KHAWNGAIHNA AVANGA PAWL SAWNTIR
(Promoted by Grace)
Upa J.Lawmsanga
Tunlaiin HSLC leh HSSLC result a chhuak a, mi engemaw zatin an Pass a; pass-te kan in lawmpui sup sup hlawm a, a lawmawm reng bawk a ni.
Mipa naupang pakhat, class IX zirlai, lehkha thiam thei vak lo, zir tha peih bawk si lo hi a awm a. Lehkha a zir thatchhe em em a; School-ah ni se, a zir that duh loh bakah a ninhlei em em a; a thiante a tibuai fo thin a. A zir that duh loh leh ninhlei thin avangin, a nu leh pa te pawh zirtirtuten an ko fo mai a. Exam a lo hun a, a exam tling tla ve mai a; pass pawh a inring lem lo a. A nu leh pate pawhin an zilh thin a; mahse, a sawt lo em em a; lehkha zir loh dan mawlh a ngaihtuah a ni ber. Exam result chhuah ni a lo thleng ta a; phur lem lo takin result la tur chuan a kal ve a. A Roll No. an han lam chuan a va kal ve a, a mark hmuh chu a tlem hlawm bawk a, a senin a bial kulh vek mai a. Subject pahnih/khat ah chuan pass mark a hmu ve chauh a. Mahse, a tawp result-ah chuan – Promoted by Grace (Khawngaihna avanga pawl sawntir) tih a inchhu kulh mai a, a hnuaiah PASS tih a inziak bawk a. Mak ti takin a Progress Card nen chuan a haw a; a nu leh pa te a entir chuan mak an ti em em a. Engvang nge ni ang le? Tih ringawt chu an ngaihtuah a ni.
Pathian khawngaihna ropui leh thuk tak hi mihring ngaihtuahna leh rilru hian a hrethiam phak lo fo thin. Kan sualna nasatzia te kan chhût a; mahse, a khawngaihna thûk tak avangin chung zawng zawng chu min ngaidam mai si. Kan chhungte ngei pawh bum duh khawpin sualah kan pil thûk tawh a. Mahni nu/pa te ngei pawh nasa taka tilungngai khawpin keimahniah sualin hna a thawk tawh a. Nimahsela, Pathian khawngaihna mak tak avang chuan NGAIHDAMNA chu kan la chang leh tlat si. Hla phuahtu chuan:
Khawngaihna mak mawi leh duhawm,
Sual riangvai chhamdamna;
Suala bo hnu min zawng hmu ta,
Mitdel mitvarna chu.
A lo ti hial reng a ni.
Pathian khawngaihna hi a thûk em a, kan hrefiah zo kher lovang. A sang em a, kan hmu kim kher lovang; a zau em a, kan hriat kim loh tam tak a la awm ang. Nimahsela, suala bo hnute min zawng hmu a, tling lo ber pawh khawngaihna mak tak avanga min ngaidamtu hian mak takin min chhandam anih hi. School naupang pawh kha, Promoted by Grace (Khawngaihna avanga pawl sawntir) a ni ringawt mai. Khawngaih a phu-na pawh awm lo mah se an khawngaihna mak tak avangin misual pilbo tawh hi min chhandam a ni. Lalpa chu fakin awm rawh se.