TUMKAU NI, KRAWS KALKAWNG CHU
Luka 19 : 38 “Lalpa hminga Lal lokal chu fakin awm rawh se, vanah remthu leng sela, chungnung berah khian ropuina awm se” tiin Pathian an fak ta a.
Isua Krista Tumkau Ni a Jerusalem a kal tlang ni khan hmelhriat chi hrang hrang a chhar thar a. Chungte chu tawite in i han chhui ila.
1. Ngaisangtu : Amah ngaisang em em tu mipui, chhawl lo phah a, amah lawmna hla lo sak sak tu te. Rom sawrkar chak tak laka chhandam theitu ni a an ngaih. Ram tana revolutionary movement thlen thei tur khawp a, mi hneh theihna neitu ni a an hriat kha a ni miau a. Isua kha an sakhaw hotute tihsual pawh hlau miah lo a zilhhau ngamtu a nih avangin mipui hero kha a ni.Chumai bakah, damlote tidamin, miten an ten nawhchizuarte a kawm a, misualte hnenah a thleng thin bawk. Chumi piah lamah mipuite a hrai puar a, thilmak tak tak a ti bawk a ni. Heng zawng zawng hi chiang taka kan en chuan Isua hi khang hun lai khan hnam leh ram hmangaihtu hruaitu ropui tak ang ni a, an hmuh vangte pawh a ni thei ang. Amaherawhchu, mipuite hian Pathian fapa angin an hmu em? tih erawh zawhna pawimawh tak a ni thei ang. Isua Josepha fapa anga an hmuhna kha kawng tam takin a la awm bawk a ni. An mamawh leh an duhna kawng ni a lang, An ei leh bar dinhmun a chhiat em avangin chhanchhuah an ngai em em, hrek retheih an ni. Tin, Rom sawrkar hnuai atanga chhuah zalen kha an chak em em a ni. An harsatna ni a an hriat (Mihringte mit atangin) chhandamtu atan khan an duh a ni. Chuvangin, an lo lawm em em a ni. He Tumkau ni ah hian Isua’n amah ngaisangtu a chhar ti ila kan tisual awm lo e.
Tunlai kan khawvelah hian hetiang ang taka Lal Isua ngaisangtu hi an awm ve teuh awm e. Entirna tha tak chu India hnampa Mahatma Gandhi a kha a ni awm e. Isua kha chu a ngaisang khawp mai. Amaherawhchu, Isua ngaisangtute khan a kar leh maiah chuan, “Khengbet rawh” tia au tute kha an ni leh si a nih kha. Lal Isua ngaisangtu nih ah, i duh tawk dawn nge, Kraws thleng rakin Lal Isua i zui ang a, engmah ui then nei lo in, Kraws lerah chuan i va thih chilh ve dawn tih hi Kristian i nih dawn chuan i in zawh hmasak ber tur a ni e. Chu Kraws ler a, va in pumpek loh chuan Krista chhandamna reng a hmuh theih si loh. Mahni duhna chin leh malsawmna duhna chin chauha Lalpa au thintu nih kan duh tawk chuan Isua ngaisangtu nih ah hian kan la lawm tawk tihna a ni ang. Amaherawhchu, a hrehawm emaw, a nuam emaw, Lalpa nang lo chu belh tur dang ka nei lo, ka chak zawng ni lo mah sela i thu angin ka nun hman ka tum ang e ti thin tu te hi, Isua zuitu (Zirtirte) kan tihte chu an ni e.
2. Amah hawtute: Thalai tawng takin Isua chet dan ei lo tute kha an awm ve tho mai. Pharisai-te leh midangte a zirtirte ho ngawi tura duhtu, an au hla leh chawimawina hla sa ringawt pawh lo tei thei lo em em tute kha an awm ve a ni. A chhan tam tak a awm thei awm e.Isua hnenah ngawi tura, khap tura an han tih khan Isuan hengho hi an au loh chuan lungte an au ang a ti mai anih kha. Isua tan hian, amah hawtu neih hi thil thar a ni hran lo, mi rel leh sawichhiat rawn kha a ni ve hrim hrim. Isuan a hriat chian em em chu amah hawtute ho chhandam tur khan Kraws a la pu dawn a ni tih kha. Amah chawimawi a awm hlau em em, lo duh lo em em tute tan pawh Pathian thu angin a nun a la hlan dawn a ni tih kha a hrechiang em em a ni. “Pathian in khawvel a hmangaih em em a, chutichuan a Fapa mal neih chhun a pe a, amah chu tupawh aring apiang an boral loh va, chatuana nunna an neih zawk nan” Johana 3:16.
A pawimawh ber chu Isua hawtute zinga mi i ni thin nge? Isua ngaisangtu zinga mi i lo nih ve thin? tih ai chuan Pathian in a fapa i tana a pek hi, i lawmzawng, i hlimna thin aiin i duh in i thlang zawk em. I tana thil tha ber, a aia thlan tur dang awm tawh lo, i engkim ai pawha thlan zawkah i lo nei ve tawh em? Chutiang mi chu amah chawimawi turin Pathian in a zawng mek zel e. Hosanna Lalpa hminga lo kal chawimawitu tur atan nang leh kei hi Pathian in min ko a ni.