PATHIAN KHAWNGAIHNA
C. Lalhmingmawii
Chutichuan unaute u, Pathian khawngaihna avâng hian, inthawina nung leh thianghlim leh Pathian lawm tlâk ni tûrin in taksa chu inhlânah ka ngên a che u; chu chu in rawngbâwlna awm rêng a ni. He khawvêl dân ang hian awm suh ula; Pathian duhzâwng a tha leh lawm tlâk leh, that famkim chu in hriatfiah theih nân, in rilru athara awmin lo danglam zâwk tawh rawh u. (Rom 12:1,2)
Kan tih leh thawh ve awm miah lovin Isua Kristaah chuan Lalpan a khawngaihnain min chhandam a. Chu khawngaihna chu rinnain kan lo dawngsawng a, nun leh thiltihin kan tilang thîn. Khawngaihna chuan, chatuan hremna min pumpelh tîrin chatuan nunna min chantîr ta a ni.
Pathian khawngaihna hi tâwpchin nei lo khawngaihna a nih avângin vawi tam tak a khawngaihna hnartute min la khawngaih cheuva, a hming sawichhetu leh ânchhelawh thîntute pawh min la khawngaih cheuva, heti êm êma khawngaihna mak, thûk leh ropui hi hrethiam lovin, ‘Pathianin min khawngaih tho’ tiin khawngaihna hunah hian sual tih kan ngampat phah niin a lang. Pathian Khawngaihna hi sawi ve thin mah ila, sual kan sim duh chuan si loh chuan khawngaihna hi kan la man fuh tâwk lo a ni ang. Eng anga sual pawh ni mah ila, Pathian hian a khawngaihna leh zahngaihna avângin kan sualte min thungrûl mai si lova, Pathian khawngaihna nasa lutuk hi kan sual phah mah zâwk thîn niin a lang. Pathianin Khawngaihna hun tlêmte min pêkah hian enganga nung tûr nge kan nih a, engtianga hun hmang tûr nge kan nih le?
Khawngaihna dawngtu, man fuhtute chuan sual simin nun thar, nun danglam an nei a, an tih thin leh an duhzâwngte kalsanin Lalpa duhzâwng engnge ni tih ngaihtuah chung leh a lawm tlâk ni tûrin a khawngaihtu Lalpa tân an nun leh hun an hmang thîn. Chu khawngaihna chuan amah ringtute chu min chawisâng a, kan nih phâk loh min nih tîr a, kan theih hauh lohte min theih tîrin, kan ngam hauh lohte min ngamtîr thîn a ni. Harsatna, lungngaihna leh thlemna, hlauhawm tam tak karah chhel taka kan awm a, kan chatuan in kan thlen theih nan chu khawngaihna mak tak chu amah ringtute hruaitu tur a ni.
Pathian khawngaihna hi a nasain a thûk êm a, nakinah a khawngaihna ângchhûngah chuan ka la tlulût ang a, khawngaihnain min lo ngaidamin min lo la pawm tho ang tiin i nghâk khawtlai lovang u. Jakoba chuan, naktûkah chuan engnge lo awm dâwn tih pawh in hre si lo. In nunna chu engnge ni? Chhum rei lo tê lo lang a, ral leh ta mai thîn ang hi in ni si a. (Jakoba 4:14) min ti a ni. Pathian khawngaihna hi a nasain a thûk kan tih ang chiah hian Pathian thinurna leh phuba lâkna hi a la nasa dâwn a ni.Kan Pathian hi khawngaihna leh hmangaihnaa khat a nih mêk laiin, kan Pathian hi kanral hmang mei, thîkthuchhe tak Pathian a ni (Deut.4:24) tih i hre thar leh ang u. Khawngaihna hun kan hman mêkah, Lal Isua tel lova nung mai maite pawh hian kan hun tâwp a lo thlen dâwn chuan tûna kan mamawh loh Lal Isua tho hi kan la mamawh ngei ngei dawn. Chutiang a nih avâng chuan, kan sualna te, kan ngaihtuah fel lote bânsanin hawh u; LALPA hnenah i kir ang u, inhlân thar ang u. Tichuan anin min lo khawngaih ang a, min lo ngaidam nasa khawp dawn si a. (Isaia 55: 7)
Khawngaihna mak, mawi leh duhawm,
Sual riangvai chhandamna;
Suala bo hnu min zawng hmu ta,
Mitdel mitvârna chu.
Lalpan a thu malsawm rawh se.