TAWPNA THA
V.Zosangliana
‘Thil tawpna chu a tha zawk thin a bul tanna ai in’ Thuhritu 7:8
Sap thufing chuan a bul tan that chu a zatve zo kan ni a ti a. He khawvel thil ah chuan a ni teh meuh mai a, kan Pathian thuah erawh chuan thil tawpna chu a tha zawk a bul tanna aiin a ti ve thung a. Tawpna tha kan sawi dawn chuan Bible atangin bultan tha, tawpna tha lo te zir ho phawt ila.
1. SAMSONA : Roreltute Bung 13 kan chhiar chuan Isreal ho ten Lalpa mit hmuh ah thil an tih sual a, Kum 40 zet mai Philistian ho kut ah an awm leh a, tihduhdahna nasa tak an tuar leh a, an thawm chu Lalpan a lo hria a, anmahni chhan chhuak tur in Samsona a rawn ruat a. Samsona chu a nu pum chhunga a awm lai atang reng in Zu leh Uain in lo tur leh ei thiang lo reng ei lo tur a tih a ni a, a sam pawh met lo tur a tih a ni. Pathian tana serhhran tur a ni. Samsona chu a lo piang a tlangval chak tak leh huaisen tak mai a ni a. Pathian thlarauin a awmpui a, Philistian ho nen a an inbeih changte chuan a chak em em mai a. Sabengtung khabe ruh in mi sangkhat a vawhlum thei a, sakeibaknei pawh a pawtsawm thei a. Chuti tak a chak chu nimahsela, a chakna thuruk chu hmelma nula a rawlruk a; a sam mehkawlh a ni a, Pathian thlarauin a kal san ta a. A mitmu an kher chhuah sak a buhrawtsawmnaah hna an thawh tir ta a. Pathian mi tawp nan chuan a hun tawp hi a duh awm lo hle mai nuihza siam nan ang hmang a Temple ah mi tam tak a thih pui ta a nih kha.
2. Lal Saula : Samuela 9:15-16. Israel mipuiten hnam dang ang in Lal neih ve an duh a. Samuela kal tlang in Pathianin Lal atan Lal Saula a pe a, hriak a thih a. Israel Lal hmasa ber a lo ni ta a ni. Lal Saula chu Zawlnei Samuela kal tlang a Pathian thupek anga ro a rel lai chuan Lal chak tak leh thil ti thei tak mai a ni. Pathianin a awmpuia Amon mi te, Philistian mite a bei a, a hneh zel a. Israel mipuite pawn an thlamuan pui hle a ni. Mahse, Pathianin Amelek ho bei a, that chimit vek tura a tih chu zawm lo in an lal Agaga te, Bawngpa thau tha te, Berampa thau tha te a lo hawn a, Pathian thu a zawm loh avangin Lal atan a hnawl a ni a. Pathian thlarauin a kal san a, a kawchhung ah Ramhuaite an lut a, a hun tawpah phei chuan Philistian ho nen an indona ah a fapa te pathum an thah sak a, amah pawh a ralthuamin a intihlum ve ta a ni. Isreal Lal hmasa ber ni si kha a hun tawp a va duhawm lo em.
3. Juda Iskariota : Matthaia 27:3-6. Isua zirtir sawmpahnih zing a mi a ni a, Lal Isua rawngbawlna englai pawh a zuitu a thiltih a piang hmutu, damlo a tihdam te, mitthi a kaithawh te, thlipui a hauh reh te etc. chu mai a ni lo amah ngei pawh kha Lal Isuan thuneihna a pek ve, a tirh chhuah a ramhuai te hnawhchhuah theina te mitthi kaihthawh theih nate nei ve ngat tawh kha a ni a, kha ti khawp a Lal Isua hrechiangtu khan tangka sawmthum in Lal Isua a hralh a, a man tir a nih kha. Mahse, Isua thiam loh an chantir tih a hriat khan a inawkhlum ta a nih kha. Lal Isua bul a hun hmang reng thin a chawhlui kilpui thin, hun tawpna atan chuan a hun hnuhnung chu a duh awm loh hle mai.
