KAN HIMNA
Tupawh hian kan khua, kan in leh lo hi kan ngai thin, a chhan chu kan himna hmun, thlamuang taka kan awm theihna a nih vang a ni. A bik takin thalaite zingah pawisa leh hriselna tha kan neih lai hi chuan tumah mamawh lo, Pathian pawh mamawh lo, chhungte pawh mamawh lo hian a lo awm theih khawp mai a. Amaherawh, chu hlauhna, manganna leh harsatna kan han tawh meuh hi chuan inghahna tur kan lo mamawh thin khawp mai.
Chhungkua-ah natna khirh takte, thihnate, sum leh pai tlakchham hunte, thiltih theihna leh chakna reng neih lova in hriat hunte, kan mihringpuite’n min sawi chhiat a min do tlat hunte, mihring taka kan tlawm ngawih ngawih hunte leh harsatna dang tam tak kan chunga a lo thlen chang hian khawvela kan hmuh theih thil, kan neih leh hriat kan ro sum leh paite emaw, kan u leh nau, then leh rual, sorkar-a mi thiltitheite-ah emaw inghahna tur hi kan rilru hian a zawng hmasa leh fo thin. Tui tla in vawn tur a zawng ang mai a khawvel thilah beisei leh chuan tur engmah kan neih tawh loh hma hi chuan Pathian hnena 100% -a in nghah hi a lo har thin khawp a ni.
Lal Davida nun kawng chhukchhoh zia, harsatna leh buaina manganna in a tlak buak nasat zia chu Bible ah kan hmu thei a. Indona leh hmelmate hlauin a hun tam tak hmun himah a tlan chhia a. Sam kan chhiar chuan a inghahna ber chu Pathian a ni tih kan hre thei, “Nang chu ka kulhbing sang, Ka mangan nia ka inhumhimna i ni si thin a”(Sam 59:16) a ti a. Davida hian Pathian hi engkim ti thei, a dam khawchhuah na tura hmun him, amah zawngtute a kal san ngai lo (Sam 9:10) a ni tih a hria a, engpawh tawk se, A hnenah a tlu lut leh thin a ni. Rintlak Pathian a nih zia a hria a “mifel chu kalsana a awm ka hmu ngai lova, a thlahte chaw khawn pawh ka hmu ngai hek lo” (Sam 37:25) a ti a ni. A fapa Lal Solomona hnenah pawh “nang ka fapa Solomon, i pa Pathian hi hria la, thinlung tha famkim leh rilru phur takin a rawng bawl ang che; Lalpa chuan thinlung a en thin a, rilrua suangtuah zawng zawng hi a hre vek a ni; Amah i zawn chuan i hmu ang a, i hawisan erawh chuan kum khua in a thlauthla ang che” (I Chronicles 28: 9) tiin a thu rochhiah a sawi a ni.
Kan tana thi a tho leh Krista kan Pathian, mit ngeia a thawhlehna hmututen martar thlenga an rin leh an zui (I korinth 15: 3-8) “… kei kumkhuain, khawvel tawp thleng pawhin, in hnenah ka awm zel ang,” (Mathaia 28:20) titu khan min la awmpui reng a, kan chhandamna leh inhumhimna, innghahna tlak, amah zawngtute kalsan ngailo Pathian kan nei leh amah kan hria hi kan vannei em em a ni. He khawvel kan zin kawngah hian Lal Davida ang khan Amah hi kan himna ber a ni tih hre rengin A hnenah i awm reng ang u.