ZIRTIR SAWM LEH PAHNIH ZINGA MI
-Vanlalnghaka Hnamte
Zirtir sawm leh pahnihte kan ti ngawt tak na a, a lar lo ber mai hi ka rilruah a awm tlat mai a. Chuvangin, kan chhui zui bik deuh dawn a ni. Zirtir sawm leh pahnih zingah hian danglam riau bik (a tha zawng ni lem lo) a awm a. Chu mi chu, Juda Iskariot-a hi a ni awm e. Danglam dan tha vak lo a nih vang nge kan Bible-ah pawh hian a lang tam lo hle mai.
Chhuizaunate kan keu ve tak ngial a. Amaherawhchu, Bible sawi chin bak hi chu ka sawi huai ngam vak ta lo a ni. A hming awm zia hi Juda, Kerioth khaw chhuak tihna a ni mai awm e. Isua zirtirte zinga mi a ni. Amaherawhchu, a tawpa ramtiam chang ta lo leh mualpho em em mai kha a ni. A nuna kan zirtur hrang hrangte ti hian i lo dah chhin ila.
1. Isua zirtir ni tura koh a ni: Matthaia 10:1-7. Kan chhiar chuan Isuan sawm leh pahnihte a koh a, damlote tidam turte Chanchin tha hril tura a koh zingah khan a tel a ni. Tin, ramhuaite pawh an thu thuin, an awm a nih kha. Lalpa rawngbawltur emaw a hnung zui tura chiang taka koh a ni tih hi lo chhinchhiah ta ila.
2. Sum enkawltu a ni: Isua rawngbawlna kha puitu (donation) leh sum hmanga chhawmdawltu kha an awm ve neuh neuh a. Khang lo vawn fel a, an eitur leh kawng tinrenga lo buaipuitu atan khan Juda Iskariota hi an hmang niin a lang. Johana13:29 ah khan tangka ip vawngtu a nih thu kan hmu.
3. Isua a hmangaih lo/A hlepru thin: Johana 12:3-6. Kan chhiar chuan rukru a nih thu kan hmu a. Tangka ip a kawl a, a chhunga dah chu a lo la ru thin tih kan hmu. Heta tang hian Isua chawimawia a awm tur pawh kha a ngaihtuah hlei thei tawh lo a. Ama hlawkna tur tangka a lo hlep ruk theihna tur ngawt kha a lo ngaihtuah tawh tih a hriat theih awm e. Marin Isua hriak rimtui an chulh vel pawh khan, thiam takin mi retheite a ngaihsak vang ni awm tak khan an in sawi kual vel ta a nih kha. Isua a hmangaih loh avangin chawimawia a awm pawh kha tha a ti ve vak tawh lo
a ni.
4. Lemchan thiam a ni: Mak ve ang reng tak chu, Isua khan a phatsantu tur kha an sawi thin a. Zanriah hnuhnung an kil lai pawh khan, chhangthemte a chiah a, an eitir thul a. An hre chhuak lo reng reng nia! Johana 13:28-29 kan chhiar chuan chakkhai emaw miretheite hnena thilpek pek tir turin emaw a tirhchhuah an la ti tho mai. Isua a mantir dawn pawh khan Rabbi tiin, hmangaih awm tak khan an va fawp der vel a nih kha.
5. Phatsantu a ni:A duhamna kha a lo pung ve zel a ni ang chu, Pharisai hote hnenah khan tangka sawmthum in Isua kha a lo hralh fel der mai a ni. A chhan tak hi sawi chian tak Bible ah hian a awm lo ni in ka hria. Tin, Juda hian engvanga han hralh ngawt nge, engnge a tum tih pawh sawi chian fak kan hmu lem lo. Sum a itna vang ti pawn sawi ila kan sawi sual lutuk hmel loh.
6. A inchhir: Juda Iskariot-a hi a in chhir ve hle a ni. Matthaia 27:1-5 kan chhiar chuan, “Mithiam thisen ka mantir kha” tiin a tawngchhuak hial a ni. A tangka pawh chu la lo in, hmunthianghlimah a vawm lut a, a inawkhlum ta a ni. Tirhkohte thi l ti h kan chhi ar chuan 1: 18 ah hi an a bawkkhupin a tla a, a rilte a chhuak tiin a ziak ve thung a. Engpawh chu ni se la. A inchhir ngei a ni. Mahse, ngaihdamna a chang ta lo. Juda Iskariot-a nunah hian ringtute hian zirtur tam tak kan nei. A ni pawh chhandam tura kohte zinga mi. Isua thlan a ni ngei mai.
Amaherawhchu, a duh leh a chak zawng, a thlemna tawnte a hneh zo lo. Isuan khan tehkhin thu tam takin, sum ngainat loh tur tih kha a sawi a ni. A ruk khan sual chhungkhung a nei khiau mai a. Chumi a thiltih sual chu a lo thang lian zel a. A tawpah chuan Isua ngei mai, duh taka a zui chu a lo phatsan ta a ni. Juda hian Lal Isua hi an khengbet dawn tih hre sa se, a hralh kher kan ring em? Keini pawh hian Lalpa hmuha thil sual tih kan hriat chian reng hi chu Krista zuitu kan nih ang hian sim ngam ila a tha a ni. Sual hian sual dang a hring zel a, a inthlah pung te pawh ti ila a sual awm lo e. Chuvangin, kan sual hriat reng te hi chu paih hmak tur a lo ni e. Sual te tak te, pawi tham lo a, kan ngaih hian min tihlum thin a ni.
A inchhir, mahse ngaihdamna leh khawngaihna zawng ta lo chuan, amah leh amah a inhrem ve ngawt mai a ni. Kan sual tih kan hriat hian, keimahni chinfel theih ngawt a ni lo.Min chinfel saktu tur Krista hi pan mai tur a ni. Petera, phatsantu, Krista hnena a tlu lut ang khan kan tlu lut ve tur a ni.
“Aw Lalpa, Keini ringtu, i rawngbawltute hi Juda Iskariot-a anga thiamloh changa kan awm loh nan, min tanpui ang che. Krista hi kan hmangaih ber theih nan min pui ang che. I tel lo chuan kan kal ngam lo e. Amen.”