CHI THA I TUH ANG U
Sentea Ralte
Pathian khawngaihna a zarah kum 2021 chu kan lo chuangkaiin hun engemaw che chu kan lo hmang chho leh ta reng mai. Kan phu reng vang emaw kan fel bik vanga he hun hi thleng kan ni ti thei tumah an awm a rinawm loh. Pathian zahngaihna leh khawngaihna avang chauhin he hun hi kan thleng a ni. Keini aia fel zawk tha zawk leh phu zawk tam tak ten mual min liam san a, keini aia tangkai zawk, fel zawk Pathian leh khawtlang leh kohhran tan pawh a keini aia tangkai tur tam tak ten mual an liam a, chutih laiin keini ve tun thlenga dam leh hrisel tak mai a tun hun kan thleng ve mai hi a mak ngawt mai.
Kan fel vang te kan that bik vang te a he hun thleng hi kan nih siloh chuan he hun min hruai thleng tu hian chhan neiin he hunah hian min hruai thleng a ni ngei ang. Hun kal tawh lama kan hun hman tawh dan te han thlir kir ta ila, mahni induh khawp lohna tam tak kan nei theuh ang. Keimahni min tina em em tu te, thleng lo se kan tih em em te, kan inchhir ngawih ngawihna te pawh tam tak a awm ngei ka ring. Thenkhat phei chu chung thil avanga hmalam pan chak lo tak te pawh kan ni thei e. Engpawh chu kan hun kal tawh chu ni rawh se. Kan hma lam hun hi chu rilru thar, thlir dan thar leh beiseina thar nen hmalam pan i han tum dawn teh ang.
Liam tir mai rawh:
Bible-ah thuthlung hlui lam pang kan en chuan I Samuela bung 15,16 chho kan en chuan lal Saula chu Pathianin Amalek ho bei a that chimit vek turin thu a pe a, a thupek ang ngei chuan va kalin a ti ve ngei mai a, mahse, an lal Agaga chu nung chunga lo hawnin an ran thau tha tha chu Pathian hnena inthawinan an lo hawn a. Mahse, Pathian a lo lawm reng reng lo mai a, chuvang chuan Saula chu Pathianin Israel te lal atan a lo hnawl ta a ni tih thu kan hmu a. Zawlnei Samuela chu he thil avang hian a lungngaiin hrehawm a ti hle mai a. A in dawmkun reng a ni ngei ang. Bung 16:1 kan en chuan Pathianin Samuela hnenah chuan ti hian a sawi a, “Israel mite lal atan ka duh tawh loh a hnu Saula avang hian eng chen nge maw i lungngaih dawn le” a ti hial a ni. Tichuan, a sawi zawm zel a, Israel te lal tur mi dang a lo ruat lawk diam tawh thu a hrilh a ni tih kan hmu a.
Awle, kan hun kal tawh chu engang pawh lo ni rawh se, hriatreng tlak loh leh hriatchhuah ringawt pawh kan duh tawh loh thil a lo ni thei e. Thenkhat tan chuan kan hmangaih tak te kan channa te, thihna in kan chunga ro a relna te pawh a ni mai thei. Mahse, Pathian chuan khang huna cheng reng lova hmalam pan turin min ti a ni. Samuela pawh kha Saula avang khan in dawm kun reng mai ta se la, Pathianin Israel te tana lal tha zawk tur a lo ruat sa reng kha a hmu thei lovang tih a hlauhawm em em a ni. Chuvangin, keini pawh tun atang chuan Lalpa thlir chungin hnung lama thil awmte chu theihnghilhin hmalam i pan ang u. Pathian hian kan tan ruahmanna tha tak a nei ngei ang tih i ring tlat ang.
