Inneih lawmpuina
Kan member pui LP. Lalrinchhana s/o Rev. Dr.Lalzarliana chuan dt.8.7.2021 khan Kohhran dan puitlingin nupui atan K.Hmingthansangi d/o K.Lalrinmawia, PCI, Keifang a nei a. Kan lawmpuiin Pathian malsawmna dawnga Kristian chhungkaw din turin duhsakna kan hlan e.
ESSAY/ARTICLE INZIAHSIAK
Essay/Article inziahsiak atan “TKP LEH ENVIRONMENT HUMHALH” tih thupui hmangin member-te lo tel ve theuh turin kan sawm a che u. Juniper-a chhuah tur a nih avangin word limit hi 700-800 a ni.
– Thehluh theih hun tawp hi July 21, Wednesday a ni a.
– Thehluhna tur te: Tv. C. Lalhmingliana, Tv. Remlalnghaka Renthlei, Nl. Lalthanmawii Kawlni.
– Endik turin Senior adviser Upa Z.D. Lalnunmawia leh Upa Dr. Lalramzauva te an ni ang.
– 1st prize lawmman atan Rs. 2,500 a ni a, consolation prize hi mi 5 hnenah Rs. 500 theuh a ni ang.
Secretary,
Thalai Kristian Pawl, Serkawn
Documentation Sub-Committee
NGENNA
Pathian khawngaihna leh venna zarah Covid-19 hripuiin nunphung tam tak a tihkhaihlak laiin Juniper chu kan la tichhuak ve thei hram hram a. Chutihrual erawh chuan FO leh Kohhran Programme a awm theih tak loh avangin chanchinbu hnawh khah harsat chang leh article/sermon neih loh chang kan nei ta fo mai a. Article leh sermon emaw rilru a vei zawng he chanchinbua chhuah theih tur ziaka thehlut duh tan inthlahrung hauh lova a tam thei ang ber ziak turin Kohhran member-te kan inngen e.
BCM THUHLA
⇒ Vawiin Dt .11.7.2021 (Pathianni) chawhma dar 11:00 hian Mizoram Baptist Kohhran Biak In, Sikul veng, S. Vanlaiphai-ah Missionary Tirhchhuah Inkhawm neih a ni dawn a. Tun tumah hian Missionary pakhat, Ramchhung Mission, Dapchhuah-a thawk tur, Nl. Lalnunsangi Renthlei, D/o Upa R. Lalrinliana, S. Vanlaiphai chu tirhchhuah a ni ang. Missionary Tirhchhuah Inkhawm hi Rev. R. Lalthangliana, Director, Mission Department-in a kaihruai ang a. Rev. R. Lalbiakliana, AGS (Service)-in Tirhchhuahna neiin, Rev. Dr. C. Vanlaldika, AGS (Mission)-in thuchah a sawi ang.
⇒ Mizoram Baptist Kohhran, Administrative Committee chuan Mizoramah Covid hrileng a hluar zel avang leh hemi atana enkawlna Covid Care Centre te indaihlohna a san chhoh zel avangin mipuite harsatna leh manganna te chhawk zangkhai a nih theih nan Covid Hospital din thuai ni se, tiin a rel. Hemi chungchanga a tul ang zel a ruahmanna te siam tur leh hma lo la turin Sub- Committee din nghalin, Chairman-ah Rev. R. Lalbiakliana, AGS (Service), Secretary-ah Upa Dr. Lalramzauva, Director, Medical & Health Department-te ruat an ni a. Sub.Committee Member dang pali atan – Rev. F. Ramdinmawia, General Secretary, Rev. Dr. C. Vanlaldika, AGS (Mission), Er. Victor Lalrinawma Sailo, Director, Property Department leh Dr. B. Lalrinzauvi, Medical Superintendent-te ruat an ni bawk. He ruahmanna hi tuna kan damdawi in neih mek, Christian Hospital, Serkawn behchhana, khawimaw lai hmunhma kan neih sa remchang dap a buatsaih tura hma lak mek a ni a. Hospital thar diai ang tura hmalakna erawh a ni lo ve.
⇒ Mizoram Baptist Kohhran, ‘Covid-19 Relief Fund’ chu bial leh Tualchhung Kohhran bakah pawl leh mimal thahnemngai ten an chhung lut mek zel a. Dt. 7.7.2021 thlenga Kohhran, fellowship leh mimal te hnen atanga Covid Relief Fund lut tawh chu Rs. 26,03,108 a ni a, Kohhran-a thawktu te nikhat hlawh atanga lut Rs. 12,27,726 belh khawm nen a zavaiin Rs. 38,30,834 a lut tawh a ni. Heta thawktute tih-ah hian Pensioner-te an la tel lo a ni. Kohhran, fellowship leh mimal thilpek petu te chungah BCM Administrative Committee-in lawmthu a sawi a ni.