SIMNA
Tv. Vanlalnghaka Hnamte
Simna hi Bible ah hian hmun tam takah kan hmu awm e. Simna leh Pathian lungawina hi a inzawm tlat tih theih a ni. A pawimawh hle mai. Simna kan tih hian mizo ten kan hriat thiamna hi a pawn lang deuh em aw a tih theih. Meizial zuk kan nghei ang ni lo in kir leh tawh ngai lo tura thlak danglamna hi simna chu kan ti thei ang. A hmaa meizial tui ti em em tu khan kha meizial kha a tui a ti tawh lo in, zawi zawia thihna tur a ni tih a hmuhna chiahah khan simna tluan tling chu a ni. A ngaihtuahna kha thlak danglam a ni a, a hmaa a duh zawng kha a haw ta thin a ni. Thil tih thin tih tawh loh leh rilru inthlak thlengna atangin simna (repentance) hi a lo awm a ni.
Isua Krista he khawvela a lo kal dawn khan, Baptistu Johana khan simna leh Pathian ram lo thlen tur thu a tlangau pui anih kha, (Matthaia 3:7 ah khan Pharisai leh Saddukaite tam tak simna Baptisma chang turte pawh an awm thu kan hmu.) Baptistu Johana khan Lalpa lamlian a sialna kawnga a thu (message) ken pawimawh tak mai chu simna (repentance) hi a ni awm e. Khang hun laia mi tam tak khan simna baptisma an chang a nih kha. Pathian rama luh duh tuten an hriat ngei ngei tur chu simna hi a ni ve tlat mai a ni. Awm ngaia awm renga, sual nena in chiah piah reng chunga Pathian rama luh tum tlat hi thil theih niin a lang tlat lo a ni. Thuthlung hlui bu ngun taka kan en chuan, Israel fate Pathianin a chhanchhuah dawn reng reng hian he simna leh Pathian hnena hrehawm ti tak leh inchhir taka an tawngtai hi kan hmu ziah a ni.
Isua Krista Chanchin Tha hrilh hi i han bih chiang ve leh ila: Marka 1:14-15 ah khan Isuan, “Hun chu a lo thleng ta a, Pathian ram pawh a lo hnai ta; sim ula Chanchin Tha hi ring rawh u,” a ti zel a. Hei hi Isuan rawngbawlna in tanna kha a ni. Simna leh Chanchin Tha ring tura sawmna hi a ni. Sam 51:17 “Pathian duhzawng inthawinate chu thlarau lungchhia hi a ni. Aw Pathian, thinlung lungchhia leh inchhir ngawih ngawih hi i hmusit lo vang.” Isua Krista nena mi a len dun chuan midangte sual aiin kan sualna hi kan hmu chiang thin. Zakaia, Isua chiang taka hmutu khan simnain bul a tan a ni. Isua Krista lo kal chhan chu Diabola leh hnathawh tihboral hi ni. Chuvangin, miin Lal Isua Krista nen nun a hman dawn chuan sual keimahni a awm hi then fai a ngai thin a ni. Sual leh Krista hi an awm dun thei lo. Keimahnia sual, Pathian nena kan inbiak pawhna ti chhe theitu chi hrang hrang hi chu Isua nena nitin hun i chhiar dawn chuan i sim a lo ngai ta a ni. I sim lo a nih chuan chung sualte chuan nitin an hek thin ang che. Pathian nena inpawlna (fellowship) i nei thei ngai lo ang (Isaia 59:2).
Joba simna chungchang hi in lo thlir ve leh ila. Joba hi fel tak vet vet a ni. Pathian pawhin mi fel a tih kha a ni. Joba 1:1 ah khan Joba hi mi fel a ti a ni. Joba sualna awm ang hi hmuh tur a vang viau a ni. Baptistu Johanan Pharisaite rul thlahte u a tih pawh kha ka ngaihtuah fo thin Eng hi nge an sim ang tih hi? Zu leh ruihtheihthil, hurna, tualthahna pakhat mah an ti si lo. Isua emaw, Johana emaw pawh khan, nangni chu midang ai chuan in zia hi, kha in bei ve tawk tawk alawm tih awm tak. Rul thlahte u a ti ta zek a nih kha, eng nge an tih sual tih hi ngaihtuah hian rilru hian eng emaw chu a chhui ve thin. Mahse, thil pakhat chiang em em mai chu “Pa mi tirtuin a hip loh chuan tumah ka hnenah an lo kal thei lo vang;” Isuan a ti a ni. Kan lo fel theihnate, Joban Pathian a tih theihnate, Pathian laka sawiselna tur awm lo a, a lo awm theihnate kha Pathian khawngaihna vang mai mai a lo ni. Chuvang chuan a ni Joba khan a tawpah khan, keima theihnain ka lo fel emaw ka lo ti a nih hi, ka felna ka neih ve te hi Pathianin min khawngaih avanga nei mai ka lo ni reng mai a. Chuvangin, Pathian rorel pui zut zut tur khawpin ka lo fel hauh lo, kei hi misual, Pathian khawngaihna avang chauha mi fel ka ni tih ka in hmuh chian hnu hian, ka zak a, ka in ten a, vut leh vaivuta thu in ka sim ta a ti tawp a nih kha.
Luka 7:47 “Chuvangin ka ti a che, A sual tam tak kha ngaihdamin a awm ta; ani pawhin a hmangaih ta em em a nih hi; amaherawhchu ngaihdam tlem chuan tlemin a hmangaih thin,” a ti a. Isua Krista i lo hmangaih zual zel nan TKP memberte Pathian hma ah hian tunge ka nih tih hi i in zawt nawn fo ang u.