PÊKHMANG PATHIAN LEH RÛKHMANG DIABOLA
JOHANA 10:7-11
RC Lalhlimawma
Lecturer, JBS
KAMKEUNA – Beram Huangah a ni emaw an tlatna hmun, Berampuin a hriatpui phaka an awma him taka awm thei tur ni si, mahse tal hran duh tlatnain an rilru a hneh em avanga Setana thang kama awk leh nge nge thin ta te kan hmuha mihring pawh kan na a nih ngai chuan, kan Lalpa Isua Krista rilru nat turzia hi mihring ngaihtuahna hian a chhut thleng pha chiah angem tihte hi ka ngaihtuah rauh rauh thin. Chumi a nih avang chuan “Rukhmang Diabola” hmalak dan nen khaikhin a, “Pe thintu Lalpa” hmangaihna lo ropuizia leh a inphalna namai lohzia hi ziah tul tihna ka nei a ni.
1. RUKHMANG CHUAN A RU A, A TIHLUM A, A TICHHE THIN. MAHSE, LALPA BERAMTE ERAWH CHUAN AN HNAWL THUNG
Berampu Tha Isua chungchang inziahna kan chhiar chuan, a tihdan ep chiaha che ve thin, rukhmang chungchang tarlan a ni a. Chu rukhmangin a thiltum lian ber chu a chhe thei ang bera a rawkte hnutchhiah a ni. Chungte chu- a ru a, a tihlum a, a duhtawk lo, tihchhiat hram pawh a la duh. A rawka te chu hmabak sawi tur engmah nei tawh lo tur khawpa tlabala siam a ni tawp mai a. A rawk hma hauh pawha a rilruin a suangtuah ram chu hetiang hi a nih tlat avangin he rukhmang laka inthiarfihlim duh tlat, Lalpa beramte chuan a thu an awih ngai lo tih hi Chang 8-na hian a tifiah em em a ni.
2. BERAM KAWNGKHARA LUT TEN EI TUR AN HMU
Helai thu hi a mawng bul amanga chhui chuan ‘ei tur hmu’ satliah a ni ngawt lo va, hmabâk êng tak neia thanlenna a kâwk tel bawk a ni. LALPAN a beramte hi riltamin a siam dawn lova, ei tur pek leh thanlentir hi a tum a ni tih Chang 9-na hian min zirtir a tum chu a ni. Beram kawngkhar-Lal Isua hian ei tur awmnaah min hruai `hin tih hi a ni. Lal Isua thu ngai pawimawhtu a beramten ei tur an hmuh reng laiin, a thu ngai pawimawh lotute erawh chu sakeibaknei riltâm anga a sa seh tur zawnga phi ruai thin Diabola inhnangfâkna turin a chawah an hmang leh mai thin.
3. LALPAN A BERAMTE A HUM THIN A, A THA BER HMANGIN MAL A SAWM THIN
Lalpan a thlawna min pek tawh sa Nunna hi min humsak mai ni lovin, a aia nasa min pek pawh a duh a. Rukhmang, Diabola erawh chuan hmabak engmah nei lova min siam a tum tlat reng thung. A tha ve tho nia kan hriat kan buaipui luat tukah hian mi tam tak chuan kan nih leh neih tur tam tak hi kan chân phah thin. Lal Isua nen erawh chuan a tha ber a ni zel a, Beram Kawngkhar tia Lal Isuan amah leh amah a insawi hian, amah pantute chuan heng zawng zawng hi kan ta tur a nihzia a hril tel nghal vek a tih theih awm e. Mahse, kan duhzawng leh châk zawngte hmanga thlemtu aw lo thlengte kalsan a, Pathian duhzawng anga awm tura Beram kawngkhar Lal Isua Kan panna hi mihring nuna a harsa lai tak leh mihring kan ralna a nih chinna erawh hi chu Thlarau Thianghlim manpuinna dil chunga kan man fuh thiam deuh deuh a ngai thung ang.
TLANGKAWMNA – Hlauh nei thin, mahni inkhawngaih leh inhmangaih ve em em kan ni theuh tih hi Lalpan a hmuh hmaih lo; chu chu Lalpa Dan bawhchhe tawhtu, mihring zia a nih tlat avangin. Amaherawhchu, he thu hmang hian Lalpan i nihna, ka nihna a nemnghet tawh, chatuan atan Lal Isua Krista chu Beram Kawngkhar a ni dawn a, keini a beram chu kan ni. A beramte Lalpan a hloh ngai lo. Fa nihna thlarau hmu tawh kan nih tawh si chuan engvangin nge rukhmang vang hian kan hlauh tehlul ang ni. Beram kawngkhar boral mekte pawh Lalpa Beram Huangah him taka awn awm lej tjej nan mawhphurhna pek tel kan ni bawk tih hi Lalpa Kohhrante hian hria ila, chumi atana thisena a leite kan ni tih hi vawng tlat ang u.