Kan tuhrah kan seng dawn:
Galatia 6:7 kan en chuan “miin a theh apiang chumi vek chu a seng bawk dawn si a.” tih kan hmu a. Chumi awmzia chu thil tha chi ka tuh chuan thil tha rah kan seng dawn tihna a ni. Nitin mai hian kan duh emaw duh lo emaw, ka thiltih leh awmdan hmang hian chi kan tuh thin a, chumi rah chu kan la seng dawn tihna a ni. Thih hnu piah lam chauhah a ni lova, kan dam chhung ngei hian ka seng dawn a ni. Pastor Rick Warren-a thusawi ka hriat reng thin chu ‘thil duh i nei em? Vawiinah hian chi chu tuh tan rawh’. Tiin a sawi a. Galatia bung 6 ah hian a sawi zawm zel a, chang 9 naah chuan “thil tha tih i ning suh ang u, kan inthlahdah loh zawngin a hun takah chuan kan seng dawn si a” tiin a sawi zawm a ni.
He kan dam chhung reilote ah hian eng nge nih kan tum eng nge kan duh eng tianga nun nge kan tum tih hi kan inzawh nawn fo a, kan chian hi a pawimawh em em a. Zingah kan tho va, tih tum em em pawh nei lem lo in kan awm ve tawp a, chaw ei hunah ei tawp a, thingpui in hunah in leh tawp a, chhun alo ni a nidang ang thovin kan tih thin pangngai kan ti a, thil danglam tih tumna pawh nei hran lovin zan a lo ni a, kan mu leh tawp ringawt a. A tuk zing a lo ni a, chutiang bawk chuan hun kan hmang leh a, tih tur a lo awm ve mial chuan kan ti tawp ringawt thin em? Tun kum chhung hian eng nge thlen ka tum, neih duh leh awh em em te kan nei em? Nih tum te kan nei em? Kan rawngbawlna zawn theuhah te hian hmathlir leh beisei te kan nei em? Kan chunga thil lo thleng apiang lo sepui ruah tawrh ringawt mai hi em ni kan tum le? Thil lo thleng tur tam tak hi chu kan dan theih pawh a ni lo a, kan ven theih pawh a ni lo. kan thu lo em mai.
Tun hi hun tha chu a ni:
Mahse, tun atang hian chu kan nih tum, kan duh leh awh em em tan chuan chi i tuh tan ang ule. Chi kan tuh phawt chuan a rah chu lawh hun kan nei em em ang. Bible in a sawi a ni. Chi tuh tur hian remchan hun zawn angai lo e, tunah hian tan hmiah mai tur a ni. A van tla dawng ringawt tur hian Pathian hian min siam lo a nia, malsawmna kan beiseih loh em em dawn changte chu a awm ang, kan dawng fo tawh bawk in ka ring. Mahse, chu chu Pathianin min hruai reng a tum dan hi a ni lo a ni.
Tichuan, kan tih theih tawk chu kan ti anga, chi kan tuh anga, a hmun kan thlo fai anga, tuiin kan chawm anga, lei tha te pawh kan pe ang, chi tuh ringawt a, ngaihtuah zui chuan siloh hian awmzia a nei thui vakin a rinawm loh. Kan theih tawp kan chhuah anga, a than tirtu, rah tirtu leh malsawmtu chu Pathian a ni a, a thu thu a ni. Mahse, a malsawm tur tal i han siam sak ve teh ang u. Chumi rual chuan chu kan thil tih tum chu a Pathian thu em, Pathian do zawng thil a ni em? Tih hi Pathian thu nen kan in enmil fo tur a ni. A pawimawh ber chu awm mai mai lo phawt mai teh ang. Isaia 62:7 ah chuan “Nangni Lalpa hriatpuitua awm te u, awm hle hle hlek suh ula, amah pawh chu awm hle hle tir hlek suh u” a ti a ni. Pathian hian mal min sawm hi a duh em em a, mahse a malsawm tur tal hi chu kan lo siam ve a ngai a ni. Engmah ti silova, Pathian chunga lung nih loh ve vak te hian awmzia a nei lo a ni. Chuvangin, tun atang chuan awm mai mai lovin chi tha i tuh ang u.