RAWNGBAWLNA
Vanlalnghaka Hnamte
Rawngbawlna hi vawi tam tak kan sawi a, kan sawi dan pawh a in ang vek lo va. Rawngbawlna kan tih pawh a in ang vek lo. Chumi chu a dik a, chumi chu a dik lo tih pawh sawi theih a ni hek lo. TKP ten I rawngbawlna kha hlen rawh tih film kan han siam tak atang ringawt pawh khan ngaihdan hrang hrang a awm zia chu kan hmun thei awm e. Amaherawhchu, Pathian rawng chu kan bawl tur a ni tih erawh chiang takin kan hre thei awm e. Rom 12:11-ah chuan “Lalpa rawngbawl ula;” a lo ti kuau mai a ni. Rawngbawl tura pawimawh hmasa ni a ka hriat ve te thai lan kan tum dawn a ni.
A hmasa berah tu rawng nge i bawl dawn? : Rawngbawl tur hian midang rawng kan bawl a ngai. Rawng ka bawl ti lo hian mahni hi a in tuituah ve hluah theih a ni. “Kei leh ka chhungte erawh hi zawngin LALPA rawng a nia kan bawl dawn ni,” (Joshua 24:15). Pathian rawng nge ka bawl dawn a, miten fel min tih duhna avang emaw mi zawng zawngin an tih vang emaw pawn rawngbawl a tum ve theih tho a ni. Pathian in min hmangaih avangin Krista ka chhandamtu rawng chu ka bawl dawn a ni, ti a duhthlanna fel tak siam a rawngbawl tura rilru kan siam hi a pawimawh in ka hria. Kohhran in min ruata ka tih ngai a lawm, tih vanga rawngbawl ngawtte, min ruat chhan, ka rawngbawlnaa an nghah chhan pawh ngaihtuah hmasa lo hian mahni ropuinan rawng a bawl ve vak theih a ni. I rawngbawl chhan, Kohhranin chanvo a pekna chhan che chu Krista ropuina atan leh Krista vangin a ni a, Krista rawng I bawl dawn a ni tih ngaihtuah thin ang che. Chuti lo chuan hrehawm i ti fo ang a, nangmahah Krista hmel a lang thei lo fo ang. Kohhran rawngbawlna peng hrang hrang awm chhan hi Krista vang a ni si a.
I rawngbawl sakin a ngaih pawimawh ber hrechiang rawh: Pathian in nangmaha a duh chu hriat chian a ngai a ni. Pathian hian tum lian tak mai a nei a. Chu chu a fapa hmanga he khawvel sual laka tlan chhuah hi a ni. Keini Krista pawmtu leh rilru tihvara awmte pawh hi nitina sual kan practice thin te, kan nun a bet tlatte laka min chhandam zel hi a tum a ni. I Johana 5:4 “Pathian hrinte chuan khawvel an ngam zel thin.” Chu Krista min chhanchhuaktu chanchin hrilh darhte chu kan tum tur niin a lang. (Isua min chhandamtu chanchin kan hriat tawkte te a hrilh darh ve hi). Nangmah ngeiin a sual Krista Kraws hmanga i hneh hnua midangte hnena i hrilh darh ve chu Lalpa’n a phut ve tlat a ni. A hmanrua tur atan erawh rawngbawlna peng hrang hrang, thawhtur pawh min pe ngei thin a ni. A tum zawk tak thelh thaka a hmanrua ringawt chawisan hi a awm ve thei a ni. A hmanraw ngaih pawimawh lutuk chu Islam sakhaw hmuchhuaktu ah pawh hian chiang takin kan hmu. Islam hian Isua chu Pathian atanga lo chhuak a ni tih an hria a ni. Isua hi ‘Word of God’ Pathian thu a ni tih leh sualna nei lo a ni tih hi an pawm ve vek. Mahse, Pathian a nih leh min chhandamna tura kawng awm chhun a nih hi an hnawl a ni. Muhhamada’n Krista tluka a indah avangin a pawi zo ta a ni. Jona khan Pathian rawng a bawl a, Pathian sawi ang vekin a va ti ngei. Mahse, a chungah Pathian a lawm hauh lo. Um hnuaiah khan lungawi lo takin a thu a nih kha. A dik tak chuan Jona kha Pathian in a tir a ni tih an hriat nan leh zawlnei a ni tih lantir nan khan mei khan Ninevi kha han kangral se a ti hle a ni. Ninevi khuaa mi awm ho kha Israel te tiduhdahtu an lo ni bawk nen. A rawngbawl Pathianin a duh zawk erawh chu simtir a, hremna pek loh kha a ni zawk si a. A rawngbawl saka duh dan aiin ama duh dan zawk kha a dah lian em em mai a ni. Kohhrana rawngbawlna kan neihna ah te hian ngawih chuh chang te (inremna a lo awm theihnan) a awm a tul fo thin. Entirna han pe ila, Committee hmun in koh thuahte, Carpet rawngte, Mistiri thawh dan turte, Khawi program nge pawimawh zawk tih te. Chungah chuan ngawih chuh a awm chang a awm fo. Engvangin nge? Nakinah Krista chanchin hi hrilh a ngaih hunah inrem lohna/ inhuatna thuk tak a lo awm sa tawh chuan, i rawngbawlna chu fel takin hlen chhuak mahla, a pawimawh ber Krista chanchin i sawi chu hliah a a lo awm phah si chuan kan rawng bawl saka chu a lawm angem?
I rawngbawl sak tura duh dan angin rawngbawl ang che : Mi hnena kan inhlawhfaka, a rawng kan bawl sak chuan a hna neituin a thawh dan tur a duh anga kan thawh a ngai si a ni. Hei tak hi kan rawngbawlna ah hian a pawimawh em em a ni. Chuvangin kan rawngbawl sak tura nen hian kan inbiak tawn reng a ngai a ni. Isua tan vek alawm tiin Biakin lianpui sa la, a sakna tur atan chuan eiru tun tun si la. I Isua Krista chu eiruk hmang mihring angin i tarlang dawn a ni. Tunge Isua i sawi chu zui ve duh ta ang? Saul-a halral thil hlan leh Davida halral thil hlan kha kan en chuan Saula chu Lal a ni. Halral thilhlan Pathian hnenah a hlan Pathianin a lawm lo mai pawh ni lo in, Lal atan a hnawl phah thak a nih kha. Davida chu Lal a ni tho hal ral thil hlan a hlan Pathian a lawm. A chhan chu, Saula chuan Pathian thu ang loin a hlan a ni. Davida chuan Pathian thu ang thlapin a hlan, awlsam zawng zawng loin, insenso a ngaih pawn a in sengso mai a ni. (II Samuela 24). Keini pawh kan rawngbawlna ah hian kan phak ang tawkah Pathian rawn chungin Pathian thu ang zelin rawng kan bawl a ngai a ni.
Kan rawngbawlna ah hian Krista rilru angin, hmangaihna nen, khawngaihna, Pathian tana ti chung zel leh Krista hming chu kan pu a ni tih hre chungin (Pathian thu nena inrem zelin) i han hlen chhuak ang u hmiang.