KANAAN HMEICHHIA
(Matthaia 15 : 21-28)
Lal Isuan Palestina ram dung leh vang a fan naah tihdam rawngbawlna a hmang nasa hle a, damlo tinreng a tihdam mai bakah mitthi hial a kai tho a. Heng thilmak a tih zawng zawngte hi Israelten nghakhlel taka an lo thlir thin ‘MESSIA’ a nihzia chhinchhiahna deuh vek a ni a. Tin, damna chang hote pawh hi Israel hnam deuh vek an ni. Israel hnam ni lo Kanaan hmeichhia nena an in dawr dan erawh chu chhinchhiah tlak tak a ni. Lal Isua tawngkam atang ngeia kan hriatchian em em chu ‘Israel beram bo hnam te tan chauha tirh a ni tih hi. A zirtirte pawh chanchin tha hril tura a tirhin, Jentailte kawnga kal a phal lova, Samari khua tlawh pawh a phal miah lo a ni (Matthaia 10:5-6). Engtizia nge ni ang le? Mi zawng zawng chhandam tura lo kal a ni lawm ni? Kan sawi fo thin, sawi nawn leh ila, Pathianin mihringte a enkawl danah leh hruai danah hun hrang hrang (Dispensation) a awm tih hriat a tul khawp mai. He Kanaan nu nena an indawr hun lai pawh hi Dan (Dispensation) hun a la ni rih a, an chanchin tha hril pawh hi khawngaihna avanga a thlawna chhandamna chanchin tha a la ni rih lova, ‘Ram chanchin tha’ tih a ni. He chanchin tha dawng tur hian Israel te pawhin an sual an sim anga, SIMNA Baptisma pawh an chang tur a ni. Tunlaia ringtu Baptisma nen chuan a dang daih a ni. Israel hnam natna nei leh piangsualten Lal Isua an pan a, Ani’n khêl lovin alo tidam thin a. Nimahsela, Kanaan nu (Jentail) in mangangin Lal Isua tanpuina beiseiin a pan ve a, Lal Isuan zu pui mai duh miah lo a! Engtizia nge ni ang le? Ngun takin he lai bung leh chang hi belchiangin zir kan tum dawn a ni. He Kanaan nu hlawhchhamna chhan ber ni a lang chu he thil hun lai hian ‘Jentail-te’ hun a la ni rih lova, ‘DAN’ hun a la ni rih a, Messia pawh hi Israel hnamte chanvo liau liau a ni.
He Kanaan nu hian a tirte atangin a dawr danah felhlel deuh a han awm phawt a, Jentail ni reng siin Israel ten an dawr dan tur angin Davida fapa hming chhalin a’n dawr ve ngawt a, Lal Isuan a bengkhawn lo hle mai. Kam khat mahin a chhanglo tih kan hmu a, Kanaan nu pawhin beisawnga kal mai a tum hauh lo. Davida fapa hming chhala a dawr erawh ni tawh lovin, “Lalpa min pui rawh” tiin a ngen zel a. Lal Isuan a ruh langin a chhang ta, “Fate chhang lak saka uite hnenah pek chu a mawi love” a ti ta khawl mai. Kanaan nu han huaisenzia hi! Uicho tluk lehah pawh ding mahse a pawiti lo. A tawi thei ang berin helai chang hi sawifiah tum mai ang – Lal Isuan, heng tihdam rawngbawlna leh thilmak hmanga ka rawngbawlna zawng zawng hi, ka mi Israelte tan chauh a ni a, nangni Kanaan (Jentail) ten chanvo in nei ve lo ve, tiin a hrilhfiah.
Kanaan nu a la beidawng chuang lo. Nimahsela Lal Isua thusawi erawh a hrefiah hle, ti hian a la ngen hram, “Lalpa, heng thilmak tih leh tihdamnaah hian keini Jentailten chanvo kan nei lo tih chu ka hrefiah khawp mai. Nimahsela, uichote pawhin an pute chhang nawi tla chu an chhar thin ang hian Israelte i tihdamna kuangbang nawi min chhartir ve ta che,” tiin an ngen chiah chu, a hlawhtling chiang hle mai! Hallelui pek tlak a ni e! A zawm zel chang en zui leh ila. Tawngthei lote an lo dam a, piangsualte an lo tha a, mitdelte mit alo var hnuin Israel-te Pathian chu an fak ta a,” ti a ziak a ni (Matthaia 15:29-31). Tunah chuan hnam tih bik awm tawh lovin khawngaihna dispensation hnuaiah kan dawm a, khawngaihna avangin chatuan nunna hi a thlawnin Pathianin min hlui tawp a, kan tih ve tur chu lawm taka lo lak mai hi a ni e.