THANGKHAWK
Tum khat chu Pa pakhat hian puk hmingthang tak mai leh lian em em a tlawhnaah a fapa hi a hruai ve a. Chu puk chu puk zau leh lian tak mai anih avangin han au vak te hian a thangkhawk nasa thei hle a. Chutia puk chhung an fan lai chuan chu mipa naupang chu a tawlh thlu ta a, “Aihahhh” tiin a au vak mai a. Chutia “Aihah” tia a au chhuak chu a lo thangkhawk a, “Aiah” tih ri chu mipa naupang chuan a hre zui a. Thangkhawk a ni tih a hriat loh avang chuan mak a ti hle mai. Mak a tih em avang chuan “Tunge i nih?” tiin a au leh vak a, a aw thangkhawk “Tunge i nih?” tih ri chu a hre leh a, mak a ti leh hle mai. Chutianga a au lai vel chu a pa chuan a lo thlir reng a.
Naupang chuan a pa hnenah, “Ka pa chu pa chu tunge?” tiin a zawt ta a. A pa chuan, “Ka fapa, uluk takin lo ngaithla rawh aw,” tiin a hrilh a, amah chuan, “I van fel” tiin ring takin a au ta a. A aw thangkhawk chu a au dan chiah, “i van fel” tih bawkin a lo ri let leh a. A au dan bawk chuan a rawn thangkhawk let leh a. A fapa chuan a hrethiam lo kher mai.
Chutia a au zawh chuan chu pa chuan a fapa chu hrilhfiahin a aw thangkhawk mai a nih thu a hrilh ta a, “Ka fapa, i au dan a pianga ri i hriat kha midang ni lovin i aw thangkhawk mai a ni, mahse hei hi kan nunah pawh a thleng asin,”
“Kan nun a thilthleng hi kan thiltih lo let leh a ni duh chawk. Mi chunga i tih thin leh i rilru puthmang pawh i chungah a lo let leh thin a ni. Mi chunga rilru tha i put chuan i aw thangkhawk ang bawk khan mi pawh i chungah rilru tha an pu ang, mi chunga i sual chuan i chungah pawh an sual ve dawn a ni. Chuvangin i nuna a thangkhawk lo let leh tura i duh ang berin i nun i hmang thin dawn nia,” tiin a fapa chu a hrilhfiah ta a.