PATHIAN RALTHUAM FAMKIMIN INTHUAM RAWH U
– Upa K.Lalnuntluanga
(Bible Chang Ephesi 6:11)
Pathian Râlthuam famkim chu eng nge ni (Ephesi 6:14-18)
1. In kâwng chu thutaka hrêngin
2. Felna âwmphaw chu hain
3. Remna Chanchin Tha inbuatsaihna chu in kea bunin
4. Rinna Phaw la ula
5. Chhandamna lukhum leh Thlarau ngûnhnâm (Pathian Thu) la ula
6. Thlarauva tawngtai leh dilna tinrêngin.
1. In kâwng chu thutaka hrêngin (Thutak Kâwnghrên): Thutaka ding nghetin, chu chu innghah nana hmangin rinawm takin awm rawh u, tihna a ni. Sipai kawnghren chuan a uniform leh a taksa a hreng nghet mai ni lovin chu kawnghrenah chuan raldona tura a mamawh hmanrua tamtak a pai thei thin ang hian, thutak chuan inhreng nghet ula, a tul hun apianga hman theih turin thutak chu pai reng rawh u, a tihna a ni. Thutaka ding ngheta innghah nana hman bâkah, chu thutak chuan in nunna chu phuar nghet rawh se, tihna a ni nghal a ni. II Timothea 2:15.
2. Felna âwmphaw chu hain: II Kor 5:21 Pathian mithmuha kan felna awm chhun chu Isua Kristan kan ai a awhna a ni tih min hrilh a, mi fel chuan mi sual aiawhin, ama thisen kengin sual ngaihdamna min dilsak a ni. Kan aiawha ding Isua Krista chu Pathianin kan felnaah a pawm miau avangin, chu kan felna Kristaah chuan inthuam tur kan ni tih min hrilh. Thu mai ni lovin nuna lang chhuaka felna Krista chu inbelin tihna a ni.
3. Remna Chanchin tha inbuatsaihna chu in kea bunin: Sual râl do turin, sual hnehna chanchin tha puang chhuak tura inpeih a. Tin, inthlahdah lovin, inpeihsa thlapin tihna a ni. Isaia 52:7, Rom 10:15 – Israel fate ram hrang hranga sala an tang tawh, an khawpui Jerusalem-a hruaikir an nihna tura chhandamna chanchin tha tlângaupui a ni ang khan, kawng hrang hranga sual sala tâng tawhte chhanchhuahna thu puang tura inpeih rengin, chûngte tân chuan Vân Jerusalem-ah hruai luhin an awm dâwn a ni tih sawi tura inpeih rengin awm rawh u tihna a ni a. Fak hla siamtuin ‘Ke te pawh i rawngbawl nan tlang takin kal fo sela’ a tih angin Lal Isua, a hniaka kan zuinaah hian inpeih ata hmalam pan tura kan din ngheh a ngai a ni.
4. Rinna phaw la ula: Rom sipaiten hmêlma thal alh laka an invenna tura an siam, Phaw tha mi an hmang thin angin mihring chakna ni lovin Pathian rinna (Chakna) tak tak chu inven nâna hmangin tihna a ni. Zakaria 4:6-ah chuan ‘Chakna ni lovin, thiltihtheihna ni hek lovin, ka thlarau zâwkin le’ tiin min hrilh a ni. Galatia 2:20-ah phei chuan Paula chuan ‘Tin, tûnah tisaa ka nung hi rinnaa nung ka ni’ tiin a sawi a ni. Thlêmna thlipui a lo tleh a, sual râl a lo lian a, rinhlelhnain min nuai pawhin Pathian rinna (Chakna) phaw-a hmangin setana thal alhte chu in timit thei ang tih a ni. I Johana 5:4-ah chuan ‘Pathian hrin tawh phawt chuan khawvel a ngam zel si a, hei hi a ni khawvel hneha ngamna chu, kan rinna hi’ tiin a sawi bawk.
5. Chhandamna Lukhum leh Thlarau ngunhnâm (Pathian Thu) la ula: Sual nena indona chu eng anga harsa pawh ni se, sual hnehna chu (Chhandamna chu) Lalpa ta a ni tih hre rengin awm rawh u, Sipai lukhum chu Lu-a a bet a, hmelma silai mu laka a veng thin angin chhandamna chu i Lu, ngaihtuahna ril berah chuan a bet tlat tur a ni. Chu chhandamna chu hmelma Setana laka ringtute venghimtu a ni.
Thlarau ngunhnâm – Pathian Thu la ula – Sual râl do tura Thlarau ngunhnâm- Pathian thu tia a sawi hi, thu inziak tlar satliah mai ni lo, a hun leh a hmuna zira hman tura Pathianin min pek thin, kan thinlunga nunga a inpuanna thu a sawina a ni. Ringtu nunah chuan ni tinin chu chu a lo lang thin. Chu tak chu Pathian thu kan nuna thiltitheia a lo lanna chu a ni. Chutiang chu la rawh u, tiin min hrilh a ni.
6. Thlarauva tawngtai: Pathian nena inbia tihna a ni. Sipaihote Lalpa thu hmu lo leh a kaihhruaina tel lovin Setana râl lian hi kan do zo lovang. Min tirhna hmunah kalin, hmanrua min pêk hmangin sual râl kan do tur a ni. Sipaihote Lalpa thu awihna nen lo chuan hnehna kan chang lovang. Tawngtaina hi Lalpa nena wireless-a kan inbiakna a ni, chumi tel lo chuan engtin nge sual râl do dân kan hriat theih ang.
Ei leh In turin, an rilru a tibuai tawh lo, chu chuan II Timothea bung hnih thua Isua Krista sipai rinawm chungchang a sawina kha min hriat chhuahtir a ni. ‘Sipai tumah indo laiin tûn damchhung khawsaknate hian a intihnawk ngai lo va’ a tih kha. Kan râl do hi tisa leh thisen an ni lo va, vân hmunahte thlarau sualho awmte an ni zawk e, tiin min hrilh a. He indona hi Isua Krista ringtute chuan kan hmachhawn mek a ni, mahse kan nun dan en erawh chuan sual râl do tih pawh inhre lo ringtu, sual râl dona hmanraw tha thlang lova, damchhung khawsaknaa intihnawk ringtu kan ni ang tih hi kan Pathianin a huat ber leh hnawksak a tih êm em chu a ni. Chuvang chuan sual ral in do hi in hneh theihna turin ‘Ka râlthuam famkim chu la rawh u,’ min ti a ni.
He indonaah hian tel ve niin i inhria em ? Indona chu Lalpa indona a ni a, hnehna chu Lalpa ta a ni tih hi i ngaihtuah ngai em ? Pathianin hmanrua a pek che nge i thlan thin, he khawvel thil hi ni ang le.
Ka chakna Lalpa, ka dinchhan ber, sual leh ramhuaite hnehtu;
Ka zam lawng Lalpan a thu malsawm rawh se.