CHANCHINTHA HRILH DAN DANG DEUH?
Vanlalnghaka Hnamte
Matthaia 13:8 “Tin, a then lei thaah a tla a, thenkhat a leh zate, thenkhat a leh sawmruk te, thenkhat a leh sawmthum tein a lo rah ta a.” Isuan tehkhin thu a, ringtuten rah an la chhuah ve tur thu a sawina a ni. A dik bawka ringtu rah chhuah lo hi chu Bible ngeiah pawh paih chhuaha an awm tur thu chiang takin a in ziak a ni. (Matthaia 7:19). Amaherawhchu, ringtute chuan eng tinnge rah kan chhuah tak ang tih hi zawhna pawimawh tak a ni.
Thenkhat chu Missionary tura koh an ni. Paul-a ngei pawh kha Pathianin Jentail-te hnena chanchin tha pulut tura a bel ruat a nih kha. Tirhkohte 9:15. Nimahsela, mi zawng zawng hian tuna Missionary hnathawh ang hi kan thei vek kher lo. Engtin nge chanchin tha chu kan hrilh ve ang tih hi zawhna pawimawh tak a ni. A li thuk lo lam Mizoram angah phei hi chuan a ngial a nganin Krista chanchin hi han inhrilh ila, keini ai hian an lo hre viau zel a. A then lah in an lo hre lutuk a (anmahni hriatnain, thlarauvin a hrilh ni lovin) an lo kal sual pui mek bawk a ni. Anih leh mi piangtharin a tih tur a chu eng ber hi nge ni ta ang? Chanchin tha (Isuan ka tan leh he khawvel tana a tuarna thu chu) engtin nge ka tlangaupui ve tak ang? Hei tak hi kal ngaihna kan hre lo kan tih fona thin, kan mu tan kha a ni. Rah chhuah kan neih ve theih tak loh ah chuan vawkpui inbual ang dinhmun ah kan let leh thin a ni. Vawkpui hi fai taka i bual hnua i chhuah leh chuan chirhdiakah bawk a kir leh thin a ni. Piangthar lo nun danin kan nunga kan lo tlu leh mai thin a ni.
A nih leh engtinnge rah chu kan chhuah tak ang le? Chanchin tha hmui chip renga hril dan awm chhun chu hei hi a ni. Galatia mite hnena lehkhathawn hi in bih chiang teh ang. Galatia 5: 22 ah “Thlarau rah erawh chu hmangaihna te, hlimna te, remna te, dawhtheihna te, ngilneihna te, thatna te, rinawmna te, thuhnuairawlhna te, insumtheihna te” an nih thu kan hmu a ni. Kohhran anga kan inhman hona leh thil kan tih hona ah pawh hian heng rah hi ringtu leh ringtu inkarah pawh kan zawng thin a ni. Engvangin nge kan zawn thin? He khawvel rah chhuah inngaihna te, bawlhhlawhna te, hurna te, milem biakna te, dawithiamna te, huatna te, inhauna te, thikna te, thinurna te, inkhinna te, awm hranna te, rin hranna te, itsikna te, zu ruihna te, zu hmun hlimna te, hi nitina kan hmuh kan hriat leh min chiah reng thin tu kha an ni. (Heng hmang hian ringtu inpawlkhawmho hi Setana hian min va hliam zing tak em! Fiamthu mei nei tak taka kan han in tih deuh sak sakte hian Setana hi a va lawm awm thin em. A tuartu leh a fiamthu neitu hian kan hrethiam reng si a) Pathian ringtute’n thlarau rah an chhuah chiah hian Pathian a lawm thin a ni. Chu chu i ringtu nun thanlenna leh i hlimna thuruk a lo ni reng si a ni. Lalpa i chunga a lawm a ni tih i hriat chuan i ringtu nun chuan tluk lam aiin ngheh lam a pan a. Krista zuitu nih chu ilo hlim pui thin ta a lo ni (Rahchhuah nun). He khawvel rah tam tak zingah thlarau rah khi chu a mawi a, a eng a, a rimtuia Pathian tan lawmtlak, inthawina rimtui a lo ni thin a ni.
Khawi hmunah nge thlarau rah chu kan lan chhuah tir ang? Khawi hmunah pawh le. I inchhungah pawh, nangmah leh Krista inkarah pawh (rinawmna), nangmah leh i thiante, Kohhrana i rawngbawlnaah, kan office kaina te hi a ni kan chanchin tha hrilh vena hmun tur chu. Kan chenpui leh kan nunpuite hnenah Krista hmangaihna hi kan lan chhuah tir loh chuan engtin nge Pathian kan hmangaih kan tih theih ang. I Johana 4:20 “Miin, “Pathian ka hmangaih e,” tiin a unau haw si sela, amah chu dawthei a ni; a unau a hmuh tawh renga mah a hmangaih loh chuan Pathian a hmuh ngai lohva chu engtin nge a hmangaih theih ang?” Pathian thu in a sawi dan chuan TKP level-a kan inhman pui rel zut zut, ngei deuh tlat, mahni Kohhran member puite kan huat tlat chuan Pathian hi ka hmangaih tiin kan in chhal theih hauh lo a nia.
Anih leh khing hmangaihna te, hlimna te, remna te, dawhtheihna te, ngilneihna te, thatna te, rinawmna te, thuhnuairawlhna te, insumtheihna te khi mihring nihphung a ni si lo. Mi thinchhe mi, itsikna nei mi ka ni si, ropuina chawimawina duh mi kha ka ni si. Keimah hi chuan ka pe chhuak thei thlawt si lo a ni. Pathian thlarau thianghlim kan mamawh ta chiah a ni. (Pathian thu zawm/nunpui leh Pathian nena inbiak pawhna neih a ngai, Pathian nena inpawlna nei lo miten thlarau rah an pe chhuak thei lo) Thlarau thianghlim hian zai tuina te, Pathian fak chaknate min pe thin, min pe mek bawk. A la tawk lo cheu, thlarau thianghlim hian kan nunah hian Pathian thu ang zela thlarau in rah a chhuah theih nan i sawm ang u. Serkawn TKP te hi Lalpa tana rimtui pe chhuak tur leh Krista thuhretu dik ni turin min sawm a ni.