THE EASTER STORY
Good Friday tlai a lo ni a. Pangang pakhat chu thingzarah hian lungngai tak maiin a bawk reng mai a. “Engtin nge ni ta ang? Tun atanga rei loteah hian buhchiumah ka chang mai dawn si a. Ka rawng hring leh dum inpawlh mawi takte hi a bo zo ang a. Nakin lawkah chuan rawng uk dum khek khukin a rawn inthlak ang a. Ka taksa atanga lazai lo chhuak chuan nghet takin min tuam hlawm ang a. Engmah hre lovin ka muhil tawh dawn si a.” tiin amah leh amah a inbe mawlh mawlh mai a. Tlai ni chu a tla dawn suar suar tawh a. A sawi lawk ang ngeiin a vun rawng hring mawi tak maite chu rawng uk dum khek khuk chuan a rawn thlak tan ta a. A taksa atanga lazai sin tak lo chhuakte chuan amah chu a rawn zial tan ta a. Chu pangang chuan lungngai tak maiin engmah tih theih nei chuang si lo chuan a taksaa thil danglam lo awm mek chu a thlir reng ringawt mai a. A tawpah chuan chu pangang hring mawi tak mai ni thin chu chu lazai sin tak chuan a tuam zo ta a. Engmah hre lovin chu pangang chu tui takin a muhil zui ta bawk a. Easter Sunday zing a lo nih chuan chu pangang tui taka muhil chu a lo harh ta hlawl mai a. Zing ni chhuak eng mawi tak chuan amah tuamtu lazai sin takte chu rawn chhun tlangin a tle sep sep mai bawk a. Chu pangang chuan amahah chuan danglamna mak tak engemaw a thleng tih a hre thei ta bawk a. Tichuan, a tuamtu lazaite chu tawn tetin a chhuak ta a. Ni engah chuan a han inen chiang ta a. A hmaa pangang hring mai ni thin kha thla hlai mawi tak mai leh rawng chi hrang hrang nalh tak takin a pawlh chiat mai a lo neih tak bakah; a taksate chu rawng duhawm mawi tak tak maite chuan a lo tuam chhuak vek mai a lo ni a. A hmaa pangang lungngai tak indawm kun mai ni thin kha phengphehlep mawi leh duhawm takah lo changin, hlim takin pangpar zu thlum tak dawt turin a thlawk chhuak ta a. Krista thawhlehna chuan nun thar mawi leh duhawm zawk min pe thin a lo ni. Easter Sunday chibai vek ule.