Rilru hrisel neih kan mamawh
Hripui thawh hnihna (Covid-19 second wave)-in India ram min han nuai leh ta tak tak a, a rapthlakin a tawrhhlelhawm hle mai. Mizoramah pawh a hmasa ang ngawt ai chuan kan tuar na ta hle. Hemi avang hian Sorkar pawhin mipui khuahkhirhna dante siamin thla khat aia rei mah inkharkhip kan kal pui ta reng mai. Tute mai pawh mahni inchhung lumah kan tawm ngawt ngawt mai a, rilru hriselna hei hian engemaw chen a nghawng ngei ang. Chuta karah chanchin lawmawm lam hriat tur avangin nitin maiin chanchin lawmawm lo dangin min chhu zui reng bawk si nen. Heng avang hian hah ngawih ngawih emaw tawt up up thin pawh kan tamin a rinawm. Amaherawhchu, heng laka kan him theih nan hian tih theih tam tak kan nei ve tih hi hria ila. Lehkhabu chhiar tam te, phone bih tam loh te, chanchin tha lo lam kan tana tangkai lo tur chhiar loh te, chhungkuaa inkawmna hun hman tam leh thil tih ho te leh thil dang tam tak tih tur a awm a ni. A pawimawh berah chuan ringtu kan nih angin Pathian pawl nana hun hman tam te, Bible chhiar nan te leh chhungkaw maicham din thar leh nan te han hmang ta hlauh ila. Ngaihtuahna tha lo leh hlauhthawnna lakah kan him ang a, rilru hrisel leh hlim kan nei thei ngei ang.
