RAWNGBAWLNA
-Sentea Ralte
‘Lalpa Lalpa mi ti nazawng chu van ramah an lut lo vang a, ka Pa vana mi duhzawng titu te erawh chu an lut ang. Chu mi niah chuan mi tam takin, ‘Lalpa, Lalpa, i hmingin thute kan sawiin, i hmingin ramhuaite kan hnawtchhuakin, i hmingin thilmak tamtak kan ti thin lo vem ni, an la ti ang. Chumi hunah chuan, Nangni thil sual tite u ka hre ngai lova che u, kan hnena ta kal bo rawh u,’ ka la ti ang.
Rawngbawlna kan tih hi enge ni? Eng chen hi nge rawngbawlna chuan a huam a, khawilai tak hi nge rawngbawlna chu ni ang. Rawngbawlna han tih hian mi hrang hrangin a, kan hrilhfiah dan hi a in ang lo thei viau mai thei a ni. Mi tana thil tha tih a, kan mihringpuite tanpui hi a ni mai em? ‘Kohhran leh khawtlang a, kan theih ang tawk leh kan phak ang tawk a kan in hman ve hian rawngbawl chu kan ni mai a ni lawm ni,’ tiin mi tamtak chuan kan chhang mai thei a ni. Mi thenkhat chu kohhran hnuaiah an thawk a, thenkhat missionary-te niin rawng an bawl a. Thenkhatte erawh chu evangelist niin rawngbawl tho in an chhuak bawk a. Chutih laiin kohhran nen a in zawmna em em awm hran chuang miah lo in sawrkar hna te leh private company hnuaiah te an thawk bawk a. Mahse, “Ka rawngbawlna a ni.” tiin an la sawi ve tho bawk a.
Kohhran hnuai a full time a thawk ho rau rau ah pawh thenkhat zirtirtu an ni a, thenkhat in motor an khalh a, thenkhatin direct takin ringlote hnenah Pathian thu an hrilh a. Thenkhat office-ah buai takin hna thawkin an lo awm ve thung a. Tin, keimahni Local church theuh lo thlir leh ta ila, thenkhat chu pawl hrang hrangah FOD hrang hrangah OB-te leh committee peng hrang hrangah mawhphurhna pawimawh tak tak neiin, buai em em in, rawng kan bawl an ti ve bawk a. Heng zawng zawng han ngaihtuah hian tute hi nge rawngbawltu chu ni ta ber ang. Eng ang pawn sawi hnawm tum ila, an vai hian anmahni zawnah chuan rawngbawltu chu an ni vek a, an rawngbawl dan kawng a in ang lo mai a ni.
Hetah tak hian pawimawh ta chu a rawng kan bawlsak Pathian hian, Ama rawngbawltuah min ngai em? tih lai tak hi kan ngaihtuah ngun ngai leh nitin a kan inenfiahna tur chu niin a lang. A rawng kan bawl ber hian a rawngbawltu anga min ngaih loh chuan kan thil tih zawng zawng hian awmzia a nei ngai dawn lo reng reng a ni. A chunga Bible chang kan tarlan ang khian Pathian tana ti ni a, inngai ve si hian nakina a hma a kan la din hunah chuan, ‘Nangni thil sual tite u ka hre ngai lova che u.’ min la ti ve ang tih hi a hlauhawm hle a ni. Chuti a nih si chuan, eng hi nge rawngbawlna chu ni ata anga, khawilai tak hi nge Pathian-in, a a rawngbawltute anga a ngaihna lai point tak chu ni ta ang le. Thil kan tih reng rengah hian a pawimawh ber fo ni a lang chu, enge ka tih chhan, engvanga ti nge ka ni tih leh, tu tan a ti nge ka nih tih lai hi apawimawh ber fo thin a ni. Chuta tanga lo lang chiang ta chu rawngbawlna anga kan hriat ho pawh hi kan tih chhan a dik loh chuan, chu chu Pathian ngaihin rawngbawlna a lo tling ngai reng reng dawn lo a ni. Kan tih chhan leh kan tihsaka kha kan chian loh chuan hah em em ve si leh thahnem ngai ve em em si. Mahse, engmah sawt chuang si lo leh rah tha engmah hmuh tur awm chuang silo hian a lo awm theih viau mai thei a ni.
I Korinth 10:31 ah chuan, “Chutichuan in ei pawhin, in in pawhin, in tih apiangah pawh, Pathian ropuina tur hlirin ti rawh u” tiin min hrilh a. Chuti anih chuan kan thil ei leh in ringawt pawh chu Pathian ropuina tura kan tih chuan, chu chu rawngbawlna chu a lo tling ve ta mai a ni. Kohhran hnuaia thawk kan ni emaw, sawrkar hna ka thawk pawh a ni thei e. Anih loh pawn lehkha ka la zir emaw mi hnuaiah, inhlawhfa in hna ka thawk pawh a ni thei. Kan tih chu engpawh lo ni rawh se, Pathian ropuina tur hlir a kan ti a nih chuan, chu chu Pathianin khawngaihna avangin rawngbawlna ah min lo pawmsak ve mai zawk a ni. Engemaw tak kan va tih avang khan rawng kan va bawl lua bik a ni lo a,kan tih apianga Pathian ropuina tur a kan tih kha rawngbawlna chu a lo ni mai a ni.
Pathian tana rilru leh thinlung taka thil kan tih chuan rinawmnate, taimaknate, thahnemngaihate hi amah in a rawn keng tel ve mai thin a ni. Chuvangin, kan thiltih chhanah hian chiang ila, eng tana tinge kan nih leh, tu tana ti nge kan nih tih ah hian chiang thar fo ang u. Kolosa 3:23 ah chuan, “A rulhna roluahtur chu Lalpa hnen ata in hmu dawn tih hriain, in tih apiang chu mihring tan anga ti lovin, Lalpa tan anga ti zawkin, chak takin ti rawh u; Lalpa Krista rawng in bawl a nih hi.” tiin min hrilh a ni. Eng mi pawh ni ila, eng hnathawk pawh ni ila kan thil tih apiang hi, kan tih chhan leh kan tih sak hi Pathian lo ni fo rawh se.