Thlarau Thianghlim – Ringtute Thiltihtheihna
Thlarau Thianghlim chu Pa hnen atanga lo chhuak Pathian dik tak, chatuan mi, Pa leh Fapa nena pumkhat chu a ni tih Bible eng atangin kan hmu thei. Khawvel an thiam loh hriattir a, ring lote thiamloh chantirtu leh ringtute nun khawih danglama thiamchantirtu a ni. Ringtute nun chu a khawih danglam satliah a ni lo va, Pathian faa vuah kan nih theihna tura nun thar min petu a ni a. Lal Isuan min tiam angin thiltihtheihna min petu a ni. “Nimahsela Thlarau Thianghlim chu in chunga a lo thlen hunah thiltihtheihna in la nei ang,” (TT 1:8)
Thlarau Thianghlim thiltihtheihna (power) nena rawngbawlna kan tlachham ta em em mai hi Thlarau Thianghlim leh a hnathawh kan hnawl tak vang zawk em ni ang ? Khawvel mite nun khawih danglam khawpa rawngbawl chu sawi loh keimahni leh kan ringtu puite nun pawh chawm zo lo, thlarau lama nun tuihal leh riltamte tana ei tur pawh pe thei lo, mahni pawh inchawm nung zo mang lo kan ni ta nual mai hi kan rawngbawlnaah hian kan Pathian hi a lungawi theih rin a har hle.
Zirtirte kha Thlarau Thianghlim an chunga a lo thlen khan thiltihtheihna nen, chakna thar leh huaina nasa tak nen rawng an bawl lo vem ni ? Bawl e. Khawvel an tidanglama, khawvel chawk buaitu tia hriat an nih nghe nghe kha. Thlarau Thianghlim thiltihtheihna chang turin Thlarau Thianghlim leh a hnathawh pawh hretiam lo leh tem reng reng lo rawngbawltu kan pung tual tual a. Mi piang tharte chu Thlarau Thianghlim chantirin kan awm vek alawm tih chu kan chang chawi a, “hmanah… chuan vai lal nupuiah ka awm, tunah… chuan ka pu saza nau ka awi,” tih ang mai khan hmana kan hlim leh lawmna leh rawngbawlna chu kan changchawi a, kan chhuang ve a, a hmantlak der tawh si lo.
Mi piangthar Thlarau Thianghlim changa inngai, Thlarau Thianghlim leh a hnathawha buai tlat si ringtu kan awm thin. Chuvangin ringtute thiltihtheihna ber Thlarau Thianghlim chuan keimahniah hna a thawk tak tak thei ta lo va, mi dangte nun khawih danglam khawpin rawng kan bawl thei ta meuh lo. Kan inmut thluksan mai mai a ni ber. Keini pawh hmanah chuan vai lal nupui lo ni tawh, tunah chhuanlam tam tak neite, Upa leh Rawngbawltu nihna, Pastor leh Evangelist nihna, hruaitu nihna, sum leh pai duhamna, khawvel nawm chenna, kohhran hruaitu sawisel nuam tih em emna leh mahni tawka rawngbawl ve riau nia inhriatna puka awm te kan ni. Tunah hian Thlarau Thianghlim thiltihtheihna nena rawngbawl turin Lalpan min ko a ni.
Thlarau Thianghlim thiltihtheihna nena ringtu hmasaten rawng an bawl lai khan ke baite an dam a, pharte tihthianghlimin an awm a, dam lote an dam a, thlarau nun chak loten chakna an hmu a, thlarau bote chhanchhuahin an awm a ni. Ringtu hmasate ai khan kan thawkrim lo bik ta em ni. Programme siam kan thiam, changkang leh mawi hnai takin kan siam. Thlarau lam programme nung leh thiltithei mi dangte nun khawih danglam thei siam erawh chu kan tlachham. Thlarau Thianghlim hi min tichaktu leh min hruaitu atan kan duh hle. Mahse a duh dana nung tur leh keimahnia hna thawk thei tura a thuneihna erawh chu tundin kan tum si lo. Kan duh dana inhruaitir kan tum tlat hi kan bawhchhiatna a ni tih kan hre der si lo. Thlarau Thianghlim duh dana nung a, a thiltihtheihna hmang thei turin Lalpa hmaah i inlan ila, i ding ang u.