REMRUATTU MAKA – I
Tv. H.Lalrinawma
Bible chhiar tur: Exodus 4, II Lalte 4 – 7
Vawiina kan ngaihtuah ho tur hi B.C. 1200 atanga B.C 830-na hun lai a mi a ni a. Hruaitu ropui Mosia leh zawlnei Elisa te hunlai atanga kan zir tur hi vawiina kan Kristianna lama thanna a nih ka beisei tlat a ni.
1. Kan thil neihsa tihpun hi Lalpa remruat a ni: Exodus 4:2. Tin, Lalpa chuan a hnenah, “I kuta mi kha eng nge ni?” a ti a. Tin, ani chuan tiang a ti a. Lalpa ropuina leh thil tihtheihna lantir nan khan tiang danglam tak, ropui em em thar hlak a pe lo, a neih sa mal a sawm mai a ni. II Lalte 4:2 Tin, a ni chuan, i bawihnu sahriak um khat chauh lo chu inah engmah ka nei lo” a ti a. Lalpa khan hmeithai mamawh a hria awm lo ata a awm tir thei, ei tur leh silhfen pawh, mahse, a neih sa “Sahriak umkhat” mal a sawm zawk a ni.
Hetianga kan sawi hian talent emaw, sum emaw, alang nghal mai thei, a dikna chen a awm e. Mahse, kan ngaihtuahnaa tel lo fo thin chu – Thuawihna, Inpekna, thupek leh kaihhruai thiam riauna (Good Leadership) rinawmna te hi atel em em a ni tih i hre reng ang u.
2. Thuawihna: Lalpan Mosia a tirh chhuah dawn a, a rinawm zia a inhriattir dawn khan thupek a pe a. Mosia khan a awih zel a ni. “I tiang kha leiah paih rawh”, “Rul kha a meiah la rawh” tih angreng khan thupek a dawng zel a, a zawm zel a, Tiang thil ti thei tak a kawl ta reng mai a ni.
Elisa’n hmeithai hnena “Va kal la, i thenawm ho zawng zawng bel, bel ruak va hawhkhawm tawh khai, tlemte mai zawng hawh suh” a tih khan tunlai hun nise kan hreh dan tur hi ngaihtuah teh ang u. Thu a awih em avangin a nunna a chhanhim a, a fapa 2 te pawh saltanna atangin a chhanhim a ni. Vawiin hian eng nge kan dinhmun le? Lalpa ropuina leh thil tih theihna hmu turin kan taima tawkin kan inhria em le?
3. Tuma duh loh kha a kila lung tangkai ber a lo ni ta. Suria sipai hotu mi zawng zawng ngaihsan leh huaisen khan phar natna a vei a, a buaipui em em a ni. Lalnu bawih pakhat Israel hmeichhe naupangin tih tur a hrilh a, amamawhnain a zir bawk a, a kal mai a ni. Thilpek tam tak nen 663.9KMs zeta hlaah sakawrin an kal a. A beisei ang reng rengin Elisa khan a lo enkawl hauh lo. A peih loh em em ti turin thupek deuh reuh alo pe, Jordan luiah vawi 7 inchiah turin! Khatah khan a chhiahhlawhte khan tirlui lo se la chuan Naaman-a hi kan hre reng awm love. Bawih hmeichhe thu leh a chhiahhlawhte thu a awih vangin tih thianghlimin a awm. Khawvel ngaih chuan bawih leh salte an hniam em em a, sipai lalte nen phei chuan inthlau tak an ni. Mahse, a phar lak ata a dam theih nana pawimawh em em an ni ta a ni.
Tum khat leh pawh Suria sipai ten Samaria an hual a, Israel ho eitur nei lovin an awm a, an buai em em a ni. Lalpan an mangang ri a hria a, a hmanraw hmante chu phar 4-te an ni.
Vawiin hian tute nge kan dahsan a, tute nge kan enhniam thin le? Gospel Camping kan neih dawn pawn “A tha ber leh Pathian mi ber” emaw kan thinlung min thlak dawrh theih tur khawp a mi ropui danglam, midang pawhin an hman lar em em kan beisei em? Naaman-a pawh khan a beisei a lawm. A hliamte dekin a Lalpa bia a chham pual ngei a beisei a, a beisei anih tak loh avangin a titau hman hial a nih kha. Anihna takah chuan engah maha kan ngaih lem lohte hi min chhanchhuaktu an ni thei fo a sin. Chuvangin hawh u, i ngaihtuah teh ang u khai. Tute pawh hi midangte tana malsawnna leh chhandamtu kan ni vek thei a, Mi zawng zawng angkhatin inzah vek hi a pawimawh em em a ni. “Mirethei leh mihausa an awmzaa, an vai a siamtu chu Lalpa a ni” tih ziak ang khan.