KRISMAS – Krista Ruai
Upa J.Lawmsanga
Krismas 2019 chu kan lo hnaih ta hle mai a, chawlhkar khat zet chauh a awm ta a. Krismas hi hlimtlang taka hman kan duh thin a; kan inbuatsaih thin. Chhungkaw thenkhat chuan mawi takin in an chei a; thawmhnaw thar mawi tak tak, man to tak tak an lei a. Ei tur tuihnai chi tinreng nen Krismas hi hlim taka hman kan tum a ni.
Kohhran pawh theih ang angin kan inbuatsaih a, Biak In leh a vel mawi tak takin kan chei a, a chhung pawh kan chei bawk a. (Biak In chei nan Kohhranin Rs. 50,000/- an pe a, daih ngei turin an ngai) Ruaitheh turin kan inbuatsaih a, ruai committee kan indin a; ran zawngtute an buai hle a. Bawngsa a to si a, engtia tih tur nge ni ang? vawk hi Krismas atan chuan a awm thei mai ang a, Missionary Day atan a vang deuh dawn. Fatu ruat a ngai dawn a, thingpui lum turin TKP-te kutah, Krismas thingzar KNP-te kutah. Zaikhawm hruaitu ruat a hun a, tute nge ni ang? Inbuatsaihna a kal mup mup mai. Krismas hi kumtluana kan lo er hlim leh lawm taka hman kan duh theuh a ni a; inbuatsaih nasat a ngai reng a ni.
Kumin zaikhawm hi eng nge kan an dawn le? Kohhran programme luah tam bertu chu ZAIKHAWM a ni a, chutih laiin zaikhawm ngai miah lo tam tak kan awm si. Zaikhawm thingpui senso hi a tam ve via mai, a hmeh nen kan duh si a. Krismas leh a behbawm hi ziah tur tam tak a awm a, nang eng angin nge i inbuatsaih ve le?
Heti zawng hian i thlir teh ang. Krismas hi kohhran ten kan hunpui ber, nasa taka kan inbuatsaih a, sum pawh tam tak kan sen ralna hun a ni. Chutih lai chuan, SUAL A PUN NASAT BER HUN, SETANA CHET FUH BER LAI a ni mai lo maw? Setana hlawhtlin lai ber, a nuam tih ber hunlai a ni mai angem le? Ruai nen nasa takin lawm mah ila, nasa takin zaikhawmin hlim viau mah ila, kan Biak In leh a chhehvel chu cheng tam tak sengin chei mah ila. Krismas-ah hian tisa lam hlawkna chauh kan chan a, thlarau lam ruai kan kil si loh chuan hlawhtling kan inti theih dawn em ni? Kan in leh a velte cheimawiin Krismas tree-te chu sang tha hle mahse, kan chhungkuaah sualin ro a rel miau si chuan; kan chhungkuaah thlarauva Pathian pawlna tak tak kan thlen phak si loh chuan Krismas chu a nihna tak thleng kan inti ngam dawn em ni?
“Krismas awmzia chu KRISTA RUAI tihna a ni,” tiin mithiam ten an sawifiah a. Krista ruai chu – he tisa ruai hi a ni em? BCM muala tisa ruai hlim taka kan theh hi mithiam ten Krismas awmzia – Krista ruai an tih chu a ni thei a ngem le? Ni lo, Krista ruai chu “Thlarau lam ruai” a ni a; thinglung inngaitlawma Krista chibai buktuten an theh thin. He Krismas hunah hian Lal Isua, kan tana nausen anga lo piang, lei mihring anga lo piang hi thinlung inngaitlawma chibai bukin, i Lal atan chibai i buk thar thei dawn em?
Rilru inngaitlawmte hnenah,
Krista a rawn inlar ta;
Imanuela kha,
Kan hnenah a lo cheng ta.