TKP THUHLA
⇒ April thla atang hian Missionary Support (Faith Promise) chu khawn tan leh tur a ni a. Hei hi member tinah khawn a ni dawn lo a, a pe duhte chuan Unit OB-te hnenah emaw, Colony Convener-te hnenah inhriattir nise a lawmawm hle ang.
⇒ April thla lo awm tur hian TKP sumtuakna zinga pakhat Piggy Bank chu khawn a lo hun leh dawn ta a. Piggy Bank hi member-te in lamah cham rei deuh tura ruahman niin, thahnemngai taka lo thlak leh turin member-te kan inngen e.
⇒ TKP Serkawn Pastor Bial 2020-2021 rorelin ‘Bible ralchhan neih ni se’ a lo tih chu kan unit pawhin Bible ralchhan tur hi kan dawng fel ta a. Chhang duh turte chuan Colony Convener-te hnenah lam tur a ni e. Unit chhang tam ber ni turin member-te kan in ngen a. Bible ralchhan hi Rom bu atanga chhan tur a ni.
BCM NEWS
⇒ Mizoram Thalai Kristian Pawl (MTKP) Executive Committee Meeting chuan BCM Zawlnuam Vengpui Biak In kang tanpuina MTKP in Rs. 50,000/- pek ni se ti-a an rel chu bawhzui nghalin, MTKP aiawh hian Executive Committee member Rbt. C. Lalnunthara leh Rbt. Isaac Laldawngliana te chu Zawlnuam-ah hian an kal nghal a. Tanpuina hi Biak In hmunah hlan nghal a ni. MTKP hruaitute hi Asst. Secretary, TKP Co-ordination Committee, Aizawl Tv. C. Lalbiakkima’n a tawiawm bawk.
⇒ Serampore Council Meeting March 23-25, 2021 – a neih chuan Rev. Dr. C. Vanlaldika, Associate General Secretary, Mission chu Serampore Council member 2021 – 2026 atan an ruat. Serampore Council hi Senate of Serampore College University enkawltu rorel khawl sang ber a ni a. Tunah hian BCM General Secretary chu member nilai a ni a. Ani bakah hian BCM atangin member thar hi ruat belh a ni a, kum nga chhung (2021-2026) atan ruat a ni. He Council hi member tlemte awmna a ni a. Chutih laia BCM-in member pahnih lai kan nei thei hi a lawmawm hle a ni.
⇒ March 26, 2021 khan, Mizoram Baptist Kohhran Biak In, Vengpui, Zawlnuam chu luah zui tlak loha a kan chhiat avangin BCM Administrative Committee chuan hmalak zui dan tur ngaihtuahin March 29, 2021-khan inrawnkhawmna an nei a. Zawlnuam Biak In kan dan leh an dinhmun te report a pe bawk. Administrative Committee inrawnkhawm hian Zawlnuam vengpui Biak In chu a hma thei ang bera sak thuai a nih theih nan Tualchhung Kohhran tinte hnenah tanpuina (Appeal) dil sak ni se. Tanpuina hi a remchan dan angin April leh May 2021 chungin Aizawl Area leh Lawngtlai Area-a awmte tan Executive Secretary Office-ah thehluh theih a ni ang a, a bak zawng chuan Headquarters Office-ah thehluh ni se, tiin an rel a. Tualchhung Kohhran tinte hnenah ngenna tih chhuah nghal a ni.
⇒ March 28, 2021 Pathianni hmang khan Social Concern Department Director Rev. Sangliankhuma Chinzah chu Parva Pastor Bialah hun hmangin a zin chhuak. Pathianni zing-ah Parva-II ah hun hmangin thuchah a sawi a. Pathianni chawhnu-ah HIV/AIDS and Drugs awareness Seminar nei in bial huapa hun hman a ni a, Kohhran hoten an hlutin an kal tha hle. He hunah hian Resource Person Rev. Sangliankhuma Chinzah-in hun a hman hnu-ah zawhna leh chhanna hun hman zui a ni bawk. Pathianni zanah Silo Kohhran-ah thuchah a sawi bawk.