CHANCHIN THA
I Korinth 15:1-58 hi i han zir ho dawn teh ang. Saptawng hian ‘Good news’ tiin a dah a. Mizo Bible-ah erawh chuan Chanchin tha tiin kan sawi thung a ni. Ringtute hi abikin Mizo ringtu phei chu sharing emaw testimony emaw sawi a, lo ti ve deuh pap pap tawh vek kan ni awm e. Piangthar tawh phei hi chuan kan paltlang vek awm e. Sap leh Kristian hmasa te khan Testimony ril pui pui hi an sawi ve ngai em ka hre lem lo a, a tul ber kher em tih pawh hi ka lo chhut chiah lem lo a. Mahse, thil pawimawh erawh chu mite hmuhah Krista hi ka Lal leh Chhandamtu ah ka pawm tih puanchhuah hi chu Bible en in a dah pawimawh hle a ni.
Mizo Kristian hmasate ka ngaihsan ve deuhna pakhat han thailang ila. ‘Pathian thu awih’ tih an hminga an in vuah ngam kha a ni. Tunlai Kristian tam tak hian kan invuah ve ngam ang em? tih hi ka zawhna lian tak a ni. A ziaktupa ngei pawh hi a tim deuh duk a awm e. Ringtute hian testimony ril pui pui, Pathian thu ril pui pui te hi kan buaipuiin kan lawm lutuk ta em ni? tihte pawh hi in zawhna tham a ni. Chanchintha min pek buaipui em em chuang lem si lo a, Pathian hi engnge a nih tih, a rorel dan tur ni awm a kan hriatte, kan ngaihtuahna nen kan han sawngbawl chiam thin te hi a ngaihmawh awm em! ka lo ti ve mai mai thin. Bible-in a sawi chin hi pawm ve mai hi a hahdam zawkte hian ka lo hre thin a ni. I Johana 1:18 “Tuman eng lai mahin Pathian an hmu lo, a Fapa mal neih, Pa angchhunga awm ngei khan a chanchin a hril tawh a ni.” Thufing tawite hmanni a Instagram (Facebook ang deuh chi) a an rawn tarlan ka duh deuh mai chu. Ui hian rinawmna thumal hi a sawifiah thiam meuh lo, a sawi ril chiam ngai bawk hek lo. Mahse, a nundan hi mi rinawm nun dan a ni miau si a ni.
Thu hi han sawi ril viau mah sela, mihring nun a siam tha chuang em ni? Amaherawhchu, kan sawi rum viau ang tihna lam pawh chu a ni chuang lem lo. Hmangaihna vawrtawp chungchang sawi a, rum viau thu pawh awm chuang lo. Kan thusawi thiam avangin mi nunna a inthlak chuang em ni? Ka ziah thlum vangin mi nunna ka chhanchhuak em? Ka inpek zawh viau avangin mi an lo piangthar ta em? Kristian nun dan dik taka ka nun avangin mi nunna a in thlak em? Ni lo. Kalvari Kraws-a Pathian fapa Krista an khenbeh in mi sualte tana a tuar sak CHANCHIN THA rinna avangin mihring nun hi a inthlak hlawk zawk a ni. A la pangngai reng a ni. Hei tho hi a ni, tuna Piangthar duh lo ho pawh hian an mamawh chu a la ni tho. Thil demand hrang hrang nei mahse a la pangngai reng. Krista Kraws lo hi ringtute hian hmachhuan tur kan nei chuang lo. Kan va hmangaih viau pawn Kraws tello chuan nun inthlak thleng hlawkna hi a awm thei chuang lo a ni. Chuvangin, kan neih chhun Chanchin tha hi beidawng loin i tlangaupui zel ang u.