Nun Hlimna Thuruk
Kan lo tangkaipui takin tlem azawng han tarlang teh ang :
1. Mahni aiin midang tha zawka ruat : Elrel leh inngaihhlut avanga engmah ti lovin, mi tinin inngaitlawm takin mahni aiin midang tha zawkah ruat theuh rawh se (Philipi 2:3). Mahni aia midang tha zawka kan ruat tlat hian midang thatna lai hmuh a awlsam bik a. Midang tha zawka kan hmuh tlatna hian kan nunah elrelna leh itsikna min paih bo sak a. Chu chuan nun hlimna min thlen thin.
2. Midang tana luan chhuah : Chhandamna a thlawna min siamsaktu hian midang tana luan chhuah hi min phut let tlat a ni. Midang kan tanpui hian chawp leh chilhin kan nunah hlimna a thlen a. Pathian duhzawng a ni tih kan hriat tlat avangin.
3. Rilru hrisel neih : He khawvela kan awm chhung hian harsatna leh buainate hi kan nuna bet tel tlat a ni a. Mahse, hengte hi kan nuna chhelna leh harsatna dang hmachhawn leh tura min chher hriamtu a ni zawk a. Harsatna karah pawh beiseina kan neih tlat hian chu chuan kan nun a khalh kal a. Chu chuan hlimna min thlen thin a ni.
4. Dah pawimawh hmasak tur thliar thiam : A ram leh a felna chu zawng hmasa zawk rawh u, tichuan chung zawng zawng chu a pek belhchhah dawn che u nia (Matthaia 6:33). Kan nuna Pathian kan dah pawimawh hmasak hian hlimna hi chawplehchilhin a lo kal mai thin. Hemi bakah hian kan nitin khawsaknaah, eng hi nge ka tih hmasak ang a, ka ngaihpawimawh hmasak ang, tih hi mifing chuan an ngaihtuah hmasa thin. Chu chuan buaina lo thleng tur a tikiang a, lungngaihna lo thleng tur tam tak pawh min chhawk zangkhai sak thin.