PHUN NGHEH
“Rinna avângin Krista chu in thinlungah chêng sela, hmangaihnaah zung kaiin phun ngheh in ni dâwn nia. Tichuan, mi thianghlim zawng zawng nên a hmangaihna zauzia te, seizia te, sânzia te, thûkzia te chiang takin in hre tlâng thei ang. Krista hmangaihna hriat sên rual loh chu in hria ang a, Pathian famkimna tinrênga tihkhah in lo ni ang.” Ephesi 3:17-19
Bible lehlin hlui zawk ka hriatthiam loh deuh vangin lehlin thar ka hmang ta mai. Ringtu tana thil pawimawh tak chu phun ngheh tih hi a ni awm e. Ringtu nun nghet lo leh thli chhem vel ang mai, ringtu nun neitu nih hi kan duh lo theuh mai awm e.
Engtinnge kan ringtu nun chu a lo ngheh ang? tih lai hi kan buaina fo chu niin ka lo hre ve thin. Ephesi 3:17 thu-ah hian kan hmu a ni. Pathian fapa, nangmah chhandamtu chu i thinlungah a cheng a ni tih i ring tur a ni. “Rinna hi thil beiseite awm ngeia hriatna, thil hmuh lohte hriatfiahna a ni,” a ti (Hebrai 11:1). “Rinna lovin ama lâwmzâwng mi nih rual a ni lo; Pathian hnêna lo kal chuanin, ani chu a awm tih leh zawngtute hnêna lâwmman pêk hmang a ni tih rin tûr a ni,” tiin a ziak a ni (Hebrai 11:6). Lal Isua hnena kan inpek hnu hian khawi vengah emaw, khawi Biakinah emaw, khawi thuriltu bulah emaw, i mi ngaihsan bulah emaw Krista cheng tura kan rin tlatna hian kan ringtu hi a ti nep em em mai a ni.
I lo piangthar a nih chuan i thinlungah Krista chuan a chen chilh che a ni tih i ring bur mai tur a ni. Chu Krista midangte hmuh ve si loh a, i thinlunga cheng chuan, sual kawng i zawh tur chu a lo khap tawh mai dawn a ni. Midang chunga rinna nghah ai chuan Krista a rinna nghat leh Krista thinlunga chentir thin mi te hi phun nghehin an lo awm thin a ni. “Mihring rinchhan ai chuan Lalpa hnêna tlûkluh a tha zâwk a.” Sam 118:8.
Hmasa tur chu chhunglam nun a ni. Hei tak hi kan hriat thelh fo thin a ni. Mi hmuh loh lai taka kan nun hian Krista keimahni a en chhuahna chu a ni tlat si a ni. Ringtu ni si, kan chhungril nun lama Pathian duh loh zawng ti reng chung si nun chu a hahthlak. Ringtu phunchiar tak i nih chuan mahni nun in en fiah hi a tha a ni. “Nang erawh chuan i tawngtaiin, i pindan chhungrilah lut la, i kawng khar la, i Pa a ruka awm hnenah chuan tawngtai rawh; tichuan, i Pa a ruka hmu thintu chuan a rul ang che” Chhunglam nun dik ringtu chuan thlarau rah hrang hrang hi an rawn nun chhuah pui mai thin a ni. A har viau thin mahse i tum tur a ni, Thlarau thianghlim zarah hnehtu i ni ang. Tum ve phawt mai rawh Krista i thinlunga cheng khan sual a ngai thei miau si lo a.
“Lalpa chuan, Lalpa thu zawm chu a lawm angin halral thil hlan te leh inthawina te hi a lawm em ni?” Heng kawng tam taka, Pathian hnena inhlanna ni a kan hriat lamte leh Pathian hnena kan rawngbawlna nia kan hriat lamahte nasa taka kan beihna ai mah hian Lalpa hi a thu zawmte chungah hian a lawm zawk a ni. Pathian rawngbawlin nasa taka ke pen in ring takin au mah ila, kan chhungril nuna Lalpa duh loh zawng nena kan in chiah piah reng si chuan Saula ang hian hnawl in kan awm ve thei tho a ni. Saula pawh khan a thau thaute kha inthawina atan a rawn la ve tho a. Mahse, Pathian thupek chuan tiboral vek rawh a ti a ni a. Saula chungah Pathian a lungni lo a nih kha. “Nangnin mi hmangaih chuan, ka thupêkte in zâwm ang.” Johana 14:5 Isuan a ti a ni. “Inthawina aiin khawngaihna ka duh e,” Matt. 12:7 He thu ngei pawh hi Isua Krista sawi kha a ni. Hei hian Pathian rilru kha a ti lang chiang em em mai a ni. I rawngbawlnaah, Krista nagmaha awm khawngaihna leh hmangaihna tel fo ang che. (Mihring khawngaihna leh hmangaihna tawp chin nei ni lo Krista hmangaihna leh khawngaihna zawk chu).
Anih leh khawngaihnate, hmangaihnate, Pathian duh zawngte chu engtin nge kan lo hriat ang? A chhanna chu Bible atangin. Tunlai thalaite hi chuan mi relte, a niang tia thil sawi chiamte kan duh loh viau thin kha. Pathian thu pawh hi mi sawi ni lo hian mahni in chhiar tam ila hei ai hian kan chak zawk ngei ang. “I chungah thil sual ka tih loh nân, I thu ka thinlungah ka vawng tlat a.” Sam 118:11 tih a nih kha. Amaherawhchu, Isua Krista chanchin hi i thlur bing hmasa phawt ang u. Isua duh zawng hre chiang mang si lo a Sakawlh chanchin zir vak te pawh awm ve thei a ni. UID leh Sakawlh chung chang, Bible dik lohna lai hre zuah zuah deuh, Krista hmangaihna leh khawngaihna sawi tur hre lo i nih chuan Pathian chhandamna hmu turin Krawsah kir rawh. “Isuan a chhâng a, Johana 14:6 “Keimah hi kawng leh thutak leh nunna chu ka ni; keimaha kal lo chu tu mah Pa hnên an thleng ngai lo” Isuan a ti a ni. Tunge i zui hrechiang hmasa turin Pathian hian min duhin min la ko reng a ni. Krista ah chuan keini Serkawn TKP te hi phun ngheha kan awm theih nan Isua chanchin hi i zirin i bel chiang zual zel ang u hmiang tiin ka han in sawm thar leh a ni e.