SERKAWN TKP HRUAITUTE HRIAT ATANA PAWIMAWH KA TIHTE
Lalrinmawia
Tisa leh thlarauva i nih ang ang khân Pathianin Serkawn TKP member-te hmangin hruaitu atân a ko che a ni. Mahse kawng tinrêngah hmasâwn zêl i tum loh chuan nangma tân, TKP tân, Kohhran tân a pawi hle dâwn a ni. Harsatna i tawh châng te, hlawhtling leh ti tha viaua i inhriat hunah te, i insit êm êm hunahte a hnuaia point 5 i chhiar tûrte hi innghah nân hmang tlat la, i mualpho lo vang.
1. He khawvêl finna hi Pathian ngaih chuan âtna a ni a (I Kor 3:19). Lalpa tih hi finna bul a ni (Thufingte 1:7). Thupêk vawng tha chuan a nunna a vawng tha a ni a, a awm dâna fîmkhur lo erawh chu a thi ang (Thufingte 19:16)
2. I Petera 5:3. “In chante chungah intilal hek lovin, pâwlho entawnan insiam zâwkin ho rawh u,”. Serkawn TKP member-ten hei hi an mamawh dân che a ni e.
3 Matthaia 23: 12 leh Luka 14: 11- “Inngaihlu apiang an tlâwm ang a; inngaitlâwm chu chawimawiin an awm ang,”. “Mi dangten malsâwmna an chan theih nân, Keini pawh kan tuar a tul si thin,” tih hi vawn tlat tum rawh.
4. Lal Isua zirtirte zînga mi lian nih duh chu an rawngbâwltuah awm a ngai, hmasa ber nih duh pawh chhiahhlawhah awm bawk tûr, tih chu hruaitute awm dân tûra Lal Isua thupêk a ni (Matthaia 20:26-28). “Kei Lalpa leh Zirtirtu mahin in ke ka sil chuan, nangni pawhin in ke in insilsak tûr a ni. In chunga ka tih ang hian nangni pawhin in tih vena tûrin ka tihhmuh che u a ni si a,” (Joh 13:14-15).
5. “Nangma kaa infak lovin, mi dangin fak zâwk che sela; Nangma hmui ni lo, hmêlhriat loh mi hmuiin,” Thufingte 27:2.
Pathian zârah kan inkhâwm leh thei thuai tûrah ngai ila, Biak in leh a chhehvêla TKP hruaitu (Committee member chinte) kan beisei dân chu:
1. Biak in chhûnga i inkhâwm hmêl hmuh.
2. Thawhlâwm khawn zawha mahni seat lam i pan leh thuai.
3. Hmêl-hmai hlima inkhâwmte min lo chiau-au a, a tûl anga i lo tanpui.
4. Mikhual leh hmêl tharte inthlahrung hman lo tûra lo chiau-au leh i lo dawnsawn.
5. Inkhâwm ve si Sunday School hall-a phone lo khalhte erawh chu inhmeh lo an ti.
6. Biak in chhûnga phone i khâl thinte phei kha chuan i bula mite thlengin a tihnual.
7. Zun in leh a vêla inkhâwm lo tlingtlâk ve ngawt pawh an hrethiam lo.
8. Sunday School bân hmaa i chhuak ve zêl hi i inhmeh lo tlat.
9. Zaipâwlah pawh hmuh ngei che an tum.
Committee meeting nikhuaah leh TKP thiltih dangahte rêng rêng pawh hruaitu tha chuan:
1. Hun bi ruat a ngai pawimawh, tlai chîn chu mi inthlahdah zia tih a hre chiang a ni.
2. Pâwl committee leh inkhâwm pumpelh zâwngin tihtûr dang a insiam duh lo.
3. Mawhphurhna pêk tawh chu hlen chhuah ngei a tum tlat thin.
4. A hriat loh chu ‘hre lo’ nih a hreh lo, rin dân leh ngaihdân a bâwl phuan vak ngai lo.
5. Member-te hmang tangkai tûrin an talent hriatsak a tum tlat thin. Member-te hlutna leh an tangkaina lai a hmu thiam a, anmahni hmanna tûr a hre chat thin.
6. Biak leh dâwr a nuam a, Group Whatsapp leh private message te pawh a ngaihven thin.
7. A inzir peih a, a la tih than loh pawh a kuta dah chuan a puitlin ve mai thin.
8. Tawng tui tam lo mah se a mizia leh nih phung hi a Tita 2:7-8-tlat thin.
9. Sawisêlna a dawngsawng thiam a, thurâwn pawh a ngaithla thin. Sawisêlna nazawng erawh zawm vek chi a ni lo tih a chiang a, mi thurâwn ang zêla kal ngawt tûr a nih lohzia pawh a theihnghilh chuang lo.
10. Committee laia bula mite nêna titi hran lo neih tlat te, message tangkai mang hlei lo en leh thawn kuala lo khîk vur vur te, lo ‘Amazon’ daih te a chîng lo va, ruai theh leh outing sawi loh pawhin tute emaw iangin a mut a chhuak ve ngawt chuang lo.
11. Phûr laia ri vut vut mai, a hnu lawkah ‘TKP hi a hre ta lo em maw ni’ tih mai tûra bo leh vang vang chi hi pâwl tithuanawptu an ni thin tih hriain chutiang mi nih loh chu a tum tlat thin.
12. Daihzai lutuk a tum lo va, vêng dang chu sawi loh a bul hnaia mite pawhin a lem ve zeuh zeuh ngai lohzia an hre chiang.
13. Rin leh duhsak bîk te, kawp bik riau neih tlatte a chîng lo tlângpui a. Duhsak zâwng tihlan lutukte phei chu thiang lo ang hialah a ngai thin.
14. Hre zâwkin dik zâwk mah se Adviser-ten thurâwn mumal an neih tawh chinah chuan ‘Mahse, Pu Chairman’ a ti ngai tawh lo tluk a ni. (chhunzawm tur…)