BULTAN THA LEM LO TAWPNA THA TE
1. Zakaia : Luka 19:1-8. Zakaia hi chhiahkhawntu a ni a, mi ten misual hlepru thin an tih kha a ni a. Nikhat chu an khua ah Lal Isua a lo kal dawn tih a hria a, hmuh ve ngei a duh a, mipui an tam em a vangin theipui kungah a lo lawn a, Lal Isuan Zakaia zawn a thlen chuan Zakai lo chhuk rawh i inah ka thleng dawn a ti a. Zakaia chuan lawm takin Lal Isua leh a zirtirte chu a lo thleng ta a ni. Zakaia’n Lal Isua a hmuh chuan a nunah danglamna a lo thleng ta a. Lalpa ka neih zatve pachhiate hnenah ka pe ang a, tu hnenah pawh hlep ru ila a let liin ka rul leh ang a ti ta a. Lal Isua hian amah duh tute hi a hnar ngai lo a; a duhtute hnenah chuan a cheng thin a ni. Lal Isuan he inah hian chhandamna a thleng ta ani pawh Abrahama fapa a ni si a a ti ta a ni. Misual mite hmuhsit Zakaia hian Lal Isua a hmuh chinah a nun a inthlak vek a, a hun hnuhnung hi a van nuam dawn em.
2. Saula : Tirkohte 7:59-60. Saula chanchin hi kan hre vek awm e, kohhran tiduhdahtu a ni a. Martar hmasa ber Stephana lung a an denhlum dawn pawh khan a awm ve a, a puan te chu Saula ke bul ah an dah a, a thih pawh chu rem a ti a ni tih kan hmu a ni. Chutia kohhran ho tihduhdah tur a kal chu Damaska khaw daiah Lal Isua nen an in tawng ta a, Lal Isua an hrechiang chu, a tihduhdah thin a rawng chu a bawl ta zawk a ni. Lal Isua vang in hrehawm tam tak a tuar a, tihduhdah in a awm a ni. Mahsela, a hun hnuhnung ah chuan “Ka chhuah hun a thleng dawn ta felna lallukhum ka tan dahin a awm a, Lalpan chumi ni ah chuan mi pe ang” a ti a ni. A hun tawp a van duh awm bik em. Misual, Lal Isua tiduhdah thin kha, Lal Isua a hmuh chinah a rawng a bawl ta a, nunna lallukhum atan dah in a lo awm ta zawk a ni.
3. Misual Thi tur : Luka 23: 39-43. Lal Isua kross a an khenbeh khan a rualin misual pahnih an khengbet ve a, pakhatin Lal Isua tiel a anchhia a lawh khan a thianpa khan a hau a. Pathian meuh pawh i hlau na nge thuhmun reng a min hrem hi, keini zawng hrem zia reng kan ni, kan thil tih man chauh hmu kan nih hi, hemi zawng in engmah a ti sual si lo, Isu, i ram i thlen hun in min hre reng ang che a ti a. He ta Lal Isua chhanna hi a lawm misual hremhmun kal mai tur thi tep tawh tan chuan a van duhawm dawn em. Hei aia thlan tur dang a awm chuang lawng nge, ‘tih tak meuhvin ka hrilh a che vawiinah ka hnenah PARADIS ah i awm ve ang’. Misual thi mai tur hian Lal Isua nihna hi a hrechiang em a, Pathian fapa a ni tih a hriat khan a ni misual thi tlak a ni tih a in hrechiang hle mai si a. Ama nihna dik tak atangin Isua a au a, chhandamin a awm ta a ni. Misual thi mai tur tawpna atan chuan a va duhawm em. Keini pawh hi engtik lai pawh in kan hun hnuhnung hi kan thleng thei a, chu mi hunah chuan hlim tak a Lal Isua kan hmuh theih nan kan nun i inbuatsaih ang u.