PATHIANNI SERH
Wilbur and Orvile Wright (The Wright Brothers) te kha thlawhna siam chhuaktute an ni a. An pa chu Bishop Wright a ni a, an tet te atangin Pathian thuin a fate a enkawl thin a ni. Khawvelah Wright-a te unau chu thlawhna an siam chhuah avangin an hmingthang em em a. Chu chu Spain lal pawhin a lo hre ve a, hmuh a duh ta a ni. Lal chuan mi a tir a, Wright-a te hmuh a duh thu chu a va hrilh a. Thawhnaa an thlawk lai en a duh a ni. Mahse khami ni kha Pathianni a lo ni hlauh mai a. Wilbur-a chuan, “Ka unau pa nen hian Pathianni-ah thlawhna kan khalh thei lo,” a lo ti a. Khatiang lal ropui pawh Pathian zah vanga an lo hnar mai kha an ngaihsan awm em em a ni.
Tunlai hian Pathian ni kan zah ta lo hle mai, hei hi kan tih loh tawp tur a ni. Hmanlai chuan Pathian nia ram kal emaw zin chhuak leh haw an awm chuan Kohhranin a phuar thin a. Tunlai hian Kohhranin min phuar ngai tawh loh vanga Pathianni serh lohna a nasa ta hle mai. Pathian hminga serh kan nih avangin tih mai mai loh tur a ni a, Pathian duhdan ang ngeiin serh tur an ni.