kan thiltih man hi he lei damchhung ngei hian kan seng let leh dawn tih a chiang reng a. Kohhran pawl hrang hrangah rawngbawlna pawimawh tak chelh mektu pawh i ni maithei, a ruka thil tha lo i lo tih thinte avang khan Jakoba angin pawnlam, khawvel thil lamah chuan malsawmna dawng thur thur angin langmah la, chhungril lamah harsatna namen lo, chaw ei tui lohna leh zan muttui theih loh hialna pawh i lo tawk reng mai thei. Lal Davida ang a, thenawm khawveng, khawtlang mipui leh rampum huap ang pawh a mualphona zahthlak tak i tawn buak chang pawh a awm maithei le, chutiang hun a lo thlen chuan in ti luhlul lova, Lal Davida anga inngaitlawma Pathian hnenah inlamlet a, sima hawikir leh thin hi kan tan a tha ber tur a ni. Timothea te chhungkua anga rinna dik chu vuan tlat a, sual lam chu hua a, tha lam chu thlang tlat zel thei turin theihtawp i chhuah zel ang u.