TAWNGTAINA
Rev. Dr. C.D. Lawma (L)
Tawngtai hi Pathian nena inbiakna a ni. Bible kan chhiar hian Pathianin kan hnenah thu a sawi a. Kan tawngtai hian Pathian hnenah thu kan sawi a ni. Kan mamawh leh duhzawngte Pathian hnenah kan thlen thin. Pa leh fa inkarah inbe ngai lo leh inrawn ngai lo chu nun hlim a awm thei lo. Faten min biak ngai loh chuan tu nu leh pa an lawm lo ang hian, ringtu ni si Pathian hnena tawngtaia Pa Pathian berawn ngai lo chungah Pathian a lawm ngai lo. Dr H.W. Frost chuan, “Tawngtai hi, Krista Isua hminga, Thlarau thianghlim thiltihtheihnaa, Pathian, Pa chibai kan bukna a ni” a ti.
Tawngtai hian thil kawng li (4) ACTS a huam:-
A = Adoration:- Fakna leh chibai bukna Pathian hnena pek hi a ni. Sam 95 : 6 “Aw lo kal ula, chibai bukin i kun ang u” Zah taka chibai buka Fak hi Pathian biakna dik a ni.
C = Confession:- Sual kan hriat apiang puanga simna hi a ni. Sam 32 : 5 “Ka sualna chu i hnenah ka puang a, ka khawlohna chu ka zep ta lova; Ka bawhchhiatna chu Lalpa hnenah thupha ka chawi tawh ang” ka ti a.
T = Thanksgiving:- Philipi 4 : 6 “Engkimah lawm fo rawh u” Chhungkua in dam tlangte, silhfen in tlachham lo te, chenna in leh ei tur in tlachham lo te, a thlawna boruak thianghlim i hip rengte kha lawmna tur hlir a va ni em!
S = Supplication:- Dilsakna (intercession) te, ngenna (Requests) te, dilna (Petition) te leh châkna/itna/duhna (desires) te mi zawng zawng tan siamsak turin ka fuih a che.
Tawngtai hian Pathian, Pa hnenah kan sawi phawt tur a ni. (Tirh 12 : 5) Thlarau thianghlim thiltihtheihnaah (Ephesi 6 : 18) Isua Krista hmingin (Joh 14 : 13 ) dil a, tawngtai tur a ni.
Tawngtai hi Pathianin thil pathum zinga pakhat, a engemaw berin a chhang thin. Aw (yes), Ni love (no) leh Nghak rih rawh (wait) (B.B. Doctrine p.298)
1. Aw (Yes) Isaia 65 : 24:- “Annin min koh hma pawhin ka chhang ang a, thu an la sawi lai mek pawhin ka bengin ka hria ang” Kan dil hi, ‘aw’ tia min chhan nghal mai a awm.
2. Ni love (No):- Paulan tihdam dilin vawi thum a tawngtai a, mahse, a chhanna chu “Ni love a, ka khawngaihna i tan a tawk e” tiin II Kor. 12 : 7 – 10 ah Lalpan a chhang. Kan duh anga kan dil hi hlawhtling lovin, “Ti khan awm rih la” a ti fo thin.
3. Nghak rih rawh (Wait):- Kan tawngtaina tam tak chu “Lo nghak rih rawh aw” a ti fo, nghah rih hi Mizo tlin loh zawng tak a ni. Habakuka 2:2-4 “Rei deuh mahse nghak rawh, a lo thlen ngei dawn avangin a tlai chuang lovang”. “Mifel chu rinnain a nung ang” a ti a.
Kan tawngtai hi heng 3 zinga pakhat tal hian a chhang ngei ngei thin a ni. I dil thin hi a eng ber hian nge a chhan che? Pathianin tawngtaina hi a eng ber emaw hian a chhang ngei thin (BBD p. 289). I tawngtai dan kha lo inenchiang ve teh.