KRISTA LEH KOHHRAN
K.Lalrindika
Kohhran hi a lo nuna hriat reng alo nih a, alo than zelna tura pawimawh hmasa ber atan chuan Pathian nen a inzawmna nghet, chhe mai thei lo neih hi a ni. A pawimawh em em na chhan pawh Kohhran hi amah Pathianin a din leh a vena, a humhimna hnuaia awm anih vang a ni. (Mathaia 1:21; 26:26-29, Tirhkohte 20:28, Ephesi 4:11-16, Tirhkohte 2:46-47). Tichuan, Kohhran pawimawhna Bible atang leh chhuizauna hrang hrang atanga ka lakkhawmte ti hian a indawtin han sawi ve dawn ta ila, a hmasa berah chuan:-
(1) Lal Isua chu Kohhran tana nunna hlantu a ni:- Lal Isua’n Kross-ah misualte tan a nun a hlan khan keimah mimal tan mai nilo khawvel zawng zawng a misual mi tinreng tan a ni. Mathaia 1:21-a kan hmuh angin Mari’n Lal Isua a pai dawn pawh khan vantirkoh ten an lo hrilh lawk a nih kha, naute lo piang chu khawvel chhandamtu (ami te chhandamtu) a la ni dawn si a, tiin. Hetah hian Kohhran nen inkungkaihna neilo angin alang maithei, mahse a mite a tih hi pumkhata awm ani tih a rawn tarlanna a ni. Ringtu nih hlutna hi min tlan avanga lungawi a awm mai thei kan nih lohzia chiang takin kan hre tur a ni. Mimal duhthlanna a dah rualin duhthlanna a siam khan a kohte zingah a tel ve nghal a, Lal Isua-a pumkhat te zingah a awm bawk nghal a ni.
(2) Lal Isua chu Kohhran vengtu a ni (Daniela 3:19-27, Mathaia 16:18-19):- Thuthlung Hlui bu kan chhiara kan zir chuan Pathianin a mite a humhim nasatzia kan hmu teuh a ni. Hei hi chu sawi vek ngai lo pawhin mahni theuh pawn ngaihtuah ila kan sawi thei awm e. Entirna pakhat atan chuan Mosia’n Isreal fate a hruai chhuah dawn khan a tir atanga a tawp thleng khan Pathian humhimna an chan nasat zia kan hmu a ni. Natna lak atanga a chhanchhuah te, thihna lak atanga a chhanchhuah te, Tuipuisen a kan tir zawng zawng kha sawi ka tum a nilo a; ka sawi tum zawk a chu a thutiama ding Pathian chuan a mite (Kohhran) a hmangaihzia leh a ven reng thu hi kan hmuin kan chiang em em tur a ni. Tunlaiah chuan, engtin nge kan tih ang lungngaihna te, harsatna te, beidawnna te lakah min veng a. Kohhran dik ding chhuak tur mai ni lovin Kohhran phel tur te thlengin Pathianin min veng a min tanpui thin a ni lawmni? Krista chu thlipui ruahpui laka kan himna ti te’n hla thu-ah hial kan hmu hnem em em a ni. Mimal a veng kan tih rual hian a kohhrante zel kha a ni a ven chu. Chu lai hmu thiam apiang chuan Kohhran a ngaipawimawh a, a ngaihlu a, a hringnunah hmun pawimawh ber alo chang ani. Mimalin kan do ngam loh te, harsatna kan sut tlang mai theihloh te, chhungkua keh chhe tur leh setana lak mai tur lakah khan a ni lawm ni Kohhran kan belh a kohhranin min ven thin. Mimalin zanah te i va pan a, amite i zawng ruai thin a ni tiraw? Kha’ng kha Lalpa hian a Kohhran i tana a lo siam sak che a ni asin. Kohhran bela kohhran a innghat tlat mi chu malsawmin an lo awm thin a ni.
(3) Lal Isua chu Kohhran tithianghlimtu a ni (Jeremia 3:6-14, Ephesi 5:25-27):- Kan rin Pathian hi thianghlim a nihzia chu kan sawi thin a, kan ngaithla mawlh mawlh thin a ni. Hla thu ngeiah pawh hian kan hmang tam a ni. Kan sawi, kan ziah, kan ngaihthlak tam ang hu hian a thianghlimna leh thianghlim tura min duhna hi kan zawm in kan hria em tih hi ngaihtuah thar leh atan a va tha em! A pawimawh berah chuan kei mi bawlhhlawh tlinna reng reng nei lo hi min hmangaih avanga Kraws-ah ka tan a tuar a, a thisen far a, a nun a hlanna hi ka thianghlimna tling lo chunga tlinga min pawmna a ni hi ka kumkhaw lawmthu ava ni em! Lalpa chu fakin awm rawh se. Kraws-a a tuarnaah pawh khan Kohhran tan a lo tuar tel vek a, bawlhhlawh engmah lo tur Kohhran kha alo tungding a, a lo tithianghlim ta a ni. Ringtu, a kohhrante hi kan va nihlawh em. A kohhran a veng a, mal a sawma a lo tithianghlim ta a ni. Kohhran tel loin ringtu a kal dik thei lova, ringtu awm loin kohhran a awm thei bawk lo a ni. Thianghlim fel famkim chuan a mite misual bawlhhlawhpu chu thianghlim ve turin min duh a, min thlang tlat si a ni. Chuvang chuan he kohhran hi kan zahin kan rinna thanlenna, sual laka min vengtu a tan kan chaw a ni tih i hria ang u.
(4) Lal Isua chu Kohhrante thlamuantu a ni:- Thlamuantu han tih chuan sawi ngai loin kan hrethiam mai awm e. Buaina a awm chang hian remfeltu emaw boruak tudaitu an awm thin a. Midang tan an hluin kan thlamuanpui em em thin a ni. Hetiang mi hi chu chhungkuaah pawh ban rinawm leh innghahna an ni thin a ni. Chutiang chiah chuan Lal Isua pawh hi mimal ang leh kohhran ang pawhin kan tem (experienced) vek tawhin ka ring a. Kan manganna min thlamuantu a nihzia hi sawi tam a ngai awm lo ve. Amaherawhchu, Kohhran ang zawng hian Kohhran bel tam lo leh Kohhran nihna a chiang lo tan chuan Kohhran tana kan laimu leh innghahna, thlamuantu Lal a nihna hi kan la hre tawk lo viau maithei a ni. Chumiah tak chuan Kohhran belh hlutna leh pawimawhna alo lang ta thin a ni. Mahni maia Kristian, mahni maia ringtu nih hi khawvel tawp thleng a thil hlauhawm leh kalsualna ani fo tih hi hre thar ila. Mahni ka inhlan rual hian kan inhumhimna leh kan himna Kohhran bel ila chumiah chuan Lal a awm a, min vengtu a awm a, kalsualna lakah pawh kan him dawn a ni tih hi i hre thar leh theuh ang u.
(chhunzawm tur)