Nuna lantir a tha zawk
Kan Pathian leh Pa hmaah chuan rinna avanga in thiltihzia te, hmangaihna avanga in thawhrimzia te, kan Lalpa Isua Krista beiseina avanga a chetziate kha theihnghilh lova hre rengin, kan tawngtainaahte chuan in hming lamin, nangmahni… Pathian hnenah lawmthu kan hril fo thin a ni. I Thessolonika 1:2&3
Thuhril dan tha ber chu a tiha tih hi a ni. A sawia sawi aiin nuna lantir a tha zawk. Keimahni’n kan tih loh midang hnena ti tura kan hrilh chuan mi rilruah hna a thawk thei lo.
Nu leh pa tam takin an fate thu tha an hrilh thin a, an fate lakah thil tha an beisei thin. Mahse, an faten an lo thlir kiau a, an nun khawihtu ber chu an thil tih a ni. Kristian nu leh pate chu entawn tlakin an awm veleh an faten an hnung an zui thin a ni. Nitin hian kan nunin thu kan sawi reng a. Khawvel hnenah Sermon kan sawi reng a. Chu thusawi chu miten an lo thlir a, thusawi tha an hmuh chuan siamthatin an awm thin a ni.
Tirkoh Paula chuan Thessolonika mite hnenah Makedonia leh Akaia rama ringtu zawng zawng tan entawn tlak an nih thu a hrilh a. An chetzia te, hmangaih avanga an thawhrimzia te an hmuhin a fak a. Anmahni avanga Pathian hnenah lawmthu a hrilh thin thute min hrilh a ni.
Kan tawngka leh kan thil tih hian midangte a hnar thei a, Pathian hnenah a hnuk hnai thei bawk.
“Kristian zawng zawng hi sermon kal thei an ni tur a ni”