KEINI MISUALTE TANA KRAWS HLUTNA
Alan Lalremruatpuia
Kraws hi Lal Isua’n chhandam kan nih theih nana a tawrhna hmun a ni a, he kraws a thihna leh thawhlehna avanga vawiin a Chatuan Nunna kawng a inhawng a ni tih ka pawm lo anih chuan sualin kan nunah hnehna a chang fo ang a, he khawvel thim tak hi kan la âr khaw thim dai chhoh pawp pawp dawn tihna a ni. He khawvela mi thenkhat te tan chuan Kraws hian hlutna leh tangkaina a nei tam lem lo. Ringlo mi tan chuan he kraws hi âtna a ni a, a ropuina an hre fiah phak lova, an pawm ngai bawk hek lovang. He kraws thiltihtheihna leh khawngaihna lakah hian an thinlung mit tihdel tlat a ni si a. I Korinth 1:18 ‘Kraws thu chu boral mêkte tân chuan âtna a ni si a; keini chhandam mêkte tan erawh chuan Pathian thiltihtheihna a ni zawk e.’
HE KRAWS HI ENGE KAN TANA A HLUTNA CHU:-
1) Kawng min hawn sak: Johana 14:6 ‘Keimah hi kawng leh thutak leh nunna ka ni, keimaha kal lo chu tumah Pa hnênah an thleng ngai lo’ He kraws, Lal Isua’n kan tana a tawrhna hian keini misualte tan Amah nena kan inzawm leh theihna kawng min hawnsak a ni. He kraws kaltlang lo hian chatuan nunna kan neih theihna leh Amah Pathian nena kan inzawmna (relationship) neih theihna a awm lo a ni.
2) Kan sual ngaihdamna a ni: Ephesi 1:7 ‘A thisen avângin amahah chuan kan tlanna kan nei a ni – a khawngaihna ngahzia ang zêla kan bawhchhiatnate ngaihdamna chu.’ He kraws-a Lal Isua an khai kân a, chuta a thisen luangchhuak avang chuan kan sual tlanna/ngaihdamna kan hmu a ni. He kraws ah hian Lal Isuan kan sualnate zawng zawng a phur a, kan nat ai a na a, kan tawrh ai a tuar bawk a, keinin kan tawrh leh nat ngai ve tawh miah lovin. Heti khawpa keini misualte chunga a hmangaihna leh khawngaihna mak, mawi leh duhawm lantirtu Lal Isua hi kan hmangaih let ve thei dawn lawm ni?
3) Thil siamthar/mi thar kan ni: II Korinth 5:17 ‘Chumi avang chuan tupawh Kristaa a awm chuan thil siam thar a lo ni a; thil hluite chu a ral ta a, ngai teh u, a lo thar ta.’
Nunthar min pe a ni. Ngaihdam, silfai leh zalen ringawt kan ni mai lo va; nimahsela, Kristaah nun thar hlak leh fapa chanvo nihna min pe a ni. Sual bâwih nihna ata min chhuah zalen in, Pathian fa nihna chanvo ropui tak min pe a. Kan thinlung min thlak danglam sakin, kan sualna leh âtna zawng zawng ata min siamthar a ni.
Kei ngei pawh hi tun hma chuan Lal Isua min siamchhan leh min dinchhan hre lovin rei tak chhung chu ruihhlo bâwihah ka lo tang ve tawh a. Mahni nawmsak duh luatah chhungte’n an tuar a, thiante leh thenawm khawveng te thleng pawhin ka sualna avangin an tuar a, vawi tam an mittui ka ti tla a, an rilru ka lo hliam fo tawh a ni. Nimahsela, Lalpa’n ka sualna leh âtna zawng zawng ata min silfai vek tawh a, min lo tlan reng tawh a ni tih ka inhriatchhuah meuh chuan, kha ka nunhlui ngaiah khan ka awm reng duh tawh lova, Lalpa avangin misual, mite hmuhsit thin kha siamthar leh dinthar ka lo ni ta, Pathian min hmangaihna hi chu a va ropui em! Chhandamna hi midangte tan chauh amaw ka lo tih thin kha, ka tan pawh a lo ni ve reng si a. Chhandam ka nihna leh hmangaih ka nihna chu Isua Krista ngeiin ka tan kraws ah a rawn tilang a, chu a hmangaihna chuan ka thinlung a ti tuiral a. Kei misual min hmangaihna hi hmangaihna vêkin ka chhang let lo thei lo a ni.
Kalvari tlangah chuan Kross pathum a ding a. A sira Kross pahnihte chuan kan tan awmzia an nei lem lo. Misual thihna an ni mai. A laia Kross ding erawh hi chu tling lo min titlingtu, thiam lo thiamchanna a ni a. Thing tha an hmang emaw an cheimawiin an nawt mam bik emaw a ni chuang lo. Nimahsela, Pathian fapa, a taksa leh thisen hmanga nun nei lote hnena nunna pe theitu chuan hrehawmna, hmuhsitna leh na tinreng tuarin a nunna kan tan a hlan ta a. Pathian ni mahse, mihring ang chiaha na hre mi, hrehawm tuar thei, hlauh leh zah pawh hre miah a insiam a, hreh chung chungin, hlau chung chungin, na ti chung chungin a ni kan tan a tuar ni.
Kei zawng Kraws ka chhuang ber khawvel thil ai zawngin,
Tlinglo min ti tlingtu, thiamloh thiam channa;
Engkimah lungawi zelin, khenbeh nun ka chhar,
Fello min ti feltu Kraws ka chhuang a ni.