KRISTA AIAWHTU
Luka 12:15 “Fimkhur ula, awhna reng reng lakah chuan inveng rawh u; sum ngah hi mihring dam chhan a ni lo ve,” a ti a.
Mihring hlutna emaw dam chhan emaw hi sum a ni lo ve tihna a ni. New Living Translation-ah khan saptawngin “Life is not measured by how much you own” tih a ni a. Hlutna emaw ti pawn let ila a sual lutuk awm lo e. Awhna laka in veng fimkhur tur hian Bible hian min duh em em a ni. Kan awh lutukna avang hian thil tam tak kan tisual thin a ni. A bik takin Mizote phei hi chu mak deuh a ni. Lunglei-Aizawl inkar kawng ni khat vel an tlang lo a. Petrol awmsa zawng zawng lak zawh tum ni awm takin kan intlar a, Black Petrol nen nasa takin demand-a awm nghal a. Highway kawng hi rei tak tlang loin a awm loh hmel bawk si. State Capital dawttu tlawh pawh theih lohin rei tak a awm hmel bawk si lo. Heti taka petrol kan in chuh thin te, hman deuhah pawh chi chung changah, kan intihdera kan lei tun tun a nih kha. Sa leina leh ATM intlarna thlengin, he Awhna emaw mahni hmasialna (mahni kan puar chuan mahni ringtu puite pawn tuar se pawi tih lohna) hian Zoram ringtute hi min va tibuai tak em. Dik tak sawi chuan thlarauva mi chuan mahni mihring puite a hmangaih tur a ni si. Pathian chu hmangaihna a ni si. Ringtute hian kan nihna leh khawvela kan awmchhan Isua aiawh (Ambassor for Christ) kan nihna hi kan theihnghilh zo ta em ni le. Han ngaihtuah ta ila, dik lo taka hleprute hi hausa hle mahse kan ngaihsan loh zia te hi han chhut ila. Piangthar lo kan tihte pawh hian heng te te-ah hian min lo ngaisang lo in Krista zui hi an lo chak vak lo a ni mai thei a sin. Chuvangin he thu hi i lo ngaihtuah leh ang u. “Tupawh ka lama tang lo chu, mi do a ni; tupawh mi lak khawmpui lo chuan, a tidarh a ni” Matthaia 12:30. Nangmah avangin Krista hi ngaihzawn awm takin a awm thei a ni.